Read SEBR SÕNGO, 1998 Tobi 14 Bible Online

Tobi 14 - SEBR SÕNGO, 1998 bible

Tobi 14

¹Woto la a Tobi baas a bark pʋʋsg yɩɩlle.

²A Tobi kii ne laafi a yʋʋm koabg la piig la a yiibu, la b mum-a-la ne waoogr, Niniv tẽnga. A sẽn wa n lebg zoanga, dẽ t'a yʋʋm da yaa pisoobe la a yi. A sẽn wa n paam laafi n sɛ, bũmb ka le paoog-a ye; a da maanda wẽn-kosgo, a da pẽgda Soaala Wẽnd la a waoogd-b wʋsg-wʋsgo.

³A kũum sẽn waa n kolge, a boola a biiga a Tobiyas n sagl-a: «M biiga, peeg f kamba

⁴n zoe n kẽng Mɛdi tɩ mam tẽedame tɩ goama na n taasame, Wẽnd gom niyns a Nawum sẽn da togs Niniv poorẽ, yɛl niyns fãa, Israyɛl bãngdba sẽn togs Asiri ne Niniv poorẽ, b goama fãa gilli na n taasame. Wakat sã n ta, dẽ fãa na n yɩɩme. Põasg bee Mɛdi n yɩɩd Asiri ne Babilon. Sã n ya maam, mam miime; m tẽedame tɩ bũmb ning fãa, Soaala Wẽnnaam sẽn yeela na n taasame, bãngdba sẽn togs goam niynsa fãa na n taasame. Tõnd doagdba sẽn be Israyɛl tẽnga, b na n sõd-b lame n tall-b n zãag ne b ba yiri. A Israyɛl tẽng fãa na n lebga zĩ-peelle. La Wẽnnaam doog na n dɩɩ bugum, la na n yɩɩ sũ-sãanga, dasem wʋsg sũ-sãanga.

⁵Dẽ poore Wẽnnaam na n le zoe b nimbãanega, n leb n tall-ba n wa Israyɛl tẽnga. B na leb n mee Wẽnnaam doogo, la a neer ka na n ta pĩnd soaba ye, n na n gũ tɩ wakat ta. Neb fãa sã n wa yi yembdẽ n leb n wa, b na n le maneg n me Zerizalɛɛm t'a yɩ neer al wʋsg-wʋsgo, la b na le maneg wẽnd doog beene wala bãngdbã sẽn da pĩnd n togsã.

⁶La dũni rãmba fãa na n tũu Wẽnde, la b na n zoe Wẽnd dabeem ne sɩda. B fãa na n basa b zirẽ-wẽn-naandsã sẽn da kẽes bãmb tudgri pʋgẽ.

⁷B na pẽga Wẽnd sɩda daar fãa, wala sẽn segde. Israyɛl dãmba sẽn põs-b wakat kãnga na n tẽega Wẽnnaam yelle ne b sũur fã. B na n wa tigma taab Zerizalɛɛm, la badaar tɛka, b na n zĩnda a Abraam tẽngẽ ne laafi, la tẽnga na n lebga bãmb soolem. La neb niyns sẽn maand-b yel-wẽnã la yɛl kɛg fãa na n menemame.

⁸Marsã, m kamba, ad m saglgo: tũ-y Wẽnnaam ne pʋ-peelem la maan-y bũmb ning fãa sẽn tat b yam. Wilg-y yãmb menga kamba tɩ b modge n maan sẽn zemse, n maan wẽn-kosgo. B modg n tẽeg Soaala yelle, n pẽg b yʋʋra ne pʋ-peelem la ne b pãng tɛka.

⁹Sã n ya foom, m biiga, yi Niniv, da pa ka ye. Fo sã n wa mum f ma n yeglg maam, da gãand be n vẽeg beoog ye. Wala m sẽn ne wã tẽnga pida ne wẽnem. Tʋʋm yood tʋmda a pʋgẽ la b yãnd ka tar ned ba a ye ye.

¹⁰Tags n gese, m biiga, ges a Nadab sẽn maan a soaba ne a ba-wubdga, a Ayikar. B mum-a-la vɩɩga. La Wẽnnaam kɩtame tɩ nin-wẽnga yao a wẽnem, a sẽn nams a soaba taoore. A Ayikar leb n waa vẽenemẽ, la a Nadab kẽe lik sẽn kõn sɛ pʋgẽ. Dẽ n yɩ a sɩbgre, a sẽn da rat a Ayikar ne wẽng ninga sɩbgre. A sẽn da maand wẽn-kosga yĩnga, a Ayikar põsa bẽdgã a Nadab sẽn da bẽd-a. A Nadab n lɛɛg n lʋɩ a a meng loangẽ la a ka põs ye.

¹¹Woto wã, yãmb neeme m kamba, wẽn-kosg sẽn wat ne bumb ninga, la tʋʋm-wẽns me sẽn wat ne a soaba. A wata ne kũum bala. La ade, m kamba, m pãng sɛɛme.» B gãneg a Tobi a gãag zugu, la a kiime la b mum-a-la ne waoogre.

¹²A Anna sẽn waa n ki, a Tobiyas mum-a lame n yeglg a Tobi. Dẽ poore, a Tobiyas peega a paga ne a kamba n kẽng Mɛdi. A tɩ kẽe Ekbatan, a rɛɛmba a Raguwɛl yiri.

¹³A zã-la a reem dãmba neere, b kʋʋlem wakato. La b sẽn waa n ki, a mum-b-la Ekbatan, Mɛdi tẽnga. A Tobiyas n soog a rɛɛmba a Raguwɛl sẽn bas fãa, wala a sẽn soog a ba Tobi me sẽn base.

¹⁴A Tobiyas vɩɩma yɩɩ waoor vɩɩm. A paama yʋʋm koabga la piig la a yopoe.

¹⁵A Tobiyas wʋmame tɩ Niniv wãame n yaool n ki. A tol n yãenda b sẽn tong n kẽesd Mɛdi tẽnga pa-wet sẽn yi Niniv. Mɛdi dĩm, a Siyaksar n tɩ tall-b Niniv n wa. A Tobiyas pẽga Wẽnnaam, b sẽn sɩbg Niniv la Asiri dãmba. A nooga a sũuri ne yɛla sẽn pak Niniv. A sẽn wa n na n ki, a yeelame tɩ Soaala-Wẽnnaam paam barka zamaan ne zamaan! Amina!