Read SEBR SÕNGO, 1998 Zudit 13 Bible Online

Zudit 13 - SEBR SÕNGO, 1998 bible

Zudit 13

¹Zĩig sẽn wa n zʋʋge, tãb-biisa kãsem dãmb loogame. A Bagoas zĩnda yɩng n pag roogã, a sẽn wa n yiis sẽn da be-b be wã fãa gilli. B fãa looga ne yaamse, ne rã-yũuri, n tɩ gũsi.

²A Zudit bal la a bas roogẽ wã ne a Olofern. Tãnsoaba me ra gãee a gãaga zugu la rãama ra sek-a lame.

³A Zudit yeela a roog biiga t'a yi n yaas yɩnga n gũ-a wala rasem kam. A da pĩnd wilgame t'a na n tɩ pʋʋsame. A Bagoas meng ra mii tiiri.

⁴Neba fãa sɩd ra yiime n looge. Bedre bɩ bilfu, ned ba a ye ka pa a Olofern dooga pʋg ye. A Zudit yalsa yĩngri, gãaga sɛɛga, n yeele: «Soaala, pãng Naaba-Wẽnde, sõng-y tɩ m sẽn data tõog n pids marsã, Zerizalɛɛm pẽgr yĩnga.

⁵Yaa marsã la y tog n le reeg y pʋɩɩre, n pids y sẽn yals bũmb ninga, n fẽd bɛɛba sẽn yik ne tõndã.»

⁶A kẽngame n kolg gãaga, n kolg a Olofern zugã, n wõog a tãnsoben-sʋʋga, sẽn da loe be,

⁷n kolg n paase, n gãd a Olofern zoobdo, n yeele: «Soaala, Israyɛl Wẽnnaam, lebs-y m nuga pãnga rũnna!»

⁸A wẽla a yubla naoor a yiibu, la a fiuuga a zugã.

⁹A tusa yĩnga n zãag ne gãagã n paam n dɩgs pɛɛla sẽn da tʋɩ gãagã la a yags sẽn da yagl n gilgã. Dẽ poore a yii ne a Olofern zugã n kɩs a roog biigã,

¹⁰yẽ reeg-a lame n sui a rɩɩba korgẽ la b zãaga ne sikã wala b sẽn da mi n maandẽ, b pʋʋsga yĩnga. B sẽn zãag ne sikã, n gãndg bokã, n dʋ tãngã, b paam n ta Betuli tẽnga noore.

¹¹A Zudit zĩnda yɩɩga n yeel dagno-gũudbã: «Pak-y kʋɩlengã, pak-y tɩ Soaala, tõnd Wẽnnaam, ket n bee d sʋka n pidsd b sẽn da kãab a Israyɛl la b wilgd d bɛɛbã b nug pãnga, wala b sẽn maan dũnna.»

¹²Tẽnga rãmb sẽn wʋm a koɛɛga, b fãa zoeeme n wa tẽnga noore, la b boola tẽnga nin-kẽemba.

¹³Tẽnga tõre, bɛd la bõonego, fãa zoeeme n wa, tɩ b ra ka le tẽed a lebgr ye. B paka kʋɩlensã, b reega pagb a yiibã, b widga bugum m maan vẽenem, la b gũbg-b lame.

¹⁴A Zudit zẽka a koɛɛg n yeele: «Pẽg-y Wẽnde! Pẽg-y-ba! Pẽg-y Wẽnde, tɩ b nimbãan-zoeer ka zãag ne a Israyɛl doog ye, yʋnga bala, b kõo m nug pãnga tɩ m kaoog bɛɛba tãpo.»

¹⁵A tʋma a korga pʋga n yiis zugu, n wilg-ba: «Ad Asiri tãnsoaba, a Olofern, zugu, la ad fut niynsi sẽn da tʋɩ a gãaga. Ad-y rãam n da lub-a. Wẽnd wẽe-a-la ne pag nugu!

¹⁶Wẽnd paam pẽgre tɩ b gũ-m lame n tãag m tʋʋmda baasgo, m neerma tudga rao kãnga tɩ m paam n yãk a zugu. A ka maan wẽng ne maam n dẽgem-ma bɩ n ning-m yãnd ye.»

¹⁷Neba da langda sũ-noog bala, b wõgemdame n waoog Soaala la b naaga taab n yeele: «Paam-y pẽgre tɩ rũnna y menesa y buuda bɛɛba.»

¹⁸A Oziyas me yeela a Zudit: «Wẽnd na ning f barka, m biiga, Yĩngr-Pãng-Soaba na ning-f barka, n yɩɩg dũni wã fãa pagba. Soaala-Wẽnd me paam pẽgre, yĩngr la tẽnga Naand paam pẽgre, tɩ bãmb n gũ-foo tɩ f paam d bɛɛb tãnsoab zug n doke!

¹⁹Teegr ning f sẽn teeg Soaala-Wẽnda, ad a kõn yi ninsaalba pʋtẽerẽ bada. Zamaan woo zamaana, b na tẽeg tɩ Wẽnd la pãng soaba.

²⁰Wẽnd na kɩt tɩ f yʋʋr zẽk zamaana, Wẽnd na rol-f ne arzɛk ka tɛka, f sẽn ka zoe f vɩɩm bõne n yiki, d yãnd wakato, n zãag d ne kũum, la f kell n pʋg Soaalã n ka bʋdge!» La zãma wã naaga taab n deeg: «Ami! Ami!»