Read SEBR SÕNGO, 1998 Zudit 10 Bible Online

Zudit 10 - SEBR SÕNGO, 1998 bible

Zudit 10

¹Yaa woto la a Zudit da gomd ne Israyɛl Wẽnnaam. A pʋʋsga sẽn sɛ,

²a roogame, n bool a roog biiga n sig roog ninga a sẽn kẽed a soab pʋgẽ vʋʋsg raar bɩ kibs raarã.

³A yeega a peen gʋsd futã, a kʋ-rɩt futã, n so koom, n sõ yũ-noog kaam, n sãas a zobdo, n teeg a zug peende la a ning a sũ-noog raar futã, wala a sɩda Manase sẽn waa n ketẽ.

⁴A pida a neooda, n ning a muizãana, a zũya, a nug-bĩnsi, a tʋb-londo, a fan-teeda fãa; a manega a meng wa a sẽn tõe tɛka, n na n lebg neere n sakd fãa gesgo.

⁵A baoo rãam lɩnga la kaam yubla n tʋk biigã. A baoo miisdu. N bao tɩɩs biis sẽn kʋɩɩse la bur sõma, n maneg n loe n paas.

⁶B teesa Betuli noore. B yãenda a Oziyas t'a be be ne tẽnga nin-kẽems a yiibu, a Kabris la a Karmis.

⁷B sẽn yãend a Zudit nengã la a futã sẽn lebg a soaba, a neerma yɛɛs-b lame. B yeel-a-la woto:

⁸«Bɩ d yaab rãmba Wẽnda nonglem kell n yãag-fo. B pids f raabo, tɩ Israyɛl kamb tũ rẽ n paam pẽgre, tɩ Zerizalɛɛm yʋʋr le yi n zãage!»

⁹A Zudit pẽga Wẽnde, la a yeela nin-kẽemsã: «M kos tɩ y pak kʋɩlensã tɩ m tɩ pisd y sẽn wʋm tɩ d gom bũmb ning yell mars-marsã.» B kɩtame tɩ kom-bɩɩba pak kʋɩlensã wala a sẽn kose.

¹⁰B sak n pakame t'a Zudit yi ne a roog biiga. Tẽnga rãmb fãa da tara a gesgo t'a sigd tãngã n wa ta tẽn-nabrã, n wa ka le ne-a ye.

¹¹B sẽn dɩk b sore n tar kẽnde, Asiri, tãb-biisa sẽn da solge yii n sega a Zudit ne a roog biigã.

¹²B gãda a Zudit n sok-a: «Fo bee ne yɛ rãmba, f yita yɛ, f rabda yɛ?» T'a yeele: «M yaa Ebre poaka, la m zoetame, tɩ m neeme tɩ ka na n le kaoos tɩ d lebg yãmb dɩɩb ye.

¹³M wat n na n yãenda y tãnsoab a Olofern, n wilg a yɛla sẽn be zĩig ninga taki. M na n wilg-a-la soy niyns sẽn tõe n tũ n paam n tõog tãmsa zut rãmba fãa t'a ned ba a ye yaool n ka ki ye, tɩ yõor ka tol n yãk ye.»

¹⁴Neba ra kelgd-a lame la b get-a, t'a neerma yɛɛsd-b.

¹⁵B yeel-a lame: «Fo sẽn deng taoore n wa n na n ges d zu-soabã, fo yẽ yell na manege, bʋʋg-a a roogẽ, la ad neb sẽn na n yãag foom n tɩ bas a nugẽ.

¹⁶F sã n ta tãnsoaba taoore, da maan dabeem ye, togs-a fo sẽn yeel tõnd mars-marsã, t'a a na reeg f neere.»

¹⁷B yãka neb koabga tɩ b na n tall yẽ ne a roog-biiga n kẽng a Olofern nengẽ.

¹⁸B wʋma a Zudit waoonga rãmde tɩ b sɩng kʋrbo. A ra nan ka paam n kẽ a Olofern dooga pʋg ye, b ra nan ka paam n wilg a waoonga ye, la neba ra zoe n gũmame.

¹⁹B ra pẽgdame n ka yɛɛdẽ ye, b ra pẽgda a neerma, la yaa a Israyɛl kamb neerma la b ra naag n kilsdẽ. Ned kam fãa ra yeta a tũud-n-taaga: «Ãnda n na n tõog n sãbs buud sẽn tar pʋg-neeb a woto fãa? Ka tog tɩ b kees b buuda rao ba a ye. Ka rẽ sẽn põs-b kũuma tõe n tudga dũni wã gilli.»

²⁰A Olofern sõgen-kamba, la a gũudba yiime, n yaool n kẽes a Zudit dooga pʋga.

²¹Wakat kãnga t'a Olofern da vʋʋsdame. A gãaga ra gũbga ne peen miuugu sẽn tar neerem la sẽn kõog ne sãnem, ne kug sẽn pees tɩ b yãgd b toore, moam la kẽese.

²²B sẽn wilg a Zudit waoongã a yi n seg-a-la rignoorẽ, neb n lʋɩ a taoore n zãad bugum sẽn yõgen wanzurf tʋgd pʋsẽ.

²³A Zudit sẽn ta a Olofern ne a sõgen-kamba taoore, a neerma yɛɛsa b fãa gilli. A wõgemda a taoore, n kɩ a neng tẽnga, tɩ sõgen-kamba le roog-a.