Read SEBR SÕNGO, 1998 Zudit 16 Bible Online

Zudit 16 - SEBR SÕNGO, 1998 bible

Zudit 16

¹Ad yɩɩllã: «D pẽg Soaala, d Wẽnnaam, ne gãngãado. D yɩɩl ne kɛma. D pʋd pẽgr yɩɩl b yĩnga. D kils la d moon b yʋʋre. D kalem pẽgr la sɛɛg yõkr yɩɩla.

²Soaala yaa Wẽnd sẽn kaood tãbdo. B ti-la b sik b buuda sʋka, b fãag-m-la m bɛɛba sẽn da pʋgd maama nusẽ.

³A Asʋr siga nug goabg tãmsã, ne a tãb-biis ka tɛka. B da reega kʋɩlsã n yãmbe. B wiida ra yaa bera, kunkuba zutu.

⁴Asʋr gomame t'a na n yõoga m ba yirã, t'a sʋʋg na n varga d kom-bɩɩbã, t'a na n fãsa d kom-peelsã n lob tẽnga, t'a na n sɛɛsa d yagensa gilli, n loog ne d pʋg-sɛdba zãnga.

⁵Soaala, Pãng-Soaba kɩɩsa rẽnna, ne pag nug bala, kũum tʋma a tʋʋma.

⁶Ka kom-bɩɩb taoor la tãnsoaba lʋɩ ye, ka nin-daad kamb n wẽe-a ye, ka nin-wogd kamb n zab ne-a ye. Yaa a Zudit, yaa a Merari bi-pugla, biiga neerem n yɩ a sʋʋg la a kãnde n tõog-a.

⁷Bi-pugla yeega a sũ-beed futu, n maas a Israyɛl kamb sũuri. A yũ-nooda kaam la a sõ yã, tãnsoab ne raood la a belg yã.

⁸A ra baoo peende n mobg a zoobdo, a ra yeelga fu pɛɛlga n na n kʋɩɩb-a.

⁹A neoodra meng tʋʋsa a nini, t'a neerma deeg a yama n da, n ka yãee n bars ye, tɩ sʋʋga paam n fiuuga a sẽn date.

¹⁰F raooda yɛɛsa Pɛrs rãmba, Merari biiga, tɩ f sũ-keelma gãneg Mɛd dãmb ne yɩɩre.

¹¹A ka-yõod dãmb kelma b zabr kɛlenga tɩ sẽn bob-ba n kẽnd tõo-tõo na n yɛɛse, a ka-neng rãmb kelmame tɩ gãndaad rigimd waoodo; b koɛɛg sẽn sãd bilf bala la b neng sẽn tuume.

¹²B nemda keglem, ka pagb sẽn pid pagb kamb nemd ye, sẽn kɛ la sẽn besge, wa yogre, sẽn kõs la sẽn sãage, wa sãoore; b nemda keglem, kamb sẽn ka yãe wubr dẽnna. Fãa gill pa-la m Soaala zabrẽ.

¹³M dat n pʋda yɩɩn-paal m Soaala yĩnga. Soaala, yãmb waooga, y ziira labsa. Y pãnga toga ne kilsgu, y pãng ka be to ye!

¹⁴Bɩ bõn-naandsa gill naag n pẽg-y. Yãmb yaaga y noore tɩ fãa wa moogo. Y fʋʋsa y pemsem tɩ fãa na n vɩɩnde. Ned ka be n tõe n kɩɩs y gomd ye.

¹⁵Y sẽn dat daar fãa, tãmsa lukda b zĩigẽ y sẽn dat raare, mogra pʋg la y tusd-b n lubi, pĩisa na n yẽnega wa siribdu. Sẽn teeg-b yãmba kõn luk b gãagẽ ye.

¹⁶Rũng maoong paooda ne a noog Soaala sũuri. Nemda la kaama sẽn dɩt bugum maan-kugra zugu ka tar yõod Wẽnd sẽn na n kok ye. Sẽn waoogda Wẽnd sõmblem bala yẽ soab n kɩɩd yẽgna la a wek balbo.

¹⁷M yãbd tẽns niyns sẽn yik-b zabr ne m buudã! Soaala Pãng Soab na n sɩbg-b-la bʋʋda raare, yaa bugum la zũnzũi n na n dɩ-ba, tɩ b tall waas-toodo, zamaan ne zamaana.»

¹⁸Neba sẽn ta Zerizalɛɛm, b fãa wõgemda Soaala taoore. B sẽn yɩlg b mens n sɛ, b kʋʋ yũ-nood maando, n wa ne yamleoog kũuni, la laafi kosg maando.

¹⁹A Zudit dɩka a Olofern teeda fãa b sẽn da yãk n kõ-a wã n bas wẽnd doogẽ. Sã n ya pɛɛla sẽn da yagl n gilg a Olofern gãagã, a rɩk-b lame n kõ wa yẽ me sẽn zɛ n paam la a rɩk-b lame n kõ Wẽnde.

²⁰Zerizalɛɛm wẽnd dooga taoore, neba kɩdma sũ-noogo la a Zudit paa ne-ba, kiis a tãabo.

²¹Ned kam fãa waa n leba a tẽngẽ. A Zudit me leba Betuli. Be la a ra kẽeda. A yʋʋr da yiime.

²²Wʋsg kos-a lame n na n maan b paga, la a sɩda, a Manase kũum la a mumb tɛka n tãag a meng loogre, a ka le bãng rao ye.

²³A ra kʋʋnda a sɩda zakẽ t'a yʋʋra tar zẽkr bala. A paama yʋʋm koabg la a nu. A basa a roog biiga t'a lebg burkĩna. Yaa Betuli la a ki yã la b mum-a-la tãnga bokẽ, a sɩda Manase sẽn da zoe n mum zĩig ningã.

²⁴Israyɛl kamb maana a kʋʋr dasem a yopoe. A sẽn waa n na n ki a welga a paoongo n yãk n kõ a sɩda Manase buudu, la a kell n kõ a meng buudu.

²⁵Ned ka le saag n teedg ne Israyɛl kamba, a Zudit vɩɩma wakat ye, la a loogr poore, paam n kaoosame t'a buud ka mak ye.