Read SEBR SÕNGO, 1998 Neemi 8 Bible Online

Neemi 8 - SEBR SÕNGO, 1998 bible

Neemi 8

¹Zãma wã fãa tigma wala nin-yend, Zerizalɛɛm, neba sẽn segd taab zĩig ning Kooma rignoorẽ la b yeela sɛb gʋlsda a Esdras t'a wa ne a Moyiiz noora sebrã, noor ning Soaala-Wẽnd sẽn da kõ a Israyɛl. A Esdras ra vẽena ne noora wʋsgo.

²Maan-kʋʋd a Esdras waa ne noora sebre zãma wã taoore, pagba, rapa la kamb sẽn wɩsge taoore. Yɩɩ kiuug a yopoe soaba pipi raare.

³Kooma rignoorẽ, a Esdras karma sebrã, al yibeoogo n ta wĩnto-sʋka, pagba, rapa la kamba taoore la b fãa ra yooga b tʋba.

⁴B ra kaa ra-pegdo n zẽke t'a Esdras dʋ be n karemdẽ. Ad neb niyns sẽn da yeg a Esdras, a rɩtgo: a Matitiya, a Sema, a Anaya, a Uriya, a Ilkiya la a Maaseya. A goabga: a Pedaya, a Misayɛl, a Malkiya, a Asum, a Asbadana, a Zakari la a Mesulam.

⁵A Esdras laka sebrã neba fãa nifẽ, neba fãa ra tõe n yãend-a lame. A sẽn lak sebrã b fãa gill yika yĩngri.

⁶A Esdras pẽga Naaba-Wẽnde, Pãng-Soaba, la neba fãa zẽka b nus yĩngr n yeele: Ami, ami! La b zõondame, b yĩgimdame n kɩ b neng tẽnga Naaba-Wẽnd taoore.

⁷Zãma wã ra yɛsame t'a Zozuwe, a Bani, a Serebiya, a Yamin, a Akub, a Sabetayi, a Odiya, a Maaseya, a Kelita, a Azariya, a Zozabad, a Ana, a Pelaya, Levitse, bãmb da reesda goama n togsd neba sẽn da yɛs zĩ yɛnga.

⁸Bãmb n da karemd noora sebrã vẽeneg vẽenega la b wilgd a võore sẽn na yɩlẽ tɩ b rɩk zãng fãa.

⁹A Neemi la sɛb naab a Esdras ne Levitsa sẽn da zãmsd neba, yeela zãma wã: «Ad-y rũnna raarã yaa Wẽnd daare, yaa ra-sõngo, dẽ yĩnga ra yãb-y ye.» Sɩda zãma wã ra yãbdame la a kelgd sebra karengo.

¹⁰B le yeelame yɛsa: «Kẽng-y n tɩ rɩ-y rɩ-sõma la y yũ rã-sõma la bao-y rɩɩb n kõ sẽn ka segla rɩɩb t'a rɩ; raarã yaa Naaba-Wẽnd raare. Zãag-y mens ne sũ-sãang. Y sũ-noog sã n yit Wẽnd nengẽ a pidsd-y-la ne pãnga.»

¹¹Levitsa maasa zama wã sũuri, b ra yetame: «Da yãb-y ye tɩ rũnna yaa Soaala raare, da sãam-y y sũur ye!»

¹²Woto wã b baoo koom n yũ, n bao rɩɩb n dɩ la b kell n tɩ kõ, la b kɩdem wʋsgo. B ra paam n wʋma karenga võore.

¹³Daar a yiib soaba, buud kãsem-dãmba ne maan-kʋʋdba la Levitsa le gũbga a Esdras n bao sebra võor n paase.

¹⁴Ad-y b sẽn karem sebrã, sebr ning Soaala sẽn da kõ a Moyiiz, b wʋmame tɩ Israyɛl kamb da tog n paa sẽgdẽ kiuug a yopoe soaba kibsa wakato.

¹⁵[8†] B bãngame tɩ yaa bũmb sẽn da tog n moone Zerizalɛɛm la tẽns a taaba tɩ neba dʋ tãmsã n kao tɩɩs wila, wala oliviye, kankamse, komse la tɩɩs fãa sẽn tob vãado, n wa ti roto.

¹⁶Israyɛl kamba tɩ baoo wila n ti roto, kẽere, b gasd zugu, kẽer, b sɩmannẽ, kẽer, wẽnd dooga sɩmannẽ, kẽer kooma rignoorẽ, la a Efrayim dignoorẽ.

¹⁷Zãma wã fãa sẽn yi yembd weoogo maana sẽgdo n kẽ. Yɩɩ kibs la sũ-noog menga. A Nun biig a Zozuwe loog poore, Israyɛl kamb zɩ n maan a taar ye.

¹⁸Beoog sã n vẽeg fãa, a Esdras da karemda bũmb sebra pugẽ, kibsa sɩngra daare n tãag sɛtma raare. Kibsa maana rasem a yopoe. La wala Noora sẽn date, raar a nii soaba yɩɩ baasg tig-raaga.