Read SEBR SÕNGO, 1998 Tobi 5 Bible Online

Tobi 5 - SEBR SÕNGO, 1998 bible

Tobi 5

¹A Tobiyas leoka a ba a Tobi: «M baaba, yãmb sẽn yeel maam tɩ m maan bũmb ning fãa m na n maaname.

²La bũmb a ye n be, mam na n yɩɩ wãna n deeg samnã? Ligda sẽn be a soab nugẽ wã ka mi maam la mam me ka mi-a ye. Mam na n kõ-a-la makr bʋgo t'a tõog n tẽ maam, la a kɩs maam ligdã? Dẽ pʋgẽ me, mam ka mi sor ninga sẽn na n tũ n kẽng Mɛdi ye.»

³A Tobi yeela a biiga, a Tobiyas: «Tõnd dɩka sebr a yembre n gʋls d yʋya be la mam kẽega sebrã pʋɩ-sʋka, tɩ ned kam fãa tall bogr a yembre. Mam talla sebr a yembre n dɩk a to wã n naag ne ligdã. Yaa yʋʋm pisi dõanna, la mam kis ligdã tɩ b bĩng-ma.

⁴M biiga, bao nin-tɩrga t'a yãag-f n kẽnge, d na yao-a. Kẽng n tɩ reeg ligdã a Gabayɛl nengẽ.» A Tobiyas yiime n na n bao nin-tɩrga sẽn na n yãag-a t'a kẽng Mɛdi. A yãee a Rafayɛl sẽn yɛs yẽ taoore, la yẽ da ka mi tɩ yaa Wẽnnaam malɛk ye.

⁵A Tobiyas sok-a lame: «M zoa, fo yita yɛ?» Tɩ malɛka leoke: «Mam yaa fo buud a Israyɛl ned a yembre, mam waa ka n na n bao tʋʋmde.» T'a Tobiyas sok-a: «Fo mii sore sẽn dabd Mɛdi bi?» T'a leoke: «M mi sẽ, mam kẽnga be naoor wʋsgo.

⁶Mam mii soy niyns fãa sẽn dabd be sõma. Mam sã n mii n kẽng be, mam sigda tõnd ned a yembre yiri sẽn be Raguwɛs, Mɛdi tẽnga, sã n yi Ekbatan n dabd Raguwɛs, yaa dasma a yiib kẽnde, Raguwɛs bee tãng zugu, la Ekbatan bee zĩ-pɛɛlẽ.»

⁷A Tobiyas yeelame: «Yaas n gũ-ma, m zoa, tɩ m deng n kẽng n tɩ wilg m ba, mam datame tɩ fo wa yãag-ma; m na n yao-f lame.»

⁸T'a Rafayɛl leoke: «Be neere, kẽng la f da kaoos ye.»

⁹A Tobiyas kẽng n tɩ wilga a ba, tɩ yẽ yãee tẽngen-ned a yembre. La a Tobiyas baaba yeelame: «Bool-a ta wa tɩ m bãng a sẽn be buud ninga sakẽ, m biiga, d tog n bãngame d sã n tõe n pelga d pʋg ne-a.» A Tobiyas yiime n tɩ yeel-a: «M zoa, m baaba tɩ y wa zakẽ.»

¹⁰Malɛka kẽe zakẽ. A Tobiyas ba, a Tobi, deng n pʋʋs-a lame, la malɛkã reegame la a kãab-a kãab-sõma. A Tobi yeelame: «Mam leb n tõe n paama sũ-noog bi? Mam yaa zoanga, mam ka ne fɩ, mam bee lik pʋgẽ, mam wẽnda neb sẽn ki n ka leb n ne vẽenem yɛs ye. Mam wẽnda nin-vɩɩga b sẽn mumi, mam wʋmda neb koeese, n yaool n ka tõe n yãe b rãmb ye.» Malɛkã leokame: «Dɩk f meng n kɩs Wẽnde, tɩ b ka na n kaoos n puk f nina ye. Da zoe rabeem ye.» La a Tobi yeel-a lame: «Mam biiga datame n kẽng Mɛdi. Fo rat n yãag-a lame t'a kẽng bɩ? M ned sõngo, m na n yao-f lame.» T'a leoke: «M dat n yãag-a lame, mam mii soy niyns fãa sẽn dabd be, mam kẽnga be naoor wʋsgo, mam pɩʋʋga tãmsã ne zĩ-pɛɛla fãa, m kẽnda be, sor ka be tɩ mam ka mi-a ye.»

¹¹T'a Tobi yeele: «M zoa, m dat n bãnga neere f yʋʋre n paas fo sẽn ya a soab biiga. M kos tɩ f wilg-ma.»

¹²T a leoke: «Fo rat n bãnga rẽ n maan bõe?» T'a Tobi yeele: «Mam dat n bãnga neere fo yʋʋre n paas fo sẽn ya a soab biiga! M dat n bãngame.» Ad a sẽn leoke:

¹³«Mam yʋʋr la a Azariyas, a Ananias kãsenga biiga la f ba-biiga.»

¹⁴A Tobi yeelame: «Yɛɛla m ned sõngo! M sũur yaa noogo ne fo waoongã! Da puug f sũuri mam sẽn tʋlg n bãng fo buuda ye, m bãnga marsã tɩ foom ne maam yaa buud a yembre meng menga. Mam mi-la a Ananias ne a Natã, a Semeliyas kãsenga kamb a yiibã. B da mii n tũuda taab n kẽnd Zerizalɛɛm, n waoogd Soaala Wẽnnaam, b da ya sõma, b da tũuda so-tɩrg daar fãa. Fo buuda neb yaa nin-tɩrse, fo buudã yẽgre yaa yẽgr sõngo, yɛɛl yɛsa!»

¹⁵A le paasame: «Daar a yembre fãa m na n kõo foom sẽn dɩkda yaood sẽn tog n deeg beoog sẽn vẽege. M na n talla foom wala m sẽn tar m biiga. Yãag m biiga la m na n paas-f yaoodo n yɩɩg tõnd sẽn sed ne taabã.»

¹⁶La Malɛka leokame: «Da zoe rabeem ye, m na n yãaga f biigã. Tõnd kẽnd na n yɩɩ sõma, la d lebgre me na n yɩɩ boto, yell kõn zĩnd ye.»

¹⁷A Tobi yeel-a lame: «Wẽnd na ning f barka!» La a yeela a biigã: «M biiga, segl bũmb fãa sorã togb yĩnga, n tũ f tũud-n-taagã n looge, Wẽnd na gũ yãmba, n taas-y ne laafi, la b lebg n wa ne y laafi! Wẽnnaam malɛkã na yãag yãmba, m biiga!» A Tobiyas sẽn segl n sɛ, a tɩ pʋʋsa a ba ne a ma Wẽnd na n taas, t'a Tobi yeel-a: «Wẽnd na taase!»

¹⁸A ma yãbame la a yeela a sɩda: «Yaa bõe yĩnga tɩ fo yet tɩ biigã tog sore? Yaa yẽ bal la tõnd teeg yã, yẽ la tõnd kʋʋlem dasaare!

¹⁹M tẽed tɩ b ka tõe n dɩk ligdi n mak ne biig ye, biig yɩɩda fãa.

²⁰Wẽnd sẽn da kɩt tɩ tõnd vɩ to-to wã, sekame.»

²¹A Tobi yeel-a lame: «Da bʋ ye, tõnd biigã na n kẽnga ne laafi n leb n wa yir ne laafi. A sẽn na n lebg n wa daare, fo na mik tɩ bũmb ka maan-a ye.

²²Da maan dabeem bãmb b yiiba poorẽ ye, m pʋg-sõngo. Malɛk gũud sõngo n na n yãag-ba.

²³Bũmb kõn maan b sor zug ye, tɩ b lebg n wa ne laafi.» Paga basa yãbre.