Read SEBR SÕNGO, 1998 Zudit 11 Bible Online

Zudit 11 - SEBR SÕNGO, 1998 bible

Zudit 11

¹A Olofern yeela a Zudit: «Paga, bas rabeem, m zɩ n maan ned bũmb ye. A soaba ye n wilg t'a pʋgda a Nabikodonozor, tẽnga tõr soaalã.

²Fo buuda sẽn zao tãmsa zutã sã n da ka sãbsẽ maam, m kõn n zẽkẽ m kãnde n tees-b ye. Bãmb n tʋlg rẽ.

³La wilg maam, yaa bõe yĩng la f zoe n wa ka? Fo yẽ na põse. Keng f sũuri, beooga na vẽeg-f tɩ f ket n vɩ ne yõore, la yʋnd a taaba me boto.

⁴Ned ba a ye kõn sɩɩs-fo. B na maan-f neere, wala b sẽn maan ne neb niyns fãa sẽn ka yi d soaal a Nabikodonozor poorẽ.»

⁵T'a Zudit na n yeele: «M kos tɩ y kelg ne yardo, y yem-poaka koɛɛga. Bas-y t'a yaag a noor y taoore. M kõn yiis zirẽ n togs m zu-soaba yʋnga ye.

⁶Tũ-y y yem-poaka sẽn na n wilg y bũmb ninga bala, tɩ y raaba fãa na pidsi, m zu-soaba sẽn sɩnga fãa na baas neere.

⁷Wẽnd na wogl dũni dĩm a Nabikodonozor yõore! Bãmb n tʋm yãmba tɩ y wa kẽes sẽn vɩ-a fãa so-sõng pʋgẽ. Wẽnd na paas y pãnga! Wẽnd maag yãmba, ka ninsaalb bala n deegd b noor ye, yaa rũmsã, we-rũmsa menga. Dũmsa la yĩngr luiili wã fãa vɩ-la a Nabikodonozor ne a rooga yĩnga!

⁸D wʋmame tɩ b gomd b yama la y rabaara yelle. Tẽnga tõr miime, tɩ dĩma soolma pʋga, yãmb bal n yɩɩd ne bãngre la yãmb bal n tar tõogo ne zabr takre.

⁹D tẽra goam niyns a Akiyor sẽn yiis ka. Betuli rãmb bas-a-la vɩɩga la woto a wilga a sẽn togs yãmba fãa, m zu-soaba.

¹⁰Ade, m zu-soaba, m soaala, da bas-y nin kãnga gomd ba a ye tɩ yi y pʋtẽerẽ ye. Yaa sɩd la a sẽn togsã. Sã n ka tõnd n beeg d Wẽndã, sɩbgr ka tõe n sɩbg d buudã, sʋʋg ka tõe n maan-d bũmb ye.

¹¹M yaool n neeme tɩ m zu-soaba raab ka na n pa n ka pids ye, tɩ mars-marsã bala kũuma na n wẽ-b-la wa wɩbga. B sakame n lebg wẽng yemse. B maanda wẽnga n puugd yĩngr Soaala sũuri.

¹²Bãng-y tɩ rɩɩba paoong sẽn lebg tooga tɛka, tɩ koom ka le wɛ, b lɛɛg n na n wãba b rũmsã. Ba Wẽnd sẽn gɩdg b rũms niynsã b yeelame tɩ b na wãb bãmba.

¹³Bũmb ka be b sẽn ka rɩt ye: kood rẽemsa biisi, rãama ne kaama lemse. B yaool n da yaa neb kẽer bal soolem: b yaa maan-kʋʋdba sẽn be Zerizalɛɛm, Wẽnd taoora, rẽnd bala. Ned yaool ka tõe n sɩɩs-b ne nug meng ye.

¹⁴Zerizalɛɛm dãmba zoe n tõdga noorã; pʋs n yaa rẽ menga la Betuli rãmba tʋm neb Zerizalɛɛm taoor dãmba nengẽ tɩ b kos sor tɩ b me maan wa bãmba.

¹⁵B sã n tɩ paam sorã n wa, b sã n sɩng rɩɩbo, ad-y yaa baraar bala la b na n lʋɩ y nugẽ, b wãab yĩnga.

¹⁶Yãmb yem-poaka sẽn wʋm dẽ fãa, a zoeeme. Wẽnd yeel-m lame tɩ m wa naag yãmba n tʋm tʋʋmd sẽn na n yɩk dũni ninsaalba fãa pelense, a sã n wa lʋɩ b tʋbrẽ.

¹⁷Y yem-poaka yaa pag sẽn nong Wẽnde, wĩndg la yʋngo a waoogda yĩngr Soaala. M yeelame tɩ m na n paa ne m zu-soabã. La ade, yʋngo, y yem-poaka na n taa boka noore n pʋʋs Wẽnde, tɩ b wilg ma, b sẽn na n maan-ba, b wɩɩbda raare.

¹⁸M na lɛɛg n wa wilg yãmba, tɩ y yi ne y tãb-biisa fãa, la bãmb ned ba a ye kõn yals y taoor ye.

¹⁹M na tall-y tɩ y saag Zɩɩda tẽn-peelma zãnga, n wa poog Zerizalɛɛm. M na kɩt tɩ b vigl y naam zaoor tẽnga tẽnsʋka, y na pĩng be rãmba wala piis, sẽn ka tar gũuda, la baag meng kõn saag n wes-y ye. Woto fãa ya m sẽn zoe n neẽ, woto fãa yaa b sẽn wilg-ma, woto fãa la b tʋm-m tɩ m wa togs yamba.»

²⁰Paga goama kẽ-la a Olofern kõaba. B ta-la a sõgen-kamba yam, a yam-minima yɛɛs-b lame tɩ b yeele:

²¹«Dũni wã yaanga n ta a taoore, pag a woto buud ka be ye: yẽ la pʋg neere yẽ n le mi goama!»

²²A Olofern yeelame: «Wẽnd maana neere n tʋm foo taoore, paga. Ad yaa pãng la f waa n kõ-m n paase, ad-f waa ne sẽn zãgs-b dĩma boolga wãabo.

²³Foo, fo yaa neere, la f mi goama. F sã n maan wa f sẽn yeelã, fo Wẽnda na lebg mam Wẽnde, la fo na n kẽ-la a Nabikodonozor zakẽ, f yʋʋr na yi dũni tõre.»