Read SEBR SÕNGO, 1998 Neemi 9 Bible Online

Neemi 9 - SEBR SÕNGO, 1998 bible

Neemi 9

¹Kiuuga pisi la a naas daare, Israyɛl kamb yeelga sũ-pa-noang futu, n yug b yĩng tom la b tigim taab n na n loe b noore.

²A Israyɛl buuda welga ne buud a taabã, b yalsa yĩngri n na n deeg b mens la b yaab rãmb kongre.

³B yalsa yĩngri, ned kam fãa a zĩigẽ tɩ b karem Sebrã Wẽnd sẽn kõ-bã, wakat a tãabo. Wakat a tãaba sẽn pʋgã, b yõka b yel-wẽna tẽesgo la sugr kosgo n wõg Wẽnnaam b Soaala taoore.

⁴A Zozuwe, a Bani, a Kadmiyɛl, a Sebaniya, a Buni, a Serebiya, a Bani, a Kenani yika b sẽn da zao zĩig ningã n tees Naaba-Wẽnd, b Wẽnnaam, n kelem tɩ sãde.

⁵Levitsã: a Zozuwe, a Kadmiyɛl, a Bani, a Asabneya, a Serebiya, a Odiya, a Sebaniya, a Petayiya yaool n yeelame: «Yɩk-y yĩngri, pẽg-y Wẽnde! Naaba-Wẽnde, tõnd Wẽnda, paam pẽgr wakat buud fãa. Bɩ ned kam fãa kils y yʋʋr sẽn tog ne pẽgre, yʋʋr sẽn zʋʋg pẽgr la kilsgu!

⁶Yãmb la Naaba-Wẽnde, yãmb y ye tãa! Yãmb n naan yĩngri, ne a yalma la a ãdsã. Yãmb n naan tẽngã ne a teeda fãa, n naan mogra ne a pʋgẽ teedo! Yãmb la bõn-vɩɩl fãa vɩɩm kõata. Yĩngr tãb-biisa fãa wõga yãmb taoore.

⁷[9†] Naaba-Wẽnde, yãmb la Wẽnd ninga sẽn yãk a Abram, n yiis-a Ur, Kalde tẽnga; y teka a yʋʋre la Abram waa n leb a Abraam.

⁸[10†] Y sẽn yãe t'a yaa pʋ-peen-neda, y yõga zood ne-a. La y kõ-a-la Kanaã rãmb tẽnga n paas Ititse, Amoritse, Perizitse, Zebuzitse ne Girgazits dãmb tẽnga. Y kõ-a-la yẽnda ne a yagense. La y sẽn ya sõng yĩnga, y kãabg ka pa vɩʋʋg ye.

⁹[11†] Y yãenda d yaab rãmba nimbãaneg Ezipt tẽnga; y wʋma b kɛleng Rudum Mogra noore.

¹⁰[12†] Y maana yel-soalem la yel-ban Ezipt dĩma taoore, a sõgen-kamb la a soolem dãmb taoore. Y yãenda wʋglem la tɩtaam ninga b sẽn maan d yaab rãmba taoore. Y tʋmame tɩ y yʋʋr sãde n ta rũnna.

¹¹[13†] Y kɩtame tɩ mogr kʋɩ d yaab rãmba taoore la b rʋʋg-a-la koɛɛnga. Y lobga b bɛɛba kooma sʋka wala b sẽn lobgd kugr ko-zulungẽ.

¹²[14†] Wĩndga, sawadg n da wilgd-b sore, la yʋngo, sawadga ra lebgda b vẽenem.

¹³Yãmb siga Sinayi tãnga zugu, yãmb zĩnda yĩngri n gom ne-ba, n kõ-b no-sõma, noy sẽn ka kẽesd moogo, noy sẽn wat ne fãagre.

¹⁴[15†] Yãmb wilg-b-la y raare, vʋʋsg raare, yãmb yalsa noya la y saglsã ne a Moyiiz zelemde, yãmb tʋʋm-tʋmd a Moyiiz zelemde.

¹⁵[16†] Yãmb yiisa b kom ne yĩngr dɩɩbo. Yãmb yiisa b ko-yũud ne pĩig koom. Y kõ-b-la noore tɩ b tɩ reeg tẽng ning y sẽn da wẽen n kãab-ba.

¹⁶La d yaab rãmb maana nagre, n nak b kãare, n yet tɩ b kõn sak ye.

¹⁷[17†] B zãgsa y noora reegre, b yĩma y tʋʋm-bãna y sẽn maan b yĩnga. B naka b kãare n yet tɩ rẽnd b leb Ezipt tẽnga, dẽnd b leb b yembd tẽngẽ. Yãmb wilgame tɩ y yaa sugr soaba, sũ-bʋgsem soaba nimbãan-zoeta la sũ-maasem soaba, y wilga y sũur sẽn pid ne yardo tɩ y ka tʋlg b basg ye.

¹⁸[18†] B waa n yẽnega b sãnem n maan b nag-bila la b saag n yeela vẽenega: ‹Woto la wẽnd ninga sẽn yiisa tõnd Ezipt tẽnga!› Y ka bas-b ye tɩ yɩɩ paoogre, yɩɩ yãmba Wẽnd paoogr kãsenga.

¹⁹Yãmb tũ-la y sũ-maasem n ka bas-b tɩ b pa weoogẽ ye, sawadga ka zãag ne bãmb ye, a ka pa n ka wilg b sor wĩndg ye, a ka pa yʋngo n ka yãng a vẽenem ye.

²⁰Yãmb pʋdga y yam n kõ-ba, la b lebga yẽesem dãmba. Yĩngr dɩɩba pa zãag ne b noore ye la y kõ-b-la koom tɩ b kiis b ko-yũudu.

²¹[19†] Yãmb gesa b yell yʋʋm pis-naase. Zĩ-peen-daagẽ wã, bũmb ka paoog-b ye, b fut ka lebg kʋɩdse la b nao ka mod ye.

²²[20†] Yãmb sagla b nugẽ tẽns la neb ka tɛka, bãmb la y rɩk n ning b toosẽ: Esbõ dĩm a Siyõ la Bazã dĩm a Og.

²³[21†] Yãmb kɩtame tɩ b wek balbo. B sõorã, bãng yĩngr ãdse. Y tall b lame n kẽes b tẽngẽ, tẽng ning y sẽn da yeel b ba rãmb tɩ b wa sooge.

²⁴[22†] B kamba sɩd wẽe tẽngã n soog-a, tẽnga rãmba, Kanaã rãmba tɩtaam sigame la b zã-b-la b nugẽ wala b sẽn date.

²⁵[23†] B reega tẽns sẽn tar lal-gũbri, b koo pʋt sẽn pa faagd ye. B kẽe zags sẽn pid ne bũmb fãa, tẽns sẽn tar bulsi, sãbse, oliviye la tɩɩs a taab ka tɛka. B rɩɩme, b tɩgame, b nobame, b pidsa b yamleoogo ne arzɛk sẽn ka tõe n sɛ ye.

²⁶La ade, b waa n lebga tõatba, b waa n wegmame n dɩk yãmb Noorã n lobe, b rɩk-a lame n lobg b zãnkudgẽ, la b kood bãngdb niyns sẽn da legend-bã; mik b sẽn maan dẽ, b maana wɩɩbdo.

²⁷Yãmb bas-b-la ne b bɛɛba tɩ b sɩbg-ba. Sɩbgra wakato b ra kaasdame n boond yãmba la yãmb zĩnda yĩngr n kelg b boaala la y yika ne y nimbãan-zoeerã n kõ-b neb sẽn na n fãag-ba.

²⁸[24†] La b sã n paam laafi bilf bala b le rɩkda b wẽnema tɩ yãmb me le bas-b ne b bɛɛba tɩ bɛɛba le sɩbg-ba, tɩ b le sɩng yãbre, tɩ yãmb le zĩnd yĩngr n kelg-ba. La y sẽn ya nimbãan-zoeer soab yĩnga, yaa naoor ka tɛka la y sig n fãag-ba.

²⁹[25†] Yãmb sagl-b la naoor yaka n na n wẽnemd b meng n tees y menga la b wilg-m-meng tus-b lame tɩ b zãgs y noore. B tõdga noya sẽn wat ne vɩɩma, b yeelame tɩ b kõn zõond n tʋk zɩɩba ye, b naka b kãare, b tõdga sakre.

³⁰ [26†] Yãmb maaga y meng ne-ba n kaoose, yãmb wɩnga ne b saglgo, yãmb kõ-b-la bãngdba la b zãgsa kelgre. Dẽ la yãmb bas-b tẽnga rãmb nusẽ.

³¹Y sũ-maasem yĩnga b ka wã zãng ye, y ka bas-b ye, y sɩd yaa nimbãan-zoeta, y sũur sɩd pida ne nonglem.

³² [27†] La yãmb sẽn ya Pãng-Soaba, Soaala, yãmb sẽn kẽesd dabeem wʋsgo n yaool n ya bʋgsem la nonglem, da ges-y wa bõn-faasga pɛt ning d sẽn tʋk d zugẽ, tõndo, d dĩm dãmba, d nanamse, d maan-kʋʋdba, d bãngdba, d buuda gilli. D tʋka d pɛtã, Asiri rãmba wakatẽ n ta rũnna.

³³Yɛla pak d lame la y nengẽ kegr pa zĩnd ye, yãmb nonglem kell n yalsa a zĩigẽ, yaa tõnd n yɩ wẽn-kɩɩsdba.

³⁴N-ye, d dĩm dãmba, d taoor dãmba, d maan-kʋʋdba, d ba rãmba ka tʋ noora ye. B pa kelge, b pa reeg y sagls ye!

³⁵B sẽn kẽ kãoobg tẽnga, b sẽn mik tɩ yaa tẽng sẽn sakd koodo n yɛdg n dɩg b taoore, b pa le nams n pʋg-y ye, b pa vʋʋs ne tʋʋm wẽn ye.

³⁶Yaa rẽ yĩng la d lebg yem-daad dũnna, tẽng ning y sẽn da kõ d yaab rãmba tɩ b kẽ n me la b rɩ a yõodo.

³⁷Sẽn dɩt-b tẽnga yõod marsã, yaa dĩm niyns yãmb sẽn dɩk tõndo n sagl b rãmb nusẽ, d wẽnema yĩnga. Bãmb n so tõnd ne d dũmsi n maand b sẽn date. Kato! D pɛta ka zem-zem ye!»