Read SEBR SÕNGO, 1998 Tobi 13 Bible Online

Tobi 13 - SEBR SÕNGO, 1998 bible

Tobi 13

¹La a Tobi, yeelame:

²«Wẽnnaam sẽn pid ne vɩɩma paam pẽgre! B naam yɩ bark naam! Bãmb n sɩbgde la b kõt sugri. Tõnd sutame n tãag bʋg-tẽnga tɩ b le lɛɛg n bas-d tɩ d ruki. Ned ka be n tõe n põs-b ye.

³Yãmba, Israyɛl kamba, pẽg-y-ba, pẽg-y-b dũni rãmba taoore. Bãmb sʋk la b sẽeg yãmba.

⁴Bãmb n leb n wilgd yãmba b pãnga. Pẽg-y-ba neb fãa taoore, tɩ bãmb la tõnd Soaala. Bãmb la tõnd Wẽnnaam. Bãmb la tõnd Ba. Bãmb la Wẽnd yʋʋm tõt sɛɛbo.

⁵B sɩbgda yãmb, y yɛl kɛga yĩnga, la b na n zoe yãmb fãa nimbãanega. Yãmb sẽn sẽeg zĩis fãa, ad-y b na n leb n tigma yãmba, y sẽn be zĩig ning fãa.

⁶Yãmb sẽn na n lɛɛg n wa b nengẽ daare n lɛɛg n wa ne y sũur fãa la y yam fãa, n lɛɛg n wa ne pʋ-peelem bãmb taoore, b na le zĩnd ne yãmba, la b kõn solg yãmb b neng ye.

⁷Ges-y b sẽn maan yãmb neer to-to, la y pẽg-b tɩ sãde! Pẽg-y-b tɩ b ka mi bʋʋd kɛdb ye! Pẽg-y zamaan tõt sɛɛb dĩma!

⁸Sã n ya maam, m pẽgd-b-la m pa-weer tẽngẽ, m wilga m buuda kamba sẽn kẽ moogã tɩ bãmb n so pãng la ziiri. Yel-wẽn-maandba, leb-y n wa-y bãmb nengẽ, maan-y sẽn zemsd bãmb nifẽ, daare bãmb me na puk b nin n ges yã la b zoe-y nimbãanega.

⁹M sẽn tar y pẽgre la m sẽn tare, Soaala! M yĩngr dĩma pids-m-la ne sũ-noogo.

¹⁰Bɩ ãndũni rãmba fãa pẽg b pãng la b ziiri la b pẽg-ba n gilg Zerizalɛɛm! Zerizalɛɛm, Wẽnd tẽn-sõngo, f kamba beegre n wa ne f sɩbgre la b na n le wa tẽega nin-tɩrsa kamba yelle, b na n zoe bãmb nimbãanega.

¹¹Pẽg-y Wẽnnaam ne tig-raase, pẽg-y zamaan fãa Dĩma, sõng tɩ b rooga le me n me Zerizalɛɛm ne sũ-noogo,

¹²tɩ pa-wet sũuri yɩ noogo a pʋgẽ, tɩ nimbãan-dãmb yãend koglgo, zamaan woo zamaana!

¹³Vẽenem kãsenga na n vẽnega dũni fãa, neb sẽn yit tẽn-zãorgẽ neb sẽn ka tõe n sõde, neb sẽn yit dũni wã sɛtmẽ na n pidsa b nus ne kũuni n wa kõ yĩngri Dĩma. Sũ-noog kaasgo na n kaasa f pʋgẽ, Zerizalɛɛm, zamaan ne zamaana. Rʋmda na n paamame tɩ b tẽeg a yell daar fãa.

¹⁴Sẽn tʋʋsd-a Wẽnd tẽnga kõn paam bark ye, sẽn data n sãam fo yelle, n wã fo lalse, n lub f roto, n yõog f zagse, yẽ soab kõn paam bark ye! Neb niyns sẽn na n le yik f lalsa yaa bãmb n na paam barka!

¹⁵Fo na n kɩdmame, la fo na n nooga f sũuri nin-sõma kamb yĩnga, tɩ b na n tigm taab n pẽg Wẽnd, tɩ b naam ka be sɛɛb ye. Sẽn nong-a foo Zerizalɛɛm la sũ-noog soaba. Sũ-noog rãmba la sẽn tar-b laafi f pʋgẽ!

¹⁶Neb niyns sẽn na n kũm f nimbãanega, neb niyns sẽn na n yãb-foo, f pɛta pʋgẽ, bãmb dãmb n na n lɛɛg n yãend f sũ-moogo tɩ fo sũ-noogã ka na n zĩnd sɛɛb ye. N-ye! M pẽgda Soaala, Dĩm kãsengã.

¹⁷Zerizalɛɛm tẽng na n le meeme, b ro-sõnga na n mee yʋʋm tõt sɛɛb yĩnga. M sũur na yɩ noogo, m buuda sẽn kellã sã le yãend f ziirã n pẽg yĩngr Dĩma! B na n leb n mee Zerizalɛɛm lalsa ne kug kẽes yomm, n lɩʋʋs kẽeg la miuugu; lalsa fãa na n mee ne kug sẽn yãgd b toore, Gũudba rot sẽn lugã na n mee ne sãnem n me ne sãnem sẽn ka naag ne rẽok ye. B soya na n pama ne kug neeba; n pam ne kug miidu, ne Ofir kuga

¹⁸Zerizalɛɛm kʋɩlensa na n deegame n wãge ne lang-n-tuung yɩɩla. A zagsa fãa na n pʋda yɩɩle: ‹Alleluia! Israyɛl Wẽnda paam pẽgre!› La Wẽnnaam kamba na n pẽga b yʋʋr, Zamaan ne zamaana!»