Read SEBR SÕNGO, 1998 Tobi 8 Bible Online

Tobi 8 - SEBR SÕNGO, 1998 bible

Tobi 8

¹B sẽn wa n dɩ n sɛ, b seglame n na tɩ gãande, la b yiisa bi-riblã rɩɩba roogẽ n tɩ kẽes ro-gãagẽ.

²A Tobiyas tẽega a Rafayɛl saglsã, a rɩka a korgo n yiis zĩifã sũuri la a sãoorã n dogl bug-saal zugu, tɩdarã laagẽ.

³Kʋɩl-zẽoogã yũugu wulumda ne roogã al tɩ Sʋtãana yɩk n ta Ezipt. A Rafayɛl yikame n pʋg-a n yõk-a n sẽb-a be.

⁴A Raguwɛl ne a paga yii roogẽ wã n lebs-a n page. A Tobiyas yika gãaga zugu n yeel a Saara: «M tão yiki! D naag taaba n pʋʋs Soaala n kos b kũuna tɩ b gũ-du.»

⁵A yikame tɩ b naag taaba n pʋʋse n kos Soaala sõngre, la a Tobiyas sɩnga pʋʋsgã woto: «D yaab rãmb Wẽnnaam, yãmb paam barka, la yãmb yʋʋr paam pẽgre al daar buud fãa. Bɩ sẽn be yĩngri la tẽng zug pẽg yãmb zamaan ne zamaana.

⁶Yãmb n naan a Adem ne a paga, a Awa, t'a yɩ a sõangda, la ninsaalb buud fãa yii bãmb b yiiba nengẽ; yãmb yeelame: ‹Ka tog tɩ daoa zĩnd a yembre ye. D naan ned sẽn wẽnd-a t'a sõng-a.›

⁷Marsã, mam sẽn dɩkd m tão wã ka sũ-noog yĩng bal ye, m maanda woto ne pʋ-peelem. Zoe-y tõnd d yiibã fãa nimbãanega la y sõng-do n ta d kʋʋlem wakato.»

⁸B naaga taaba n yeele: «Ami! Ami!»

⁹La b gãandame.

¹⁰Sã n yaa a Raguwɛl, a yikame n tɩ bool a rakõapa tɩ b wa sõng-a n tu yaoogo. A ra tagsa woto: «Tõe t'a Tobiyas maan yõore tɩ d lebg d bɛɛb laado la b paoore.»

¹¹B sẽn tuk yaoogã n sɛ, a Raguwɛl leb n waa yiri n bool a paga n yeel-a:

¹²«Fo ka na n tʋm biiga t'a kẽng roogẽ wã n tɩ gese a Tobiyas ket n vɩɩme. A sã n ki, d na n soosame mum-a tɩ ned da bãng ye.»

¹³B boola bi-puglã, n yõgen fitla, n pak roogã tɩ biiga kẽ n gese. A sẽn kẽ, a mikame tɩ bãmb b yiib fãa ket n gõeeme.

¹⁴Bi-pugla waa n walma a Raguwɛl: «A ka ki ye, yell buud ka ye.»

¹⁵A Raguwɛl pʋʋsa Wẽnnaam bark n yetẽ: «M Wẽnnaam, Bɩ y paam bark menga, togame tɩ yãmb paam pẽgre al n ta dũni sɛɛbo!

¹⁶M pʋʋsda yãmb barka, yãmb sẽn noog mam sũurã yĩnga, mam sẽn da zoet bũmb ningã ka yɩ ye, yãmb maana tõnd fãa neer wʋsgo.

¹⁷D pʋʋsda yãmb barka, yãmb sẽn zoe bi-ribl la bi-pugl sẽn yaa b ma bi-yend nimbãanega. M Soaala, sõng-y-ba la gũ-y-b neere. Sõng-y-ba tɩ b vɩɩnd ne laafi la sũ-noogo!»

¹⁸A Raguwɛl kɩtame tɩ b bus yaoogã tɩ zĩig nan pa yẽeg ye.

¹⁹A kɩtame t'a pag wẽ buri. A kẽnga a bãgrẽ, b tɩ baoo niis a yiibu n paas pe-raad a naase tɩ b na n kʋ n segl dɩɩbo.

²⁰A Raguwɛl bool a Tobiyas n yeel-a: «Kulb yell ka gomd ye, fo na n paa ka dasem piig la a naase. Fo na n paame n dɩ la f yũ mam zakẽ. Fo na n nooga mam biiga sũuri, tɩ sẽn tãag marsã a paama sũ-sãang wʋsg-wʋsgo.

²¹Dẽ poore mam na n kõ foom m paoong pʋɩ-sʋka tɩ f tall n kul f ba yir ne laafi. Maam ne m paga sã n wa ki, y na paam pʋɩ-sʋka sẽn ketã. M biiga da maan dabeem ye. Mam ya fo ba, a Edna yaa fo ma. Dũnna tɛka, tõnd lebga fo ba ne f ma, a Sara lebga f tão.»