Read SEBR SÕNGO, 1998 Tobi 7 Bible Online

Tobi 7 - SEBR SÕNGO, 1998 bible

Tobi 7

¹B sẽn wa n ta Ekbatan, a Tobiyas yeela a Azariyas: «Kell n tall-m n ta a Raguwɛl nengẽ tɩrga!» A sɩd tall-a lame n ta a Raguwɛl nengẽ. B sẽn ta b yãee a Raguwɛl t'a zĩ a zak noorẽ; bãmb pʋʋs-a lame t'a leok-ba: «Mam me pʋʋsda yãmba, yãmb sẽn ta ka wã, yãmb be-la y yiri.» A peeg-b lame n kẽes zakẽ.

²A Raguwɛl yeela a paga a Edna: «Bi-kãnga wẽnda d doagda a Tobi.»

³A Edna soka bãmba: «Yãmb yita yɛ?» Tɩ b leok-a: «Tõnd yaa Neftali kamb niyns b sẽn tall n kẽng yembdo al Niniv.

⁴Yãmb mi tõnd doagda a Tobi bɩ?» Tɩ b leok tɩ b mi-a lame. T'a le soke: «A bee laafi?»

⁵Tɩ b leok: «Yell buud ka ye, a vɩɩ ne laafi.» A Tobiyas yeel-b lame: «Yaa mam ba.»

⁶Vugri bala a Raguwɛl tik n yikame n mobg-a la a yãbda.

⁷A Raguwɛl yeela a Tobiyas: «Wẽnd na ning f barka, m biiga! F ba yaa nin-sõng menga. Kato! Nin-tɩrg a woto sẽn baood neb ne neere sẽn lebg zoanga!» La a leb n yãbame.

⁸A Paga a Edna me yãbame, n paas b biiga, a Sara.

⁹A Raguwɛl kɩtame tɩ b kʋ pesgo n maan-b sãando. B sẽn wa n so koom n sɛ, b kẽe rɩɩb roogẽ. A Tobiyas yeela a Rafayɛl: «M zoa a Azariyas, mam datẽ lame tɩ fo kos a Raguwɛl a bi-pugla a Sara sẽn yaa mam tão wã n kõ maam.»

¹⁰A Raguwɛl wʋma b goama n yeel a Tobiyas: «Dɩ la f da maan yɩɩr zaabra ye tɩ ned ka be sẽn na n paam mam biiga, a Sara, sã n ka foom bala. Mam ka tõe n dɩk-a n kõ ned a to ye sã n ka foom bal sẽn ya a roagda. Marsã, m biiga, m na n goma ne foom vẽenega.

¹¹Mam maka naoor a yopoe n kõ a sɩda, sɩd sẽn ya tõnd buuda neda, la b yikãadem daare, b fãa kiime, wakat ninga b sẽn kẽ roogẽ ne-a. Sã n yaa foom, fo we n dɩ la f yũ tɩ Soaala na ning y barka, la b kõ-y laafi.»

¹²Dẽ la a Tobiyas yeel yã: «Mam sã n ka paam leokre biiga poorẽ, mam ka na n dɩ la m yũ ye.» T'a Raguwɛl leoke: «Be neere, a Moyiiz noorã pʋgẽ, m biigã yaa foom n na n soog-a. Yaa Soaala-Wẽnd n yet tɩ b kõ-a foom. Rẽ yĩnga mam rɩkda f tão n kõt foom. Dũnna tɛka, fo yaa mam yao la yẽ yaa fo tão, a lebga fo soolem. M biiga, Yĩngri Soaala na n gũu yãmb yʋngã neere. B na n kõ yãmb kũuna la laafi.»

¹³A Raguwɛl bool a biiga a Sara n gãd a nugã n kɩs-a a Tobiyas n yeele: «Mam kõt-a-la foom n na n tũ a Moyiiz sẽn gʋls bũmb ninga, a sebra pʋga; a yaa fo paga. Peeg-a, tall-a n kul f ba-yiri tɩ yell buud ka ye. Wẽnd na sõnge tɩ y ta yir ne laafi!»

¹⁴A Raguwɛl boola a Sara ma n yeel-a t'a wa ne bũmb t'a gʋlse. A gʋlsa kãadma sebra zug tɩ yẽ n kõt a biigã a Tobiyas wala a Moyiiz noora sẽn date, Dẽ poor bala la b yaool n dɩ la b yũ. Woto fãa sẽn maan n sɛ la b yaool n sɩng rɩɩbo.

¹⁵A Raguwɛl boola a paga Edna n yeel-a: «M tão, maneg roog a yiib soaba n tall a Sara n kẽes be.»

¹⁶A kẽngame n tɩ maneg doogã n tall a biiga n tɩ kẽes be. A Edna kũmame, a yẽesa a nintãm n yeel a biigã:

¹⁷«M biiga, da sãam f sũur ye! Wẽnd na kɩt tɩ f sũ-sãanga tek n lebg sũ-noogo, da bʋ bũmb ye.» A sẽn gom woto n sɛ a yiime.