Read SEBR SÕNGO, 1998 Neemi 4 Bible Online

Neemi 4 - SEBR SÕNGO, 1998 bible

Neemi 4

¹B sẽn wʋm tɩ Zerizalɛɛm lalsa yikda sõmb-sõmbo, tɩ bogda sɩngd yẽdbo, a Sanebalat, a Tobiya, arab dãmba, Amon dãmba la Asdod dãmb puuga b sũuri.

²B sedame tɩ rẽnd b wa tak zabr ne Zerizalɛɛm, n ning-a yãnde.

³Dẽ la tõnd pʋʋs d Wẽnnaam tɩ b gũ d tẽngã la d yalsa neb sẽn na n maan gũusgu ne bɛɛba, wĩndg la yʋngo.

⁴A Zɩɩda kamba ra zoe n basa raoodo n yetẽ: «Kug zɩtba pãng komsame, toma yaa wʋsgo! D kõn tõog abada, n le yik lal-gũbra ye!»

⁵Dẽ tɩ d bɛɛba me ra gomda woto: «D na n soos n kẽ-la b sʋka tɩ b pa bãng la b pa yãend fɩ la d na n kʋ-b-la zãnga tɩ b tʋʋmda pa tõog n baas ye.»

⁶B ka bãng tɩ Zʋɩf rãmba sẽn ya bãmb yagse n waa n wilg naoor yaka: «Ad f sẽn be zĩig ning fãa, f nee bɛɛba sẽn baood n na lʋɩ n yẽegd-do.»

⁷M tɩ yalsa m neba lal-gũbra tẽngr pẽgsẽ. M yals b la zak-zaka, ne sʋʋse la kãna la tãbdo.

⁸M neba da rigda rabeem. Dẽ la m yeel zãma wa ne tẽnga nin-bɛd la a nin-kẽemse: «Dã zoe-y nin-bãmba ye, tags-y Soaala-Wẽnd yelle, tẽeg-y tɩ b tara pãnga, tɩ ned fãa tog n zoe-ba, zab-y saam-biisa yĩnga, y kom-dibli la y kom-pugli yĩnga, y pagb la y rot yĩnga.»

⁹Bɛɛba waa n bãngame tɩ tõnd mi-la b tiiri. B bãngame tɩ Soaala-Wẽnd pa sak tɩ b raab wẽnga pids ye. Woto d fãa le sɩnga lalga tʋʋmde, ned kam fãa leba a zĩigẽ.

¹⁰Baraar tɛka neba pʋɩ-sʋk bala n da tʋmdẽ. Pʋɩ-sʋka ra yɛsa ne kãna la gãndo la tãbdo la kut futu. Zagsa kãsem-dãmba fãa ra kogenda Zɩɩda lal-gũbra metba.

¹¹Sẽn dʋʋsd-b lalgã, sẽn zɩt-b kuga la raadã ra boba b zab-teedo. Nug a ye n da tʋmde, tɩ nug a to wẽbg zab-teoogo.

¹²Metba sẽbgda sʋʋg b sɛɛgẽ n yaool n sɩng tʋʋmde. M da yalsa baorg pɛɛdb m sɛɛgẽ.

¹³M yeela nin-bɛdã, nin-kẽemsã la zãma wã fãa: «Tʋʋmda labsa la a wogma, woto tõnd sẽega taaba la d zãra ne taaba la ade,

¹⁴tigim-y taab baorga sẽn na n peeb zĩig ningã la Wẽnd na zab n sõng do.»

¹⁵Yaa woto la tõnd pʋɩ-sʋk ra tʋʋmda, tɩ d nug a ye tik kãnde, zĩig yẽgre n tãg ãds pukri.

¹⁶Wakat kãnga m le yeela zãma wã me woto: «Ned fãa ne a dakõor tog n paa Zerizalɛɛm tɩ yʋngo bɩ d tar gũusgu, tɩ wĩntoogo bɩ d tar meebo.»

¹⁷Maam woo, m saam-biisa woo, zãma wã woo, sẽn so-b gũusgã, ned ba a ye pa yeeg a fuugu, zab-teoog pa yi ned ba a ye nug rɩtg ye.