Read SEBR SÕNGO, 1998 Tobi 12 Bible Online

Tobi 12 - SEBR SÕNGO, 1998 bible

Tobi 12

¹B sẽn wa n maan yikãadem kibsa n sɛ, a Tobi boola a biig a Tobiyas n yeel-a: «Tẽeg n kõ f tũud-n-taaga ligd ninga sẽn tog t'a paam, kõ-a tɩ yɩɩg rẽnna.»

²A Tobiyas soka a baaba: «M na n kõ-a-la wãna?

³Ba mam sã n yãk m paoongã pʋɩ-sʋka n kõ-a, dẽ ka sãam bũmb ye; a leb n talla maam n wa ne laafi, a gũ-la m paga neere, la a talla ligdi n wa, la sẽn yɩɩd fãa a sãooga foom! D na n kõ-a-la wãna n paase?»

⁴T'a Tobi yeel-a: «A togame n paam ligd ning a sẽn tall n wa wã pʋɩ-sʋka.»

⁵A Tobiyas boola a tũud-n-taaga a Rafayɛl t'a wa, la a yeel-a lame: «Deeg ligdã pʋɩ-sʋka, f sẽn maana fãa yĩnga, la Wẽnd na kuls f ne laafi!»

⁶A Rafayɛl peega bãmb b yiib kɛɛnga n yeel-ba: «Pʋʋs-y Soaala Wẽnnaam barka la pẽg-y-ba neb fãa taoore, b sẽn maan yãmb neer yĩnga. Pẽg-y Wẽnd yʋʋre, wilg-y neba Wẽnnaam tʋʋma. Da yĩm-y b bark pʋʋsg ye.

⁷Togame tɩ y moon Wẽnnaam tʋʋma tɩ neb wʋme. Pʋʋs-y Wẽnnaam barka ne y sũur fãa. Maan-y sẽn ya neer, la boto yell kõn pak-y ye.

⁸Pʋʋsgo ne no-loere, wẽn-kosgo la zemsgo sãoo arzɛka ne wẽnem. Fo sẽn na n maan wẽn-kosgo sãoo fo sẽn na n baood sãnem n bĩngdẽ.

⁹Wẽn-kosgo zãagda ne kũum la a yẽesda yel-wẽnd buud fãa. Sẽn maand-b wẽn-kosgo, na tɩg vɩɩm.

¹⁰Sẽn maand-b yel-wẽna la yɛl kɛg buud fãa maanda b menga.

¹¹Mam na n togsa yãmb sɩd zãnga n pa solg fɩ! Dĩm tʋʋm n be sẽn solgde, Wẽnd tʋʋm toga ne pẽgre.

¹²Ade, yãmb sẽn waa n pʋʋse, foo wala a Sara, yaa maam n deeg pʋʋsgã n taas Soaala sẽn pid ne ziirã. Yɩ wala f sẽn da waa n mumd kũuma.

¹³Fo sẽn da mi n yikd n basd rɩɩbã n na n kẽng n tɩ mum kũuma, maam la Wẽnnaam tʋmyã tɩ m wa mak f tẽeba ne zondã.

¹⁴Maam la b le tʋm tɩ m wa sãoog foom ne f bi-paga a Sara.

¹⁵Maam la a Rafayɛl, yaa malɛk rãmba a yopoe wã nin-yende, malɛgs niyns sẽn be Soaala ne b ziira taoorã.»

¹⁶Bãmb b yiiba fãa, a Tobiyas ne a ba, pɛleng yɩka al wʋsgo tɩ b wõgemde ne rabeem kãsenga.

¹⁷La a yeel-b lame: «Laafi zĩnd ne yãmba, da zoe-y rabeem ye, Pẽg-y Soaala Wẽnnaam daar fãa!

¹⁸Mam sẽn da be yãmb nengẽ wã, dẽ fãa tũu ne Wẽnnaam daabo, tũu ne Wẽnnaam yam, togame tɩ y pẽg-ba, la y pʋʋs bark daar fãa.

¹⁹Yãmb yãeeme tɩ yaa wa m dɩtame, ka sɩd ye, da wẽndame bala.

²⁰Pẽg-y Soaala, tẽng zugu, la pʋʋs-y Wẽnnaam barka. Sã n ya maam, mam na n leb n dʋʋ sẽn tʋma maama nengẽ. Gʋls-y bũmb ning fãa yãmb sẽn yãe wã.» A sẽn gom woto n sɛ, a Rafayɛl yɩkame n dʋ yĩngri.

²¹A Tobi rãmb sẽn doog b nenga, b pa le yãend a Rafayɛl ye.

²²B maana yɩɩla n pẽg Wẽnnaam. B pʋʋs-b-la barka bũmb ning fãa b sẽn maana yĩnga, b malɛk meng sẽn lik bãmba yĩnga!