Read SEBR SÕNGO, 1998 Neemi 3 Bible Online

Neemi 3 - SEBR SÕNGO, 1998 bible

Neemi 3

¹Maan-kʋʋd kãseng a Eliyasib ne maan-kʋʋdb a taaba yikame n sɩng Rũmsa pegba noor meebo. [4] B me-a lame n sɛ n ning-a barka, n lugl a kʋɩlensã. B talla lal-gũbra manegre n ta neb koabg ro-lug-lugã, n ning-a barka; n le tall meebo n ta a Ananeyɛl ro-lug-lugi.

²Zeriko rãmb n dɩk sẽn pʋgdã, t'a Imbri biig a Zakur me rɩk sẽn pʋgdã.

³Yaa Senaa tẽng rãmb n maneg n ta Zĩm noora zãongo. B maneg-a lame n me n ning sugri, n yals kʋɩlengã a nao zugu, n ning kut sogdse.

⁴A Uriya biiga la a Akos yagenga a Meremot n da yegd bãmba. Bãmb yegende yaa a Berekiya biiga a Mesulam, a Mesezabɛl biiga. Bãmb yegende, a Baana biig a Sadok.

⁵Bãmb yegende, Tekoa rãmba. B tẽnga nin-kẽems zãgsame tɩ b kõn wa n naag n tʋm ne tʋʋmda taoor dãmb ye.

⁶Sã n ya Kẽedpaoolg zãongã ne a kʋɩlenga yaa a Zoyada, a Paseya biiga la a Besodiya biig a Mesulam n maneg-a. B maneg-a lame n me n ning sugri, n yals a kʋɩlengã, a nao zugu, n ning kut sogdse.

⁷Sẽn pʋg-b bãmba: Gabaõ raoa a Melatiya, Meremot daoa a Yadõ ne Gabaõ la Mispa rãmb neb kẽere. Efrat rʋʋnd komberã n yeel bãmb tɩ b wa tʋme.

⁸Sẽn yõsg bãmba, yaa yõaka a Uziyɛl, a Araya biiga, n paas yũ-nooda kalemda, a Ananiya. B sɛɛsa b tʋʋmda Zerizalɛɛm b sẽn ta lal-gũbra sẽn lebg yaleng zĩig ningã.

⁹Bãmb yegende yɩ-la a Refaya, a Ur biiga, Zerizalɛɛm bogr a ye soaala.

¹⁰Bãmb yegende: a Yedaya, a Arumaf biiga; a manega sẽn tot ne a roogã. Sẽn pʋge, yɩ-la a Asabneya biig a Atus.

¹¹Sẽn pʋge: a Arim biig a Malkiya la a Paat-Moab biig a Asub, la b manegame n ta sãaba bugtoolsa zĩisẽ.

¹²Sẽn pʋge: Zerizalɛɛm bogr a to wã soaala, a Aloɛs biig a Salum, yẽ ne a kom-pugli.

¹³Sã n ya bãg-faaga zãongã, Zanoa tẽng rãmb ne a Anun maneg-a lame n me, n ning sugri, n yals a kʋɩlengã, a nao zugu, n ning kut sogdse. Bãmb n kell n maneg lal-gũbrã n ta Tãmpʋʋra dignoore. B manegra taa kãntɩɩs tusri.

¹⁴Tãmpʋʋra dignoorã, Bɛt-Kerem soaal a Malkiya, a Rekab biiga, maneg-a lame n me n ning sugri, n yals a kʋɩlengã, a nao zugu n ning kut sogdse.

¹⁵A Kol-Oze biig a Salum sẽn ya Mispa soaalã n maneg Ko-bundma zãongã n me, n ning sugri, n yals a kʋɩlengã, a nao zugu n ning kut sogdse. A naagame n maneg lal-gũbr ning sẽn yegd Siloe kʋɩlgã, sẽn sɩng dĩma zẽedẽ n ta teedsã sẽn dʋʋd a Daviid na-tẽnga.

¹⁶Yẽ poore: Bɛt-Sur soaala, a Neemi, a Azbuk biiga, n maneg lalgã n ta dĩm dãmba yaado, n ta kooma sẽn gɩdg zĩig ningã, n ta dĩma gũudba tãb-sika.

¹⁷Yẽ poore, Levit dãmb n pʋge: A Bani biig a Rewum n yɩ pipi; sẽn pʋge yɩɩ Keyila bogre soaal, a Asabiya. A tʋma Keyila bogr a sẽn so wã yĩnga.

¹⁸A Bavayi n pʋge, yaa a Enadad biiga la Keyila bogr a to wã soaala.

¹⁹Sẽn pʋge yɩ-la a Ezɛr, Mispa naaba la a Zesuwa biiga. A manega kɩreng ning sẽn tot ne zab-teeda bĩngr zĩigã, zĩig ning lalga sẽn tʋʋg n yi yɩngã.

²⁰Bãmb yegende: a Zabayi biig a Barʋk, ra zɛɛgda ne tʋʋmna; yẽ sɩnga lalga sẽn tʋʋg n yi yɩngã n ta maan-kʋʋd kãseng, a Eliyasib, dooga noore.

²¹Yẽ yegende, a Uriya biig la a Akok yagenga, a Meremot. A sɩnga a Eliyasib doogã n ta a satem.

²²Sẽn pʋg-b yẽ yɩɩ maan-kʋʋdb niyns sẽn pẽ-b Zerizalɛɛm.

²³A Bẽnzame ne a Asub manega sẽn tot bãmb dotã, t'a Ananiya yagenga la a Maaseya biig a Azariya soog lalg ning sẽn pẽ a roogã.

²⁴Sẽn pʋge: a Enadad biig a Binuwi; yẽ manega Gõdra tɛka ne a Azariya dooga sʋka.

²⁵Sẽn pʋge: a Uzayi biig a Palal; yẽ meeba sɩnga lalga gõdre n ta ro-lug-lugã, dĩma zak taoore, gũudba tãb-sika yegende. Yẽ taoore, a Paros biig a Pedaya,

²⁶da naaga ne sẽn da sõngd-b wẽnd dooga tʋʋm-tʋmdbã la sẽn da kẽed Ofɛl la bãmb n maneg n ta ro-lug-luga la gõdra sẽn be kooma noora yaanga.

²⁷Bãmb yegende: Tekoa rãmba. B mee ro-lug-luga tɛka n ta Ofɛl lalga.

²⁸Sẽn sɩng Wiidi noorã, yɩɩ maan-kʋʋdba n tʋme la ned kam fãa manega sẽn tot ne a roogo.

²⁹Bãmb taoore, a Imɛr biig a Sadok manega sẽn tot ne a roogo. Sẽn pʋga yẽ yɩ-la a Sekaniya biig a Semaya, yaang dignoora gũuda.

³⁰Sẽn pʋgde: a Selemiya biig a Ananiya, n paas a Salaf a Anun biiga, yẽ kẽem-dãmb ya-la b nu. Yẽ yegende: a Berekiya biig a Mesulam; yẽ me manega lalg ning sẽn tota ne a yiri.

³¹Yẽ taoore: noakensã la lɛɛbdba roto, sẽn sɩng Gũudb noore n ta do-lug-luga sẽn me gõdrẽ wã.

³²Yõgs a taaba la lɛɛbdba n maneg sẽn tot gõdrã n ta Dũmsa pegb noore.

³³A Sanebalat sẽn wʋm tɩ tõnd le yikda lalgã, a sũura wẽnemdame, a sũura puuga wʋsgo. A sɩnga Zʋɩf rãmba laado.

³⁴A yeela a saam-biisi la Samari ligd bɛda rãmba: «Yaa bõe la Zɩɩda nin-yaalsa maand ka. B tẽedame tɩ b daaba na waa n pidsi? Tɩ b na le tõog n kʋ maand ka? Tʋʋmda na baase? Lalg kõn lʋɩ tɩ b gaas a kuga n yiis bug rĩungẽ n le lɛɛg n dɩk-ba n me lalg tɩ yaas ye.»

³⁵Dẽ la Amonitga, a Tobiya, sẽn da yɛs a sɛɛgẽ yeel-a: «B ning pãng ne meebo. We-baag yee n da wa fão b kuga lalgã n lub-a sara!»

³⁶Tɩ m gom ne Wẽnd n yeele: «Ges-y b sẽn laad tõndo; kɩt-y tɩ b paoogr lɛɛg n dɩ-ba. Bao-y yembd tẽng n kẽes-ba tɩ b me yãe yaoolgo.

³⁷Da yĩm-y b wẽnema ye, da pek-y b yel-wẽnda ye tɩ b yaala y tẽnga metba.»

³⁸Tõnd yika lal-gũbra n dʋʋs-a a zãndlma pʋɩ-sʋka la neba ra tʋma ne sũuri.