Read SEBR SÕNGO, 1998 Zudit 12 Bible Online

Zudit 12 - SEBR SÕNGO, 1998 bible

Zudit 12

¹A Olofern kẽesa a Zudit roog ning a sẽn da bĩngd a wanzurf lagdã, n kõ-a a meng rɩɩb la a meng rãam.

²La a Zudit yeelame: «M kõn sɩɩs-b ye, tõe tɩ bũmb wa zĩnd be n dẽgem-ma. M sẽn tall n wa wã na sek-ma.»

³Dẽ la a Olofern leok-a: «La fo sẽn tall n wa wã sã n wa sɛ, d na n yɩ-la a wãna n le wa ne b buudu. Fo buud ned la sẽn ka be tõnd sʋk la?»

⁴A Zudit leokame: «Wẽnd na wogl y yõore, m zu-soaba, ad-y y yem-poaka ka na n dɩ a sẽn tall n wa wã n sɛ, tɩ m ka pids Wẽnd sẽn dat-m ne bũmb ninga ye.»

⁵A Olofern kamba tɩ kẽes-a-la roog a ye. A gũsame n ta yʋn-sʋka. Noos sẽn wa n kolg b pipi yãbre, a yikame,

⁶la a tʋmame tɩ b yeel a Olofern: «M zu-soaba sak n kõ noore tɩ b bas-m tɩ m yi n pʋʋse.»

⁷La a Olofern wilga a gũudba tɩ b ra gɩdg-a ye. Yaa dasma a tã la a pa sikẽ wã, yʋngo a ra yitame n tees Betuli noorẽ bokã, n tɩ waas a meng bulg ning tãb-biis sẽn wẽ b sika n pẽnegã.

⁸A sã n wa lɛɛg n kuusẽ a ra pʋʋsda Israyɛl Wẽnnaam tɩ b zĩnd ne-a, t'a tʋʋmda baas ne a saam-biisa zu-zẽkre.

⁹A sã n yɩlg n sɛ a lɛɛgd n waa a roogẽ la a paada be n ta wakat ning b sẽn na n wa ne zaabr rɩɩbo.

¹⁰Dasma a naas daare, a Olofern maana kibsa la a sẽn segl dɩɩbo a boola a tãb-biisa taoor dãmba; sẽn da rɩk-b tʋʋmda bal la a ka boole.

¹¹A yeela a Bagoas, a zaka noor kãsma: «Kẽng n tɩ sagl Zʋɩf poakã t'a wa naag tõndo n dɩ la a yũ.

¹²Na n yɩɩ yãnde ne tõndo d sã n bas pag a woto t'a loog tɩ d ka tol n pẽneg-a. D sã n pa tõoge, b na la tõndo!»

¹³A Bagoas yi-la a Olofern nengẽ n bʋʋg a Zudit. Ad a sẽn yeel-a: «Pʋg neer a woto kõn sak n wa tao m zu-soaba nengẽ sɩda? Pipi zĩiga la a na n deege, n zĩi t'a Olofern be a taoore, la a yũud a rã-noogo, n lebg rũnna bala wa Asiri kom-pugli niyns sẽn be-b a Nabikodonozor zakẽ.»

¹⁴A Zudit leokame: «Maam la a bõe n na n kɩɩs m zu-soaba? A sẽn ges tɩ bũmb ning fãa taa a yam, m na pids-a ne yãgbo, la rẽ na yɩ bũmb m sẽn na n tẽeg ne sũ-noog n tãag m kũum.»

¹⁵Woto wã a yikame, n fam a menga, n ning a sẽn zɩ fãa n wa. A doog biiga lʋɩɩ taoore. Pe-gãongã a Bagoas sẽn kõ a Zudit, a beoog-beoog raab yĩnga, roog biiga tɩ rɩgl-a-la a Olofern taoore, t'a Zudit na n zĩnd be n dɩ.

¹⁶Sɩda a Zudit zĩnda a zugu, la rẽ waa ne a Olofern yama menesgo la a sũ-noogo. A ra tʋlla ne raab kãsenga n gãand ne-a, tɩ sɩda a sẽn yãend a raar tɛka, a ra gẽesda a sẽn na n yẽs ne-a wakat ninga.

¹⁷Dẽ la a yeel-a: «Yũ! D sũ-noog yɩ f rẽnna!»

¹⁸A Zudit yeelame: «M yũudame, m zu-soaba, tɩ m dogem tɛka m nan ka pẽg vɩɩma wa rũnna ye!»

¹⁹A reega a roog biiga sẽn da yiis a yĩnga, la tãnsoaba taoore, a rɩɩme, a yũume.

²⁰A Olofern da ka le so a meng ye. Paga neerma yĩnga. La a sẽn tar yũub la a sẽn tar yũubu, la a zɩɩ n yũ woto a sẽn da yi a ma pʋgẽ ye.