Read SEBR SÕNGO, 1998 Neemi 6 Bible Online

Neemi 6 - SEBR SÕNGO, 1998 bible

Neemi 6

¹B sẽn waa n togs a Sanebalat, a Tobiya, arabg a Gesem la d bɛɛb a taabã tɩ tõnd yika lalgã n pa tol n kees wɛdg ba a ye, dẽ tɩ m da ka paam n lugl kʋɩlensa zãng ye.

²Ad-b sẽn tʋm tɩ b wa yeel-ma: «Wa tɩ d seg taab Kefirim, Ono sẽne.» B ra baood-m-la ne wẽnga.

³M tʋma b nengẽ tɩ b tɩ yeel-ba: «M tara tʋʋmd kãsenga, m pa tõe n bas n wa be ye. Bõe tɩ m na n bas n wa sak y boolla tɩ tʋʋmda yõdg n yalse?»

⁴Yɩɩ naoor a naas la b sẽn bool-m woto la wakat fãa m leok-b-la leok-yɛnga.

⁵La a Sanebalat sẽn da gãd yella kẽnkẽ tʋma a sõgen naoor a nu soaba ne sebr sẽn ka pag ye.

⁶Woto n da be sebra zugu: «Kibar n wa m nengẽ tɩ foo ne Zʋɩf rãmbã dat n fugumda y mens n yɩ dĩma soolmẽ la yaa rẽ yĩng la y le yikd lal-gũbrã, la b paasame tɩ foo n na n lebg dĩma.

⁷Tɩ rẽnd yĩnga f bao bãngdba sẽn na n sõng-fo, bãngdb sẽn na n moone: a Zɩɩda paama dĩm marsã. Ade, dẽ fãa na n lʋɩ dĩma tʋbrẽ, dẽ la m yet tɩ f wa tɩ d yẽse.»

⁸M yeelame tɩ b tɩ leok-a woto: «Bũmb ka be n wẽnd fo sẽn togsa ye; foom n naan dẽ fãa f yamẽ.»

⁹B da baood n na n yɛɛsa tõnd, tɩ d yɛ ne d tʋʋma, n ka baas-b ye, la dẽ kenga tõnd daoodo. «Soaala, sõng-y-ma tɩ m tʋʋmda baas neere!»

¹⁰M waa n kẽnga a Delaya biig a Semaya nengẽ; a Delaya ba la a Metabeyɛl; m kẽnga a nengẽ t'a ra ka paam vɩʋʋg n wa ye la ad-a sẽn yeel-ma: «D seg taab Naaba-Wẽnd doogẽ. D kẽ wẽnd dooga tẽnsʋka, d pag a kʋɩlensã neere, tɩ b rat n wa kʋ-f lame. N-ye, yʋng kãnga bala, b na n wa kʋ-f lame.»

¹¹M leokame: «Mam to wã na zoe? Ãnda wa maama n na n saag n kẽ wẽnd doogẽ n le vɩɩnde? M pa na n seg-y ye!»

¹²M bãngame tɩ ka Wẽnd n tʋm-a ye, m bãngame t'a sẽn gom woto wã, a Tobiya n da kõ-a ligdi t'a togs boto.

¹³A ra tʋll n kẽesa rabeem m sũurẽ tɩ m maan wẽnga la woto b na tõog n sãam m yʋʋr la b paoog-ma.

¹⁴Tẽeg-y-yã, Soaala, a Tobiya la a Sanebalat yelle, da yĩm-y-yã b sẽn maana ye. Tẽeg-y bãngd-poak a Noadiya yelle, da yĩm-y bãngdba taaba me sẽn da rat n kẽes-m dabeema ye!

¹⁵Lal-gũbra mee n sɛɛ dasem pis-nu la a yiib pʋgẽ, Elul kiuug pisi la a nu raare.

¹⁶Bɛɛba fãa sẽn wʋme tɩ d le yika lal-gũbrã, bu-zẽmba sẽn ya tõnd yagsã riga rabeem la yãnd yõk-b lame. B reegame tɩ Wẽnd yalsa d poorẽ tʋʋmd kãnga yĩnga.

¹⁷Wakat kãng tɩ Zɩɩda nin-bɛd wʋsgo da tara a Tobiya gʋlsgo la b reesd a sɛba. B ra gʋlsdame n dat n sãam m yelle.

¹⁸A Tobiya zo-rãmb da yaa wʋsg Zɩɩda pʋgẽ t'a Ara biig a Sekaniya n da yaa a rɛɛmba la a biig a Zoana da kẽe kãadem ne a Berekiya biig a Mesulam bi-pugla.

¹⁹B ra tol n pẽgda a Tobiya tʋʋma mam taoore, n deesd mam goama n togsd-a. A ra gʋlsda sɛb n na n kẽes-m rabeem.