Read SEBR SÕNGO, 1998 Zudit 2 Bible Online

Zudit 2 - SEBR SÕNGO, 1998 bible

Zudit 2

¹Piig la a nii yʋʋmde, pipi kiuuga pisi la a yiib daare, na-yir dãmba wʋmame tɩ Asiri dĩm a Nabikodonozor, na n taka zabre ne ãndũni rãmba n dok a sũuri wala a meng sẽn da yeele.

²Woto wã a Nabikodonozor tigsa a kug-zĩidba la a kombɛɛmba tɩ b kẽ n yẽse la b yẽsa dũni wã wãabo.

³B yeelame tɩ b na n wãa tẽns niyns fãa la neb niyns fãa sẽn ka sak dĩma boolgã.

⁴B sẽn yẽs n sɛ, Asiri dĩm, a Nabikodonozor, boola a Olofern, a tãnsoab kãsenga, sẽn n da pʋgda yẽ ne naam la a yeel-a lame:

⁵«Ad dĩm kãsenga, ad tẽnga fãa soaala koɛɛga: ‹Yi-y ne neb sẽn pid ne raoodo, tɩ zãma wã fãa tar b raooda kaseto, neb sẽn ta tus koabg la pisi, n paas wiidi zembala la wed-dʋʋdb tus piig la a yi,

⁶n tɩ tak zabre ne nin-taoor dãmba, tɩ bãmb zãgsa m boolgo.

⁷Yeel-y-b tɩ b segl n gũ-ma tɩ m sũur puugame tɩ m na zab ne-ba. M tãb-biisa nao na n saaga tẽnga tõre, b na n zɛɛ tẽnga zãnga.

⁸Bogda na n pida ne sẽn paam-b sãmpogre; m na n kɩtame tɩ b lob sẽn ki-ba kʋɩl-bɛdẽ la kʋɩl-bõonesẽ la b kooma na n gãndga kʋɩlsa kogsã n daale.

⁹Yaa tẽnga satmẽ la m na n tall-ba n tɩ kẽes yembdo.

¹⁰Kẽng-y, tɩ soog-y nin-taoor tẽnsã fãa. B sã n sak naana, bĩng-y-ba n gũ m sẽn na n sɩbg-b raare.

¹¹Sẽn yeel-b tɩ b kõn sake, da bas-y ba a ye ye. Kʋ-y neba zãnga, wʋk-y b sẽn so zãnga.

¹²Maam la dĩma, n kang vɩɩme; maam n yeele. La bũmb kõn pa n ka pids ye.

¹³Modg-y, tũ-y m sẽn yeela fãa, da kɩɩs-y y soaala noor ba a ye, da kaoos-y ba bilfu!› »

¹⁴A sẽn yi dĩma nengẽ, a Olofern tigsa na-komsã, tãnsoaben-dãmbã, taoor dãmbã,

¹⁵n sõd gãndaada wala a zu-soaba sẽn da wilgi: tãb-biis tus koabg la pisi, wed-dʋʋdb tus piig la a yi sẽn bob logdo.

¹⁶A kɩtame tɩ b tong zabr tongre.

¹⁷A baoo yʋgma, bõeense la bõn-wees ka tɛka, teeda tʋkr yĩnga, n bao piisi, niisi la bʋʋse ka tɛka, b rɩɩb yĩnga.

¹⁸Tãb-biig fãa deega a sor dɩɩb zembala n paas sãnem la wanzurf, rĩma sẽn yiis b yĩnga.

¹⁹A Olofern looga a Nabikodonozor taoor ne a tãpã, n na n tɩ wẽ nin-taoor dãmba, n na n berg b tẽnse ne bilim-bilm, ne tãb-biisi, ne wed-dʋʋdba sẽn mi zabre.

²⁰La sɩda, sẽn da pʋgd a Olofern da labsa wala sʋya, wala tẽng bĩisri, sõora ka tõe n geelg ye.

²¹B sẽn yi Niniv b kẽna dasma a tãabo n tees Bektilɛt. B sẽn yi be b tɩ wẽe b sik Silisi nug goabg tãmsa zutu.

²²A Olofern yii be ne a tãb-biisã, nao la wiid dãmba, la bilim-bilma sɩnga tãmsa rʋʋbo.

²³A wẽe Ypd la Lud, n zɛ a Razis la a Ismayɛl kamb sẽn da be we-raooga noore, Keleõ rɩtgo.

²⁴A yega Efrat kʋɩlga, a pɩʋʋga Mezopotami n wã tẽnse, Abrona kʋɩlga noor n tãag mogre.

²⁵A tõoga Silisi tẽn-peelma, n kʋ sẽn yik-ba n na n teedg ne-a, n wa ta a Zafɛt ne Arabi toaaga.

²⁶A wẽe Madiã rãmba gũbri, n yõog b sik la b wuba,

²⁷n sig Damas, tigsg wakato, n ning pʋta bugum, n menes dũmsa fã, bɛd la bõonese, n zɛ tẽnsã, n sãam pʋto, n kʋ kom-bɩɩba fãa gilli.

²⁸Mogra noorẽ dãmb fãa paama yɛɛsgo la yɩɩre. Sidõ, Tir, Sur, Okina, Zamniya, Azot, Askalõ rãmb paama yɛɛsg wʋsgo.