Read SEBR SÕNGO, 1998 Zudit 6 Bible Online

Zudit 6 - SEBR SÕNGO, 1998 bible

Zudit 6

¹Bʋʋra sẽn wa n base, tigsga zĩigẽ, Asiri tãnsoab a Olofern tãsa a Akiyor, sãambã la Moabitsa taoore. A yeelame:

²«Foo la a bõe, Akiyor, foo ne Efrayim rã-yũudba! Bõe tɩ f na n yik ne bãngr yaals niyns f sẽn togs ka rũnna n gɩdg zabr ne Israyɛl? F tẽed tɩ b Wẽnda na zab n sõng-ba. Ãnda la wẽnde n zʋʋg a Nabikodonozor? Yẽ n na n tool a pãnga n kɩt tɩ b menem moogo, la ka bãmb Wẽndã n na n fãag-b ye.

³Tõndo, a Nabikodonozor tãb-biisi, tõnd n na fẽd-ba wa nin-yende! B kõn yals tõnd wiida taoor ye.

⁴Tõnd na n sam-b-la taaba n yõog bugum. B tãmsa na yũ b zɩɩma n gãeeme, b pʋta na pid ne rɩga. B pa na n yals tõnd taoore, la ba a ye pa na n põse. Dũni dĩm a Nabikodonozor raab la woto. A gomame, la a goama kõn pa vɩɩd ye.

⁵La foo, Akiyor, Amonitga m sẽn yaood ne m ligdi, fo wɩsga f menga n yiis gomde, la ade, rũnna tɛka, m pa rat n le yãend-f ne m nif ye, n tãag m sẽn na n dok m sũurã ne sẽn yi-b Ezipt tẽng n zoe n wa ka wã.

⁶Ad m sã n dok m sũura ne bãmba n lɛɛg n wa, yaa m tãb-biisa kutu la m tãnsoaben-damba kãnde n na wurg f lugre.

⁷Ad m sõgen-kamba na n tall-f lame n tɩ bas tãmsa zut tẽng a ye noorẽ, tẽnga sigdgẽ.

⁸Fo ka na n ki tɩ b pa reng n baas tẽnga rãmb ye.

⁹F sã n tẽed tɩ tẽn-kãens pa na n lʋɩ m nugẽ bɩ f yõgem f noore! M koɛɛg la woto, la m gomd ba a ye ka paad n ka pids ye.»

¹⁰A Olofern yeela a sõgen-kambã tɩ b yõk a Akiyor, n tall-a n kẽng Betuli, n bas-a Israyɛl dãmb nugẽ.

¹¹B yõka a Akiyor n yi sikã n dɩk weooga sore, n tees tãngã, n ta bulsa sẽn be Betuli tãnga sɛɛga.

¹²Tẽnga rãmb yãend-b lame; b yii ne b zab teedo, n dʋ tãnga zug tẽnsʋka, tɩ loobsa rãmba tar lobr tɩ b ra tõog n dʋ ye.

¹³Woto wã b teka tãnga pennẽ n sẽb a Akiyor n bas-a be n lɛɛg n babs b zu-soaba.

¹⁴Israyɛl kamba sigame, n wa yals a Akiyor sɛɛgẽ, n lood a wĩyã, n tall-a n dʋs Betuli, n wilg tẽnga taoor dãmba.

¹⁵Da yaa a Oziyas, a Mise biiga, a Simeõ yagenga, n paas a Kabris, a Otoniyɛl biiga, la a Karmis, a Melkiyɛl biiga.

¹⁶Bãmb tigma tẽnga nin-kẽemba. Pabga la kamba me zoe n waame. A Oziyas yalsa a Akiyor sʋka, n sok-a bũmb ning sẽn maane.

¹⁷A sẽn yaag a noore a Akiyor wilga a Olofern ne a tãb-biisa sẽn yẽs bũmb ninga. A wilga yẽ meng sẽn leoke, b taoore, n wilg a Olofern zẽk-m-menga la a sẽn sãbsd Israyɛl to-to.

¹⁸Wakat kãnga, neba fãa kɩɩ b neng tẽnga, n waoog yĩngr Soaalã, la b tãsame:

¹⁹«Wẽnnaam, Yĩngr Soaala, ges-y nin-bãmba wʋglma sẽn ta zĩig ninga? Zoe-y tõnd buudã, b sẽn paoogda, nimbãanega. Ges-y n sõng rũnna, yãmb sẽn welg b rãmb toorã.»

²⁰B gãnega a Akiyor sũuri, n pẽga wʋsgo.

²¹Tigsga sẽn sɛ, a Oziyas tall-a lame n kẽes a zakẽ, la yẽ yĩnga, a boola kãsem dãmba tɩ b wa naag taab n dɩ, wa kibs raare. Yʋnga tõre, Israyɛl kell n kosa Wẽnd sõngre.