Read SEBR SÕNGO, 1998 Tobi 3 Bible Online

Tobi 3 - SEBR SÕNGO, 1998 bible

Tobi 3

¹Mam sũur da sãama al wʋsg-wʋsgo, tɩ m da wẽed siri la m tar yãbre, la mam sɩnga pʋʋsgo ne kũsga n yetẽ:

²«Soaala, yãmb yaa zemsgo soaba, la yãmb tʋʋma fãa yaa sõma, yãmb soya fãa yaa sɩd soya, la nimbãan-zoeer soya, la yãmb la dũni bʋ-kaooda,

³Marsã, m Soaala, m kot-y lame, tɩ y tẽeg m yelle, ges-y m yelle. Da sɩbg-y maam m yel-wẽna ne m yaab rãmba yel-wẽna yĩng ye.

⁴Tõnd beega yãmba ne d yel-wẽnã la d ka reeg yãmb noya ye. Yãmb kɩtame tɩ neb fãa fãad tõndo, n tar tõnd n kẽnd yembdo, la b kʋʋd tõndo; tõnd sẽn da be zĩig ning fãa neb da laada tõndo n tar tõnd yaalgo.

⁵Y bʋʋda fãa tũuda sɩda; kɩɩsg ka tɩ maam ne m ba rãmba toga ne sɩbgre ye.

⁶Marsã, maan-y ne maam wala y sẽn date, yãk-y mam vɩɩm, mam datame n legb tom wala pĩnda. Mam kũum são n vɩɩm. B rɩta beem ne maam zaalem bala, tɩ m sũ-sãanga tar paasga n dabda. Soaala, m gũudame tɩ y sak tɩ m yi namsga pʋgẽ. Bas-y maam tɩ m kẽng vɩɩm sẽn kõn sɛ pʋgẽ, la y ra wẽnemd y kãar n tees-m ye; m sẽn kiid n são m sẽn na n zĩ ne sũ-sãang a woto m vɩɩma tõre, tɩ neb le be tẽngre n paoogd-m.»

⁷Baraar me segame tɩ Mɛdi Ekbatan tẽng bi-pugla a Sara, a Raguwɛl biiga, paama yaoolgo a ba wã zakẽ. Yaa bi-pugl a ye n paoog-a.

⁸Bũmb ninga sẽn be tɩ d tog n bãnge, yaa tɩ b da rɩka a Sara n kõ sɩd naoor a yopoe la naoor a yopoe wã Sʋtãan, a Asmode, kʋʋ dapã, a yembr-yembre t'a b nan pa lagem ne-ba wala kãadma sẽn kõt sor ninga ye. Dɩlla zaka bi-pugl a ye ra yaand-a lame n yetẽ: «Sara, ad yaa foom n kʋʋd f sɩdb rãmba, b rɩka foom n kõ al neb a yopoe la fo kʋ-b-la fãa gilli, f pa kees b yʋʋr meng n boonnẽ ye.

⁹Ka fo sɩdb rãmba sẽn ki wã yĩnga, la fo na n tar tõnd namsdẽ ye? Fo sa n dat bɩ f babs-b bʋg-tẽnga tɩ ned da tol n yãend-f ne biig ye, bi-ribl bɩ bi-pugl ye!»

¹⁰Baraare, a Sara sũur sãama al wʋsgo, t'a tar yãbre bala, a rʋ-la a ba yĩngr roogã n da rat n luul a menga. La a tagsa a sũurẽ n yeele: «Mam sẽn na n maan woto tɩ b wẽneg n sãbs m ba, n paoog m ba, n yetẽ: ‹Fo da tara bi-pugl yend bala, n nong-a wʋsg-wʋsgo, la kato, a luula a menga a sũ-beeda pʋgẽ.› M sã n luuli, yɩta maam n tus n lub bʋg-tẽnga m ba sẽn kʋʋle la sẽn pid ne sũ-sãanga. Mam sẽn ka luund m meng n são; mam na n kosa Soaala-Wẽnd bala tɩ b reeg-ma tɩ m da le wʋm tɩ b tʋʋd-ma m vɩɩma pʋgẽ ye.»

¹¹A Sara tẽega a nusi, a teesa doogã võore n pʋʋs woto: «Wẽnnaam nimbãan-zoeer soaba, yãmb paam barka, yãmb yʋʋr paam pẽgre daar buud fãa, tɩ y tʋʋma fãa wa ne yãmb pẽgr vɩɩm sẽn kõn sɛ yĩnga.

¹²Marsã mam zẽka m nenga la m dooga m nini n get yãmba.

¹³Bas-y maam tɩ m kɩ n da leb n wʋm neba tʋʋr ye.

¹⁴M Soaala, yãmb mi tɩ m talla m meng neere. M ka bãng raoa ba a yembre.

¹⁵Mam sẽn wa n be yembdẽ, mam ka sãam m yʋʋr bɩ m ba rẽnd ye. Mam ya-la m ba bi-yende, a ka tar biig sẽn na n deeg yẽ raboog ye, a ka tar yao ye, a ka tar doagda sẽn na n yɩ m sɩd ye. Mam sɩdb rãmb a yope kiime, mam vɩɩm võor bɛɛ? Zoe-y m nimbãanega, y sã dat, bɩ y bas tɩ m ki, m ka rat n wʋm tɩ b tʋʋs-m yɛs ye.»

¹⁶Soaala deega neb a yiiba fãa pʋʋsgo.

¹⁷Sɩda, b pʋʋsga poore, Wẽnnaam yiisa malɛk a Rafayɛl t'a na n wa sãoog bãmb b yiiba fãa. Yẽ la b tʋm yã t'a tɩ yiis dẽgdã sẽn da be a Tobi nini t'a tõog n yãend wĩntoog vẽenem. Yẽ me la b tʋm yã t'a tɩ sõng t'a Raguwɛl biig, a Sara, lebg a Tobiyas paga, la a naag n fãag a Sara Sʋtãan, a Asmode, nugẽ. Pʋg-belemdba sʋka, a Tobiyas, a Tobi biigã, n da tog n paam a Sara n maan a paga. Bãng-y tɩ yaa a Tobi sẽn waa n pʋʋs n sɛ n kẽed a roogẽ, yɩɩ wakat kãng me la a Sara pʋʋs n sɛ, n sigda. A Raguwɛl biiga, a Sara da bee Ekbatan tẽnga, la a da rʋʋ a yĩngr doogo, n pʋʋsdẽ.