Read SEBR SÕNGO, 1998 Tobi 6 Bible Online

Tobi 6 - SEBR SÕNGO, 1998 bible

Tobi 6

¹Biiga tũu malɛkã n looge la baag n da pʋgd b poorẽ.

²Zaabr sẽn waa n ta, b yaasa kʋɩlg a yembre noorẽ sẽn boond tɩ Tigr, n na n vʋʋse.

³Biiga kẽe koomẽ wã n na n waas a nao. Kʋɩl-zẽ-kãseng a yembre n puk kooma zugu, kellẽ la bilf bala t'a gãd biiga naoore.

⁴Biiga kelmame, tɩ malɛka yeel-a: «Yõk kʋɩl-zẽoogã la f da bas-a ye!» Biiga tõog n yõka kʋɩl-zẽoogã n vuug-a n yi kʋɩl-kogrẽ.

⁵Malɛkã yeel-a lame: «Wedg-a n yãk a yama, ne a sũurã la a sãoorã, bĩng-b neere da lob a pʋga teedã: yama la sũurã la a sãoorã ye. Yaa tɩ-noodo.»

⁶A Tobiyas wedga zĩifã n yãk a yama, a sũurã la a sãoorã. A wãaga zĩifã bilfu n na n kɩɩme la b kell n ning yamsem n bĩng. Dẽ poore bãmb b yiib fãa tũu taaba n kẽng Mɛdi.

⁷Bi-ribla soka malɛkã: «M zoa, Azariyas, bõe tɩɩm n be zĩif sũurẽ ne a yamẽ la a sãoorẽ?»

⁸T'a leoke: «Dɩkda sũurã ne sãoorã n yõog bugum, a bug-zõosã sãoogda dapa bɩ pagb niynsi, Sʋtãana bɩ nin-wẽns sẽn namsde: bãag ning fãa sẽn tar-ba sãoogda zãng soey!

⁹Sã n yaa yama, b tara yẽ n maand nin-tɩɩm. Wala ned nin sẽn mii n zabdẽ tɩ bõn-yood be be n ya pɛɛl-pɛɛlã, sã n dik yẽ n fʋʋs ninã, nina maagdame.»

¹⁰B sẽn ta Mɛdi, b kẽnga Ekbatan, t'a Rafayɛl yeel daoã: «M zoa a Tobiyas!»

¹¹T a leoke: «Yaa wãna?» Tɩ malɛkã yeele: «Zaabrã tõnd na n siga a Raguwɛl yiri, ya fo roagda, la a tara bi-pugla sẽn boond t'a Sara,

¹²sã n ka a Sara bala, a ka tar biig a to ye, fo sẽn yaa a roagd meng mengã, foom n tar tõog n bao-a, la foom n na n wa soog a ba raboogo. A yaa bi-pugla sẽn tar a meng neere, a ka zoet tʋʋmd ye, a yaa sõngo, la a ba yaa nin-sõngo.»

¹³A tol n paasame: «Fo tõe n bao-a lame n maan f paga. Kelge, m yao sõngo, zaabrã m na n goma f ba biiga yelle, n paam t'a lebg f pʋg-bila. D sã n yi Raguwɛs n wa, d na maana yikãadma. Mam mii neere t'a Raguwɛl ka tar sore n mong-a foom ye, a ka tar sor n dɩk-a n kõ ned a to ye. A sã n ka rɩk-a n kõ-fo, a na pak kũum sore n kõ a menga wala sẽn gʋls a Moyiiz sebrẽ, a sã n bãng n sɛ tɩ yaa foo n tog pipi n yɩ a biiga sɩda. Woto wã, kelge, m yao sõngo, zaabra bala, d na n goma bi-pugla yelle, n kos t'a wa lebg f paga. D sã n yi Raguwɛs n wa, d na reeg-a n wa kẽes f zakẽ.»

¹⁴A Tobiyas yeela a Rafayɛl: «M Zoa a Azariyas, mam wʋmame tɩ b gomd t'a zoe n paama sɩdba a yopoe, la a yopoe wã fãa kii yikãadem kibs roogẽ, yʋng ninga a sɩda sẽn da tog n kẽ a roogẽ wã, la mam wʋmame me tɩ b gomd tɩ yaa Sʋtãan n kʋʋd-ba.

¹⁵Dẽ n kɩt tɩ rabeem tar maam bilfu, Sʋtãana ka maan pagã bũmb ye, a sẽn nong a wã yĩnga, la sẽn maka n na n kolg pagã, Sʋtãana kʋʋd-a lame, mam ya-la m ba bi-yende, la mam ka rat n ki boto ye, mam ka rata tɩ m ba ne m ma paam sũ-sãang mam poorẽ, b vɩɩm pʋgẽ n ta b kũum ye; b ka tar biig a to sẽn na n wa mum-b ye.»

¹⁶Tɩ malɛka yeel-a: «Fo yĩma f baaba sẽn sagl foom bũmb ningã laa? B yeela foom tɩ f rɩk paga f buuda sʋka. M zoa, bas Sʋtãan dabeem la f rɩk-a. Mam yetame tɩ yʋn-kãnga bala, b na n dik-a lame n kõ foom tɩ f naam f paga.

¹⁷La m na n wilga foom bũmb a yembre: fo sã n wa kẽ roogẽ wã, dɩk zĩifã sãoorã ne a sũurã n ning bug-saal zugu, tɩdara laagẽ.

¹⁸Yũuga na n wulumda roogã, Sʋtãan sã n wʋm yũugã a na n zoeeme, la a kõn le saag n kolg bi-pugla ye. Wakat ninga yãmb sẽn wat n dat n kolg taaba, deng-y n yik n n maan pʋʋsgo. Pʋʋs-y yĩngri Soaala, tɩ b kõ yãmb b kũuna, la b gũ-y neere. Da zoe-y rabeem ye, yaa fo pʋlemd al sɩngrẽ, tall-a neere. A na n tũu foom, la mam yeta foom, sɩd sɩda, t'a na n doga fo kamba, da sãmb ye.»

¹⁹A Tobiyas sẽn wʋm a Rafayɛl goama, la a sẽn bãnge t'a Sara ya yẽ tão, a baaba buudẽ neda, a nong-a-la al wʋsgo, a nonglmã kẽ-la a sũur zãnga.