Read SEBR SÕNGO, 1998 Tobi 4 Bible Online

Tobi 4 - SEBR SÕNGO, 1998 bible

Tobi 4

¹Badaare a Tobi tagsa ligdã yelle, ligd ning yẽ sẽn da kɩs a Gabayɛl, Raguwɛs tẽng neda, t a bĩngã.

²La a yeela a sũurẽ: «Mam boonda kũum, la m togame n pĩnd n bool m biiga a Tobiyas, n gom-a ligda yelle n yaool n ki.»

³A bool a biigã, a yeel-a lame: «M sã n wa ki, sõng tɩ b mum-m neere, waoog f ma neere, tall-a neere a vɩɩma fãa pʋgẽ, maan a yam, la f da sak tɩ bũmb sãam a sũur ye.

⁴Tags namsd niyns fãa a sẽn nams fo yĩnga, a sẽn wa n tar f pʋgã wakato. A sã n wa ki, bɩ f mum-a n yeglg maam, yaoog a ye pʋgẽ.

⁵M biiga, f vɩɩm fãa pʋgẽ, bɩ f tũ Soaala Wẽnd ne f sũur fãa da saag n tʋlg yel-wẽnd maaneg ye, da sak n tũ so-wẽng ye.

⁶Fo sã n tũud sɩd sore, fo tʋʋm fãa na n zĩnda yõodo, wala neb niyns fãa sẽn maand bũmb fãa ne zemsgo.

⁷Yãk f paoong n maan wẽn-kosg, naong rãmb yĩnga, tɩ Wẽnnaam na kelg f yelle.

⁸Fo sã n tar wʋsgo, bɩ f maan wẽn kosg-wʋsgo, fo sã n tar bilfu bɩ f maan wẽn-kosg bilfu, maan wẽn-kosgo n zems f pãnga.

⁹Fo sã n maan woto, fo bĩngda arzɛk beoog yĩnga.

¹⁰Sẽn yolsda naong rãmba põsda kũum la lika zĩiga.

¹¹Wẽn-kosgo yaa kũun sẽn tar yõod al wʋsgo, b sã n maand-a Yĩngri soaba yĩnga.

¹²M biiga, gũus f meng ne tʋʋm-yood buud fãa, tũus paga f buuda sʋka; da bao paga sẽn ka tõnd buud ned ye, tɩ tõnd yaa bãngdb kamba. Tẽeg d yaab rãmba a Nowe, a Abraam, a Izaak la a Zakoob yelle. B fãa bao b buudẽ paga n kẽ kãadem, b roka b kamb yõodo la b sooga dũniya.

¹³M biiga, nong f buud rãmba, da sãbs-b ye, b kom-dibli ne b kom-pugli fãa. Tũus f paga buuda sʋka. Wilg-m-menga wata ne sãoong la yɩɩr wʋsgo; kʋɩɩm wata ne naongo la kom, la kom ma yaa kʋɩɩm.

¹⁴F tʋʋm-tʋmdb sã n tʋme, pẽdg n yao-ba la f da bas tɩ beoog vẽeg ye. Fo sã n tʋmd Wẽnd tʋʋma, Wẽnd n na n yao foom. Gũus f meng neere f tʋʋm fãa pʋgẽ, la f tall f meng neer daar fãa.

¹⁵Fo sẽn ka rat tɩ f to maan foom bũmb ningã, bɩ f ra maan f to me rẽ ye. Da yũ rãam n gãeem ye, da rɩk yoobo tɩ lebg f tʋʋmd ye.

¹⁶Kom sẽn tar a soaba, bɩ f kõ-a rɩɩb t'a rɩ; sẽn kẽnd-b zaala, bɩ f kõ-b fuugu. Bũmb ning fãa f sẽn tar tɩ ya wʋsgo, yãk n man wẽn-kosgo. Kõ la f ra zoe bõne ye.

¹⁷Wa ne rɩɩbo n kõ sẽn yãbd-b nin-sõng kaalem. Da maan bũmbu sã n ya nin-wẽns kʋʋr la b yãbd ye.

¹⁸Kelg nin-sõma saglgo, da sãbs sagl-sõng buud fãa ye.

¹⁹Wakat buud fãa, waoog Wẽnnaam, f Soaala, kos-ba tɩ b gũ-fo, f manesem fãa pʋgẽ, tɩ fo sẽn na n maan bũmb ning fãa, taas neere. Ka dũni fãa neba n tar sagl-sõma ye, yaa Soaala, n sõngd-ba tɩ b tʋlg neer maanego. Bãmb n tõe n maan bũmb ning fãa, b sẽn date. M biiga, tẽeg Wẽnnaam noya fãa yelle, bĩng-b neere f sũurẽ n da bas ba a ye.

²⁰M biiga, m wilgda foom tɩ f bãng tiiri tɩ mam kɩsa m ligdi waas piiga, a Gabayɛl, a Gabri biiga sẽn be Raguwɛs, Mɛdi, t'a bĩng-ma.

²¹M biiga, tõnd sẽn lebg naong rãmba, da zoe rabeem ye. Fo sã n zoe Wẽnnaam nifu, fo sã n basd yel-wẽnd buud fãa maanego, la fo sã n maan sẽn tat Wẽnnaam yam, f Soaala, yam, dẽ la fo arzɛka.»