Read SEBR SÕNGO, 1998 Tobi 2 Bible Online

Tobi 2 - SEBR SÕNGO, 1998 bible

Tobi 2

¹A Asaradõ naama wakato, m leba m yiri, maam ne m pag a Ana la m biiga a Tobiyas. Tõnd tigsgu kibs daare, pak poor dasem pis-nu kibsã, b maana dɩ-noodo, mam zĩnda dɩɩba zĩigẽ,

²la b talla rɩ-nood wʋsgo n wa kõ-ma. Mam yeela m biiga a Tobiyas: «Kẽng n tɩ bao m ba rãmba sʋka, b sẽn tall n kẽng yembd Niniv, kẽng n tɩ bao nimbãan-ned a yembre, ned sũur sẽn ya tɩrga, n tall a n wa t'a naag maam n dɩ. M na n yaasame n gũ f lebgre.»

³A Tobiyas kẽngame n na n tɩ bao naong soabã, b ba rãmba sʋka, la a lebgame n watẽ la boondẽ: «M ba!» T'a ba leoke: «Yaa wãna m biiga?» T'a yeele: «Tõnd ned a yembre la b kʋ yã, b luul-a lame n yaool n dɩk-a n na tɩ lob daaga sẽnẽ, la a ket n bee be.»

⁴Mam sẽn wʋm woto, vugri bala mam yikame n tɩ tall kũuma n wa ning roogẽ n na n gũ tɩ zĩig sobg tɩ m tɩ mum-a.

⁵Dẽ poore mam tɩ soo koom n yaool n baas m rɩɩbã ne sũ-sãanga.

⁶M da tẽega bãngd a Amos goama, Betɛl: «Yãmb kibs rãmba na n tekame n lebg sũ-sãanga, tɩ yãmb yɩɩl lebg kũmkũma!»

⁷Mam kũmame, la wĩndg sẽn waa n lʋɩ, mam kẽngame n tɩ tuk yaoog n mum nedã.

⁸Mam yags da laadame n yetẽ: «Wao! A ka le zoet rabeem ye, b yaool n baoodame n na n fiuug a zugu. Pipi, a zoeeme n põse, la ad a sẽn leb n sɩng n mumd kũum yɛsa.»

⁹Badaar zaabre mam sẽn so koom n sɛ, mam gãanda zaka lalg sɛɛga. Tʋʋlga sẽn da be yĩnga, mam da ka pil m neng ye.

¹⁰Mam da ka mi tɩ lalga zugu, luiili n da be be ye. A ye bĩnd lʋɩ-la m nifẽ tɩ lebg bãaga, tɩ mam kẽng tɩɩm dãmb nengẽ n tɩ tɩbse. B talla b tɩ-kaama ningri, tɩ m nin-biiga tar pelgre tɩ m wa tol n lebg zoang zãng-zãnga. Mam paa ne zondo yʋʋm a naase. Mam saam-biisa fãa sũur da sãama wʋsgo. A Ayikar gesa mam yelle yʋʋm a yiibu n yaool n loog Elimayis.

¹¹Wakat kãnga, mam pag a Anna tɩ kẽe tʋʋmd doogẽ. A da wʋgda sʋndo.

¹²B da mi n bolg-a lame t'a wʋge tɩ b yaood b sẽn da tog n yao-a. La ade, kiuug a ye, kiuug daar a yopoe soabã, a wʋga fuug a yembre n tɩ kɩs b rãmba; b yao-a lame, n le kõ-a bull n paase t'a tɩ maan dɩɩbo.

¹³Bulla kẽe zakẽ n kolgd maam n sɩng yãbre, tɩ mam bool m pagã n sok-a: «Bull kãngã, yita yɛ? Sãnd ka wagdem bulla? Pĩnd n kẽng n tɩ lebs-a b rãmba. Tõnd ka tar sore n dɩ wagdem bũmb ye.»

¹⁴Tɩ paga yeel maam: «Yaa kũun la b kõ maam n paase.» Mam ka tẽ a goama ye, la mam yeel-a lame t'a pĩnd n tɩ lebs-a a soaala. Bulla kɩtame tɩ m sũura fõt ne m paga. Dẽ me la paga leok maam yãas-yãasa: «Fo wẽn-kosga bee yɛ? Fo tʋʋm-sõma wã bee yɛ? D fãa nee f sẽn dɩ yõod ninga.»