Read SEBR SÕNGO, 1998 Tobi 11 Bible Online

Tobi 11 - SEBR SÕNGO, 1998 bible

Tobi 11

¹B sẽn wa n kolg Kaserin, sẽn tot Niniv,

²a Rafayɛl yeela a Tobiyas: «Fo mii tõnd sẽn bas f baaba to-to.

³Wa tɩ d deng f paga taoore n tɩ maneg zakã t'a yaool n wa ne a taabã.»

⁴Bãmb b yiib fãa rɩka sore. A Rafayɛl da pĩnd n yeela a Tobiyas t'a zɩ zĩifa yamã.

⁵A Anna da zĩime n tar sor gesgo, sor ninga a biiga sẽn na n tũ n wa wã.

⁶A waa n yãeeme tɩ neb wata, a bãngame tɩ yaa a biigã n tɩ yeel a sɩda: «Ad f biiga wata ne a tũud-n-taagã!»

⁷A Rafayɛl yeel a Tobiyas, dẽ tɩ b nan ka ta yir ye: «Sɩd sɩda, mam yeta foom tɩ f baaba ninã na n pukame.

⁸Fo na n dɩka zĩifã yam n ning a nina, tɩɩma na n maana a tʋʋmde, a na n yiisa gãong pɛɛlga la f baaba na n gesame, a na n yãee vẽenem.»

⁹A Tobiyas ma, a Anna, zoeeme n seg-a, n mobg-a, n yeele: «Marsã mam sẽn paam n leb n yãe fooma, m tõe n kiime!» La a yãbame.

¹⁰A Tobi yikame n kẽnd n babendẽ, la a tõog n yii zaka noore.

¹¹A biiga, a Tobiyas, seg-a lame n tar zĩifã yam a nugẽ. A gãda a baaba n fʋʋs a nina n yeel-a: «M baaba da maan dabeem ye.» A rɩka tɩɩma n ning nina n yaas bilfu,

¹²n yaool n dɩk a nug n tak gãong pɛɛlgã n pulgi.

¹³A baaba mobg-a lame la a yãbda. La a zẽka a koɛɛg n yeele: «Mam le nee foom, m biig sẽn wa ne m nina vẽenem!»

¹⁴A yeelame: «Wẽnnaam paam pẽgre! B yʋ-kãsenga paam pẽgre! Malɛk sõama wã fãa paam pẽgre! Wẽnd yʋ-kãsenga paam pẽgre! Malɛgsa fãa paam pẽgre, zamaan ne zamaana! Wẽnd da zɩsga b nugã m zugu la ad b sẽn le sõng tɩ m ne ne m nini, m biig a Tobiyas.»

¹⁵A Tobiyas kẽe zakẽ ne sũ-noogo, la a zẽka a koɛɛga n pẽg Wẽnnaam, n pʋʋs b barka. A wilga a baaba a kẽnd yelle, a wilg-a lame tɩ fãa zemsame. A paama ligdã, a paama a Raguwɛl biiga a Sara n maan a paga, la a bee poorẽ n watẽ, a ka zãr ne Niniv ye.

¹⁶A Tobi yika ne sũ-noogo la a pẽgd Wẽnde, n tees Niniv noore, n tɩ seg a bi-paga. Niniv rãmba sẽn yãe t'a kẽnd a yembre farfare, tɩ ned ka wilgd-a sore, b pɛleng yɩkame. A Tobi ra moonda bãmb fãa taoore: «Wẽnnaam zoe m nimbãanega n puk m nini.»

¹⁷A Tobi kolga a bi-paga a Sara n ning-a bark n yetẽ: «M bi-sõngo, ne f waoongo! F Wẽnda sẽn kɩt tɩ f be tõnd sʋka paam pẽgre! Wẽnd ning f ba barka! Wẽnd ning m biiga, a Tobiyas barka! Wẽnd ning-f barka, m bi-paga! Kẽ f zakẽ, F yɛɛl ne waoongo! Wẽnd pids-f ne bark la sũ-noogo, m biiga! Wa kẽ f zakẽ, m biiga!»

¹⁸Badaare yɩɩ kibs kãsenga Niniv Zʋɩf rãmb yĩnga,

¹⁹la a Ayikar ne a Nadab wa n naaga b yɛba, a Tobi, n wilg b sũ-noogo.