Read SEBR SÕNGO, 1998 Tobi 9 Bible Online

Tobi 9 - SEBR SÕNGO, 1998 bible

Tobi 9

¹A Tobiyas yeela a Rafayɛl:

²«M ned sõngo, a Azariyas, bao sõgen-kamba a naas, la yʋgma a yiibu, kẽng Raguwɛs.

³Fo na n kẽnga a Gabayɛl nengẽ, fo na n kɩs-a sebrã n n deeg ligdã; fo na n bool-a lame tɩ y tũ taab n wa mam yikãadma.

⁴Fo mi tɩ m baaba yãka daare n gũud maam, la m sã n loog badaare, a sũur na n sãamame.

⁵Fo mi a Raguwɛl sẽn kãab t'a na n maana bũmb ninga, togame tɩ mam tũ a raabã.» A Rafayɛl looga Raguwɛs al Mɛdi, ne sõgen-kamba a naase la yʋgma a yiibu. B siga a Gabayɛl yir, la b kɩsa ligda kaset sebre. A goma ne a Gabayɛl a Tobi biiga yikãadem yelle, la a wilg-a lame t'a wa yikãadma kibsã. A Gabayɛl sõda yonda fãa; b fãa da ket n sẽbame n ka tol n lok ye, la b rɩk-b lame n zɩlg yʋgma a yiibu.

⁶B yika pĩnda n tũ taaba n wa yikãadma; b sẽn ta a Raguwɛl yiri b mikame ta Tobiyas da rɩta. A basa rɩɩbã n yik n pʋʋs a Gabayɛl. A Gabayɛl kũmame, la a ning a la barka n yelle: «Biig sẽn ya sõng zãnga, t'a ba ya sõng zãnga, n pid ne zemsg bala, n ya nin-noang menga! Bɩ Wẽnd sik b barka fo zug la f paga zugu, f paga ba ne a ma zugu! M pʋʋsd Wẽnd barka, bãmb sẽn sak tɩ m sẽn ne a Tobiyas, yaa wa doagd a Tobi meng la m ne.»