Read SEBR SÕNGO, 1998 Tobi 1 Bible Online

Tobi 1 - SEBR SÕNGO, 1998 bible

Tobi 1

¹A Tobi kibare. A Tobi yaa a Tobiyɛl biiga, a Tobiyɛl yaa a Ananiyɛl biiga, a Ananiyɛl yaa a Aduwɛl biiga, a Aduwɛl yaa a Gabayɛl biiga, a Gabayɛl yaa a Rafayɛl biiga, a Rafayɛl yaa a Raguwɛl biiga, a Raguwɛl yaa a Ariyɛl biiga, a Neftali roogẽ.

²Asiri dĩm a Salmanazar zamaanẽ, b yisa nin-kãng Tisbe sẽn be Neftali, Kidios tẽng nug rɩtgo, n tall-a n wa Galile, Asɛr tẽn-peelma nin-taoor bilfu, Fogor goabga.

³Maam, a Tobi, mam tũu sɩda sore ne yel-sõma maanego, daar fãa, m vɩɩm fãa pʋgẽ. M yãka m nug-bũmb wʋsgo n kõ m saam-biisã la m buuda kamba sẽn da naag ne maam n kẽng yembdo Niniv, Asiri tẽnga.

⁴Mam bi-bɩɩlem wakato, mam sẽn da waa n ket m ba-yiri, a Israyɛl tẽnga, mam yaab a Neftali neba waa n welga ne a Daviid n welg ne Zerizalɛɛm, tẽng ning sẽn da yãk toore n na n yɩ zamaan woo zamaana, maanda kʋʋb zĩiga la Wẽnnaam doogo.

⁵Yaool n yaa tẽn-kãnga pʋga la Israyɛl da tog n kʋʋd maando; da yaa be la b me wẽnd doogã, neb fãa yĩnga. Mam dogd-n-taas fãa, ne a Neftali neba, bãmb da kʋʋda maando nag-bil taoore; a Israyɛl dĩm a Zeroboam n da kɩt tɩ b rõog-a n ning Galile tãmsã zutu, Dã tẽn-peelmẽ.

⁶Naoor wʋsgo mam da ya-la m yembre tãa n kẽnd Zerizalɛɛm n na n deeg Noor sẽn modgd a Israyɛl kamb fãa. Mam da mii n tallda m kood rẽemse ne m rũmsa kom-dẽemse, ne rũng a ye rũms piig zugã, ne piisa pipi wõrsga kõbdã.

⁷Mam da rogend-b-la maan-kugra zug, a Aarõ kamba taoore. M da kɩta Levitsa sẽn tʋmd Zerizalɛɛm: alkama, rãama, kaama, kankama, tɩ-biisa sẽn wẽnd pooloomsã la tɩɩs a taaba biis, pʋɩɩr a ye piig zugu.

⁸Mam mii n kõta kɩɩbse, pʋg-kõapa, sãamb niyns sẽn da vɩ-b ne Israyɛl kamba, b sẽn da tog n kõ-bã. Yʋʋmd a tãab-tãab fãa, tõnd da naagda taaba n noogd d sũuri wala a Moyiiz sẽn da kõ noore tɩ d maane, la a Debora, tõnd ba a Ananiyɛl ma, sẽn da sagend tõnd tɩ d maane. Mam ba da kiime n bas maam ne kɩɩbdo.

⁹Mam sẽn waa n bɩ n sek paga, mam rɩka pag a yembre tõnd buuda pʋgẽ. Paga da boondame t'a Anna. A kõo maam biiga tɩ mam pʋd a t'a Tobiyas.

¹⁰B sẽn waa n tall tõnd n kẽng Asiri yembdã wakato, b kẽes-m-la Niniv tẽnga. Mam saam-biis n paas mam buuda neba da rɩta bu-zẽmba rɩɩbo.

¹¹Sã n ya maam, mam da ka sakd n dɩ b dɩɩb ye.

¹²Mam sẽn da maan Wẽnd yam daar fãa yĩnga,

¹³Yĩngr Wẽnda kɩtame t'a Salmanazar da nong maan wʋsgo, n kɩt tɩ mam da leebd a leebgo.

¹⁴Mam da kẽngda Mɛdi tẽnga n tond dĩm kãng yĩnga, n taa a kũum. Mam bĩnga ligdi, yond piiga, Mɛdi tẽnga, a Gabri yao a Gabayɛl nengẽ.

¹⁵A Salmanazar sẽn waa n kaẽ, a biiga a Senakerib n dʋ zaoore. Mɛdi soya fãa pagame tɩ m da ka leb n tõe n kẽng be ye.

¹⁶La a Salmanazar zamaanẽ, mam da maanda wẽn-kosgo ne m saam-biisi.

¹⁷Kom sẽn tar b rãmba, mam da kõt-b-la rɩɩbo, sẽn da ya-b zaala, mam da kõt-b-la futu. B sẽn da mii n dɩk mam saam-biisi sẽn ki-b n gãngd Niniv lalse n lobdã, mam da wʋkd-b lame n mumnẽ.

¹⁸A Senakerib sẽn da kʋ b rãmba me, mam da mumd-b lame. A Senakerib waa n yii Zɩɩda n zoe n wa, tɩ Yĩngri Dĩma n sɩbg-a, a sẽn tʋʋs bãmb yĩnga. A sũura puugame t'a kʋ Israyɛl kamb wʋsg-wʋsgo. Mam da soosdame n wʋkd kũuma n mumdẽ. A Senakerib ra baood-b lame n kongdẽ.

¹⁹Niniv ned a yembre tɩ wilga naabã, tɩ yaa maam n soosd n mumd kũuma. Mam sẽn wʋm tɩ naab bãngame, n baood maam n na n kʋ, dabeem yõk-m lame tɩ m zoe.

²⁰M paoong fãa, b reeg-a lame, b pa kell maam bũmbu, sã ka mam paga Anna ne mam biiga a Tobiyas.

²¹Sẽn ka ta dasem pis-naas rẽ poore, naaba meng kamb a yiibu kʋ-a lame n bas n zoe n kẽng Ararat tãmsẽ. A biig sẽn boond tɩ Asaradõ n deeg a zĩiga. A Ayikar, mam kẽem a Anayɛl biiga, n da so naaba soolma ligd geelgo, la bũmb fãa yell gesgo.

²²A Ayikar sõngr yĩnga, mam tõog n leba Niniv. A Ayikar da yɩɩ ned ninga sẽn da kõta dĩma rãama t'a yũudã, n le bĩngd bũmb ning a sẽn tar n tikd a sɛba, n le ya tẽnga komber la ligd naaba, Asiri dĩm a Senakerib wakato. A Asaradõ sẽn deeg naam a kell n basa a Ayikar a zĩigẽ. Sẽn da sõmb n paase, a Ayikar da yaa m kẽem biiga, m buud neda.