Read SEBR SÕNGO, 1998 Zudit 14 Bible Online

Zudit 14 - SEBR SÕNGO, 1998 bible

Zudit 14

¹A Zudit yeelame: «M saam-biisi, kelg-y-ma. Deeg-y zugã n sel lalga zugu.

²Zĩig sã n yẽege, wĩndga sã n wa buiid tẽnga, bɩ ned kam fãa yi ne a zab-teedo. Bao-y tãnsoab n kõ y menga, la maan-y wala y na n sigame n bʋʋg Asiri rãmba sẽn be-b tãnga pennẽ wã.

³Asiri rãmba sã n yãend yãmba, b na n lɛɛg n kẽe sika pʋga n nek b tãnsoaben-dãmba. B na n zoe n babsa a Olofern a roogẽ, la b pa na n yãend-a ye. B na n yɛɛsame n sɩng zoeese.

⁴Lebga y fãa gill yi n pʋg-ba la y gãneg-ba.

⁵La reng-y n bool-y Amonitga a Akiyor n kõ-ma. Togame t'a yãende, t'a ges ned ninga sẽn da sãbsd a Israyɛl buuda nenga, t'a ges sẽn da tʋma yẽ tõnd sʋka, wa kũuma sẽn na n lub-a zĩig ningã.»

⁶B tɩ boola a Akiyor a Oziyas yirã. A sẽn yãee a Olofern zugã ned a ye sẽn da zãade, a lʋɩɩme n sogbe.

⁷B veoog-a lame n yiki, la a wõgemda a Zudit taoore n yeele: «Wẽnd na zẽk f yʋʋr Israyɛl tẽn-peelmẽ, Wẽnd na zɛk f yʋʋr dũni tõre. F yʋʋra sẽn na n pʋd zĩig ning fãa, neb na yɛɛse.

⁸La wilg maam marsã fo sẽn maan dasma a wãna pʋgẽ!» A Zudit wilga, zãma wã fãa taoore, a sẽn maan bũmb ninga, a sẽn yi Betuli tɛka n ta marsã, a sẽn yɛs n gomdã.

⁹A sẽn gom n sɛ la neba fãa sẽn kaase tɩ tẽnga wulumd ne sũ-noog bʋʋre.

¹⁰A Akiyor bãnga Wẽnd sẽn maan bũmb ning fãa a Israyɛl yĩnga. A kẽe Israyɛl Wẽnnaam. A kẽe bãongo n lebg wa Israyɛl buud ned zãng-zãnga.

¹¹Zĩig sẽn yẽege, b yagla a Olofern zugã lalga zugu, ned kam fãa yii ne a zab-teedo n sɩng tãnga sibgu, tãnsoab fãa ne a neba.

¹²Asiri rãmba sẽn yãend-ba, b tʋmame tɩ b wilg zabd-mitba, tɩ bãmb wilg tãb-biisa kãsem dãmba, tɩ bãmb wilg te-gũudbã.

¹³B taa a Olofern dooga noore, la b yeela noor naaba: «Nek-y d zu-soabã, tɩ yem-daada saagame n sigi n na n tak zabre, n baood tɩ b wã-b zãnga.»

¹⁴A Bagoas kẽe pʋgẽ, n sɩng nug pogs wẽebo, n tẽed t'a Olofern bee ne a Zudit.

¹⁵La a sẽn ka wʋm kurkurã, a paka ro gãagã la a yãenda a Olofern t'a ki n gãe dignoorẽ, tɩ zug kaẽ ye.

¹⁶A kelmame, a kaasame, n yãbd la a tõosd a futu.

¹⁷A sẽn kẽ a Zudit doogẽ, a pa yãend-a ye. T'a wudg n yi n yeel zãma wã:

¹⁸«Yem-da-yooda tar zãmbo! Zʋɩf poaka ninga a Nabikodonozor buuda yãnde. A Olofern gãee tẽnga la zug ka ye!»

¹⁹Asiri taoor dãmba sẽn wʋm dẽ, b yama bondga zãnga tɩ b kẽes b futu, la b pids sika ne b bʋ-raase.