Read SEBR SÕNGO, 1998 Zudit 5 Bible Online

Zudit 5 - SEBR SÕNGO, 1998 bible

Zudit 5

¹B wilga Asiri tãnsoab a Olofern tɩ Israyɛl kamb seglame n gũud-a. B wilg-a lame tɩ b ra yẽda tãmsa zut soya, n paas b tẽnsa sẽn zao tãmsa zut pãnga, n bao te-yoodo n pɩk n yẽd bãg-faasa soy.

²A sũur puuga wʋsgo t'a na n bool Moab dĩm dãmba, a Amon tãnsoaben-damba, mogra noor kombɛɛmba.

³Ad a sẽn yeele: «Kanaã rãmba, wilg-y maam buud ninga sẽn zao tãmsa zutã, wilg-y maam b sẽn kẽed tẽns niynsi, wilg-y maam b tãb-biis sõore, wilg-y maam b tõog la b pãnga sẽn be zĩig ninga, wilg-y maam dĩm ninga sẽn so-a tãpã.

⁴Bõe tɩ na-kãng ka sak m boolã, wala nin-taoor dãmba fãa sẽn maana?»

⁵Dẽ la Amonitsa tãnsoaba, a Akiyor, leok-a: «Kelg-y maam koɛɛga, m zu-soaba. M na n togs-y-la sɩda, tãmsa zut dãmba poorẽ. M noor ka na n yis bũmb sẽn wẽnd zirẽ ye.

⁶B yaa Kalde rãmb buudu.

⁷B waa n yii be n wa kẽ Mezopotami, tɩ b pa tʋlg n tũ wẽnd ning b saam dãmba sẽn da pʋgd Kalde tẽng ye.

⁸B basa b saam dãmb sore n na n waoog yĩngr Wẽnnaama, b sẽn waa n bãng-ba. B sẽn zãgs Kalde rãmba pʋgbo, b rig-b lame tɩ b zoe n wa kẽ Mezopotami la b kaoosa be.

⁹B Wẽnda wilg-b lame tɩ b yi be n tɩ kẽ Kanaã. B sɩd kẽngame, la b Wẽnda bʋʋg-b-la be, ne sãnem ka tɛka, ne wanzurf ka tɛka, ne rũms ka tɛka.

¹⁰B wa n kẽnga Ezipt tẽnga, tɩ kom n da waa n lʋɩ Kanaã. B paa be n na n bao rɩɩbo. Beenẽ b wekame n legb bu-yalengo.

¹¹Ezipt Naab yika ne-ba n nams-b ne tãnkoɛɛm wẽebo. B yãee paoogre, n tol n wa lebg yem-daado.

¹²B sẽn kelem ne b Wẽndã, bãas sẽn ka tõe n sãoog lʋɩɩ Ezipt tõre, tɩ Ezipt rãmb kong n dig-ba n zãage.

¹³Wẽnd kʋɩɩsa Rudum mogre b taoore,

¹⁴Wẽnd wilg-b-la Sinayi la Kadɛs-Barnea sore. B reng n pĩnga we-raadẽ dãmba fãa b taoore.

¹⁵B tɩ kẽe Amoritsa tẽnga, la b sẽn tar pãng yĩnga, b kʋʋ Esbõ dãmb fãa. Woto b rʋʋga Zʋrdẽ, n deeg tãmsa fãa n yãmbe.

¹⁶B yiisa b taoore, Kanaã rãmba, Perizitse, Zebuse rãmba, Sikɛm dãmba n paas Zirgazitsã. B kaoosa beenẽ.

¹⁷B sã n ka maan wẽng fãa, b gãe ne arzɛgse, b Wẽnda kisa wẽng buud fãa.

¹⁸Woto b sẽn bʋdg n kẽ moogo, b neb ka tɛka paa tãpẽ, tɩ sẽn kella wʋk n kẽng yembdo, tẽn-zãorgẽ. B luba b Wẽnda doogo, la b bɛɛbã n soog b tẽnsã.

¹⁹B le lɛɛg n kẽ-la b Wẽndã, n lɛɛg n wa tigim taaba, n lɛɛg n wa soog Zerizalɛɛm; b wẽnd dooga sẽn le me zĩig ninga, b tãnga sẽn da ya vɩʋʋgã le paama kẽedba.

²⁰Ade, m zu-soaba, d na n gesa bõe la b maan yã tɩ ka ta b Wẽnda yam, tɩ rẽ na n wa ne b lʋɩɩse, n yaool n tak zabr ne-ba.

²¹Sã n mik tɩ kongr buud ka be Zʋɩf rãmba zugu, bɩ m zu-soaba wa tɩ d bas-ba. B Soaalã, b Wẽnda na n gũ-b lame. La woto tõnd n lebgd ãndũni rãmb laado.»

²²A Akiyor sẽn gom n sɛ, la neba fãa sẽn sɩng bʋʋre rooga sɛɛga. Kãsem dãmba, mogra noorẽ dãmba, Moabitsã yeelame tɩ b yik tɩ kʋ-ba. B goma woto:

²³«Bõe yĩng la d na n zoe Israyɛl rabeem? B ka be võore, b ka tar pãng ye. B pa tõe n yaas n deeg zabr sẽn toe bilf meng ye.

²⁴Yik-y, d dʋ n babs-ba, tɩ d zu-soaba Olofern rɩɩbã ka na n yɩɩg yõng vuk ye.»