Read SEBR SÕNGO, 1998 Zudit 15 Bible Online

Zudit 15 - SEBR SÕNGO, 1998 bible

Zudit 15

¹Neb kẽer da keta b rotẽ, la b sẽn wa n wʋm kibarã b zuta menemame.

²Dabeem kãseng yõk-b lame. Ned ba a ye ka le tõog n yaas ne a to ye. Yɩɩ zoees tɛka. B rɩka sor ning b sẽn paame, tɩ kẽer pa tẽn-nabrẽ, tɩ kẽr dʋ tãmsã;

³sẽn da pẽ-b Betuli tãmsã fãa sɩnga zoeese, wakat kãng marsã la Israyɛl tãb-biisa yi b pʋgbo.

⁴A Oziyas tʋma neb Bɛtomestayim, Bebayi, Koba, Kola, la Israyɛl tẽnsa fãa n wilg yell ning sẽn maane, la b kos tɩ b fãa yi n seg bɛɛbã n kʋ-b zãnga.

⁵Israyɛl dãmb sẽn wʋme, b yi wa nin-yende, n kʋ bɛɛbã n tãag Kola. Sẽn be-b Zerizalɛɛm fãa, tãnga zug rãmb fãa me waame, tɩ bãmb me ra paam n wʋma bɛɛba kibare. Dẽ poore yɩɩ Galaad la Galile rãmba. Bãmb me pʋg-b lame n kʋ zembala, n ta Damas ne a tẽn-toose.

⁶Sẽn pa-b Betuli wã siga Asiri rãmba sikã, n zɛ b laogã n paam arzɛk ka tɛka.

⁷Israyɛl dãmba sẽn zab n lɛɛg n wa, bãmb me wʋka kellã. Ba sẽn ka-b tãb-biisa meng paama teed wʋsgo, tɩ laoga ra yaa ka tɛka.

⁸Maan-kʋʋd kãseng a Zoakim, la Israyɛl buud kãsem-dãmba sẽn da be Zerizalɛɛm wa n yãenda ne b nifu, neer ning Soaala-Wẽnd sẽn maan a Israyɛl la b pʋʋs a Zudit.

⁹B sẽn ta a zakẽ, b fãa naaga taab n yeele: «Foo la Zerizalɛɛm pẽgre! Foo la a Israyɛl zu-zẽkre. Foo la tõnd buuda yẽesem!

¹⁰F nug sẽn tõog woto fãa, f lebga a Israyɛl sõm soaba, la rẽ taa Wẽnd yam. Bɩ Wẽnnaam-Pãng-Soaba ning f barka, beoog sẽn wate.» Tɩ zãma wã reege: «Ami!»

¹¹Yaa rasem pis-tã tõre la b zɛ bɛɛba sikã. B kõ-la a Zudit roog ning sẽn da ti a Olofern yĩngã, ne a gãaga rooga teedo, a wanzurf lagdã, yõg-la-bɛdã. A reega fãa n sam a bilim-bilm pʋga, la a palg a bõn-wɛɛgã.

¹²Israyɛl pagba fãa waame n na n bãng a Zudit, la b sigla saooga n na n pẽg-a. A Zudit dɩka rasab sẽn tis ne puudu n kõ pagba sẽn da yãagd-a wã.

¹³B kãama oliviye tɩɩs vãado n teeg b zutu la yẽ n lʋɩ pagba taoore. Rapa me ra teega b rĩiri la b ra yãagd-a-la ne b zab teedo la ne b yɩɩla.

¹⁴A Zudit zĩnda sʋka n pʋd bark pʋʋsg yɩɩle tɩ neba fãa reesdẽ: