Read SEBR SÕNGO, 1998 Neemi 5 Bible Online

Neemi 5 - SEBR SÕNGO, 1998 bible

Neemi 5

¹Nin-zẽmba ne b pagbã waa n yika guglgu ne Zʋɩf rãmba.

²Kẽer da yetame: «Tõnd ne d kamba yaa wʋsgo, d datẽ lame n paam alkam, n dɩ n põse.»

³Kẽer da yetame: «Yaa pakr ne tõndo tɩ dɩk d pʋto la d bugsuntundu la d zagsa mense n boble, d sã n dat alkam, kom wẽnde.»

⁴Kẽer da yetame: «Sẽn na n yɩlẽ n paam naaba yaoodã n kɩse, tõnd kong n sarda d pʋt la d bugsuntundu.

⁵Tõnd yaool n yaa buud a ye, d kamba zema bãmb kamba, la bõe marsã tɩ d tog n koos d kom-dibli la d kom-pugli? D kom-pugli kẽer meng zoe n lebga yemse tɩ d ka tar noor n leokdẽ ye. D putã la d tɩɩsã zoe n yaa d sẽn dɩ b rãmb samda soolem.»

⁶Ma me sũur yika wʋsgo m sẽn wʋm b guglgu la b goama.

⁷[5†] M bilga yellã m yamẽ la ne m zaba nin-kẽembã la taoor dãmbã. M yeel-b lame: «Yaa bõe tɩ yãmb zɩlg taab zɩɩb bɛda?» M kɩtame tɩ neba fãa tigim.

⁸M goma woto: «D maana d sẽn tõe n yiis d saam-biisã sẽn da kẽes yembd bu-zẽmba tẽnsẽ. Bõe marsã tɩ yãmb lɛɛg n koosd-b ne taaba?» La b fãa paa sɩɩ n pa tõog n leok bũmb ye.

⁹Tɩ m paase: «Y sẽn maanda ka neer ba bilf ye. Y vɩɩm tog n yɩɩ neb sẽn zoet Wẽnd nif vɩɩm, n da wa lebg bu-zẽmba sẽn ya tõnd bɛɛba laad ye.

¹⁰Maam me, wala m yaopã la m saam-biisã, mam me ra peng-b-la ligd la koodo. D da sok d samda ye.

¹¹Lebs-y rũnda menga b pʋt la b tɩɩse la b roto, d bas b sama taale: ligda samdã, koodã, dãama, kaamã.»

¹²La b fãa naaga taab n leoke: «D na n lebsa fãa mars-marsã bala, d basa fãa taale, wala fo sẽn wilgã.» La m boola maan-kʋʋdbã n kɩt tɩ b wẽen tɩ b na pids b kãabgã.

¹³Dẽ poore m fugumda n fuug n yeele: «Bɩ Wẽnd fugumd ned ning fãa sẽn ka pids a kãabgo, n yiis a soab b tẽn-peelmẽ la b soolmẽ! Bɩ Wẽnd fugumd a soaba wa m sẽn fugumd m fuugã t'a fɩk n menem!» La b zãng fãa naaga taab n yeel: «Ami!» La b pẽga Naaba-Wẽnde la b pidsa b pʋlengo.

¹⁴Dẽ n so tɩ yʋʋm piig la a yiib pʋgẽ, dĩma sẽn yet tɩ m lebg Zɩɩda komber tɛka, a Artazerksɛs naam sẽn ta pisi yʋʋmde n digd a yʋʋmd pis-tã la a yiibu, maam ne m saam-biisa ka le reeg yõor yaood ye.

¹⁵Kombɛɛmba sẽn deng b maama yẽ da zɛɛda nebã. Beoog fãa, b bura raab yĩnga b ra reegda wanzurf wakɩ koeems pis-naase. B sõgen-kamba meng ra namsda nebã. La mam sẽn zoet Soaala-Wẽndã, m zɩɩ n maan boto ye.

¹⁶M modga ne lalga meebo ne m sẽn da ka tar pʋʋgã. M tigma m neba fãa tʋʋmda yĩnga.

¹⁷Sẽn yaool da naagd-b maama n dɩtẽ wã yaa taoor dãmbã la kãsem-dãmbã, neb koabg la pis-nu. La m pa gomd sẽn mi n yi b tẽns a taab n wa wã ye.

¹⁸Beoog fãa, m da kõt-b-la loalg a ye, pe-wubds piiga la noose. Dasem piig fãa m da kɩtdame tɩ b wa ne rãam lagd ka tɛka. M zɩ n deeg yõora yaood ye tɩ neba ra zoe n tʋmda tʋʋmd toogo.

¹⁹Tẽeg-y m yelle, Soaala, tẽeg-y m sẽn maan fãa y buuda yĩnga.