Read SEBR SÕNGO, 1998 Zudit 1 Bible Online

Zudit 1 - SEBR SÕNGO, 1998 bible

Zudit 1

¹Da yaa yʋʋm piig la a yiibu la a Nabikodonozor da lebg Asiri rãmb dĩma, t'a na-tẽng ya Niniv kãsenga. Dẽ t'a Arfaksad n da ya Mɛd dãmb dĩma, t'a na-tẽng ya Ekbatan.

²A Arfaksad da peesa kug n me laglga n gũbg a tẽnga. Kugr a ye fãa yalem da yaa kãntɩɩs a tã, t a woglem ya kãntɩɩs a yoobe. Lal-gũbra zãndlem da yaa kãntɩɩs pisopoe, a yalem da ya kãntɩɩs pis-nu.

³A tẽnga noorẽ a Arfaksad da mee ro-wogdo, rot zãndlem sẽn ta kãntɩɩs koabga, la b sɛɛgẽ wã, rota yalem da taa kãntɩɩs pisoobe.

⁴Kʋɩlensa meng zãndlem da yaa kãntɩɩs pisopoe, tɩ b yalem ya kãntɩɩs pis-naase. Woto tãb-biisa yiib la b tongre da yaa naana.

⁵La ade, wakat kãnga, a Nabikodonozor ne a Arfaksad yika zabre ne taaba, tẽn-nabrẽ, Ragawu tẽn-peelmẽ.

⁶Tãmsa zutẽ dãmba, Efrat, Tigr la Idaps rãmba, bãadẽ dãmba, Elymayis dĩm a Ariok soolmẽ dãmba la buud a taab wʋsgo, bãmb fãa ra yik n yals a Arfaksad poorẽ n na n zab ne Kalde rãmba.

⁷Asiri dĩm a Nabikodonozor toola sebre zĩis fãa. Yaanga, yɩɩ Pɛrs rãmba, Nin-taoore yɩɩ Silisi, Damas, Libã, Libã togelle n ta Mog-kãsenga noore.

⁸Yɩɩ Karmɛl dãmba, Galaad, Galile zugẽ dãmba, Esdrelõ bãoogẽ dãmba.

⁹Yɩɩ Samari ne a tẽnse, Zʋrdẽ rʋʋnd rãmba n ta Zerizalɛɛm, Batane, Kelus, Kadɛs rãmba, Ezipt kʋɩlg noorẽ rãmba, Tafnɛs, Ramsɛs, Gesɛm tẽn-peelma tõre.

¹⁰N wat Tanis la Memfis taoore, n tat Ezipt rãmba, n tat Nubi sɛtmẽ rãmba.

¹¹Tẽnga gill ninsaalba maana wa b ka wʋm Asiri dĩm a Nabikodonozor boolga ye. B pa wa zabra ye. B ra ka zoet a Nabikodonozor ye. B tõdga zãng fas, tɩ b sẽn tʋm b rãmba lɛɛg zaalem, n lɛɛg ne paoogre.

¹²Dẽ puuga a Nabikodonozor sũuri wʋsgo t'a wẽene ne a naama la a naama zaoore, t'a na rok a sũuri, t'a sʋʋs na varg Silisi rãmba, Damas dãmba, Siri dãmba, Moab rãmba, Amonit dãmba, Zɩɩda la Ezipt rãmba, n tãag mogra noor.

¹³Yaa a naama reegre yʋʋm piig la a yopoe soaba la a yiis a tãb-biisi, n tak zabre ne a Arfaksad la a tõog-a lame. A tusa a tãb-biisã, a wiidã, a bilim-bilma n lubi.

¹⁴A sooga a tẽnsa fãa, n tol n kẽ Ekbatan. La Ekbatan a kẽe zĩis fãa, a reega a ro-wogdã, n zɛ a raagã, n menes a neerma, n bas-a ne rẽgdo.

¹⁵A yõka a Arfaksad, Ragawu tãmsã zugu, n kõs-a ne a kãnde n menes a yʋʋr zãnga.

¹⁶A lɛɛgame n kẽ Niniv ne neb ka tɛka sẽn waa n naag-a; yaa tãb-biis ka tɛka; ned ba a ye ra ka mi a to sẽn yitẽ. Dɩlla yaa Niniv la a pa yã, n vʋʋsdẽ la a maand kibsa dasem koabga la pisi n tar dɩ-nood bala.