Read SEBR SÕNGO, 1998 Zudit 4 Bible Online

Zudit 4 - SEBR SÕNGO, 1998 bible

Zudit 4

¹Israyɛl kamba sẽn da kẽed Zɩɩda tẽn-peelmẽ wʋma a Olofern, Asiri dĩm, a Nabikodonozor, tãnsoaba, sẽn maan bũmb ninga ne tẽns kẽere, b wʋmame ta kẽe n wʋka b wẽnd dota teedo, la a kʋʋ neba.

²Woto, b sẽn yãe t'a kolgda, b yɛɛsame la b maana rabeem wʋsgo, n zoet tɩ b na n wa fã Zerizalɛɛm la wẽnd doogã.

³B sẽn yi yembdã n wa wã yaool n da nan ka vẽgs ye. B sẽn tigim taab Zɩɩda tẽn-peelmẽ, wẽnd doogã ne a maan-kugrã la a te-sõma wã sẽn da rẽgme la sẽn paam yɩlgre, da nan ka zãag ye.

⁴Dẽ yĩnga b sa n wilga Samari rãmba, Kona, Bɛt-Orõ, Abelmayin, Zeriko; Koba, Ayisor, la Salɛm bãg-faagẽ dãmba.

⁵B rʋʋ tãn-wogdã zutu, n maneg n paas tẽns niyns sẽn da zao-b be wã pãnga, n bao dɩɩb n bĩng b pʋsẽ, zabra beoolg yĩnga. Kooda yẽ ra nan kẽesa paalem-paalem.

⁶A Zoakim n da ya maan-kʋʋd kãseng Zerizalɛɛm, wakat kãnga. A gʋlsa Betuli la Bɛtomestayim sẽn da tot ne Esdrelõ, la Dotayim bãg-faagẽ dãmba.

⁷A yeel-b lame tɩ b pag soy niyns sẽn be b tãnga zugu, tɩ yaa be bala la b tõe n tũ n paam Zɩɩda tẽnga. Beelẽ, bɛɛb gɩdgr ka toe ye. Sora yaa sẽka, neb a yiib bala n tõe n yeglg taaba n looge.

⁸Israyɛl kamba deega maan-kʋʋd kãsenga, a Zoakim, la nin-kẽemsa sẽn tigim taab Zerizalɛɛma noore.

⁹Israyɛl kamba fãa tees n kelma Soaala-Wẽnde ne pãnga la b yikame n loe b noore, sõmbo,

¹⁰bãmba, b pagba, b kom-bõonego, b rũmsi. Sãamba sẽn da be-b ne bãmba, tʋʋm-tʋmdba, yemse, fãa yeelga sũ-pa-noang futu.

¹¹Zerizalɛɛm kẽedba fãa, pagba, kamba wõgemda wẽnd dooga noore. B yuga b zut tompɛglem, n zãag b mens ne faong la b yõka Soaala-Wẽnd sɛɛga.

¹²B tol n baoo kʋdse n tʋɩ n gũbg maan-kugrã. B fãa naaga taaba n kose, ne b pãng tɛka, tɩ Israyɛl Wẽnda da bas tɩ b kʋ b kamb ye; b ra bas tɩ b loog ne b pagb ye; b da bas tɩ b wã tẽnsã, b zu-noog pʋɩɩra ye, b ra bas tɩ bu-zẽmba paoog Soaala-Wẽnd la b rẽgem b roog ye.

¹³Soaala-Wẽnd kelga b pʋʋsgo, b gesa b nimbãanega. Zɩɩda tõre, la Zerizalɛɛm wẽnd dooga noore, neba loe-la b noor n kaoose.

¹⁴Maan-kʋʋd kãsenga a Zoakim, maan-kʋʋdb a taaba, wẽnd dooga tʋʋm-tʋmbda, fãa ra yera sũ-pa-noang futu n kʋʋd beoog-beoog maoongã, n kõt yamleoog kũuna.

¹⁵Ypgli wã meng ra yuga tompɛglem tɩ b kot Soaala ne b sũur fãa tɩ b wa ges b buudã.