Read SEBR SÕNGO, 1998 Zudit 7 Bible Online

Zudit 7 - SEBR SÕNGO, 1998 bible

Zudit 7

¹Vẽkembeoogo a Olofern kõ-la a tãb-biisã la a sõangdba fãa sẽn da be a poorẽ wã noore tɩ b yik n kẽng Betuli n tɩ gɩdg tãmsã zut soya fãa la b sɩng zabre ne a Israyɛl.

²Dɩlla vugri bala, tãb-biisã fãa yikame. Tãb-biisã sẽn da bob zabrã, n da kẽn tẽnga, da yaa neb tus koabga la pisi tɩ wed-dʋʋdba ya tus piig la a yi, la b pa gomd sẽn da zɩt-b teedã la wulwaabdã sẽn da pʋgda ye.

³B rɩka bãg-faag ninga sẽn da pẽ Betuli la sẽn digd kʋɩlgẽ wã, n yaool n tɩ yɛdg Dotayim n tat Belbayin, n yegd Betuli n ta Kyamo, sẽn tot Esdrelõ.

⁴A Israyɛl sẽn yãend tãb-biis ka tɛka, a sɩnga rigbu la a ra yetame: «D miime marsã tɩ b na n põnga tẽnga zãnga. Tãms, bɩ londo, bɩ tãm-bi, ka tõe n deeg-b ye.»

⁵Ned kam fãa yii ne a sʋʋga, tɩ b na n widg bugum gasdã zutu la yʋn-kãnga, ned ba a ye pa gũs ye.

⁶Daar a yiib soaba a Olofern yii n tedga a wiidã Israyɛl dãmba sẽn da ya Betuli kẽedba nifẽ.

⁷A yãee soy niyns fãa sẽn kẽed tẽngã, a yãee b bulsa zĩiga la a tɩ yalsa a tãb-biisi bulsa sɛɛgẽ, la a meng lɛɛgame n bʋʋg tãb-biis a taabã.

⁸A Ezayu taoor dãmba la Moab nin-kẽemse la tãnsoaben-dãmba sẽn da be-b mogra noor kolgame n yeel a Olofern:

⁹«D zu-soaba, d kotame tɩ y kelg d neere tɩ woto tãb-biig ba a ye kõn paam sãmpogr ye.

¹⁰Ad-y Israyɛl kamba pa teeg b kãna wa b sẽn teeg b tẽnsa zãndlma ye. La sɩda b tãmsã rʋʋbo sɩd ka naana ye.

¹¹Sẽn ya woto wã, d zu-soaba, d da tak zabre ne b ye tɩ woto yãmb ned ba a ye kõn pa zabrẽ ye.

¹²Pa-y y sikẽ wã, yãmb ne y tãb-biisã la y bas tõnd bala tɩ d tɩ gũ kooma sẽn bund tãnga pennẽ.

¹³Yaa be la Betuli neba wat n yõngdẽ. Koom sã n ka sẽn yũuda, b na rɩk b tẽnga n sagl f nusẽ. Tõnd na n yãka d neb kẽere tɩ b rʋ tãmsa zutu, n wẽ b sika, woto ned ba a ye kõn tõog n yi b tẽngẽ wã ye.

¹⁴Koma na n zaba ne-ba, bãmb ne b pagba la b kamba, koma na n gãneg-b-la b soy zutu la b zagsẽ, tɩ pa tũ ne sʋʋg noor ye.

¹⁵Woto b na yao b zu-zẽkrã la b tõdgrã tɩ b ta b ligdi, tɩ b pa wa seg-f ne laafi segb ye.»

¹⁶B goama siga a Olofern sãbgẽ, n sig a tãnsoaben-dãmba sãbgẽ. Tɩ b yeele tɩ b na n tũu b saglgã.

¹⁷B yãka Moabit dãmba, n paas Asiri rãmb tus a nu. B tũu bãg-faagã, n tɩ reeg Israyɛl bulsã.

¹⁸Edom la Amon dãmba dʋʋ tãnga zug tẽnsʋka, tɩ Rotayim tẽng dɩg b taoore. La b tʋma kẽer yaang la rɩtgo, Egrebɛl taoore. Egrebɛl pẽe ne Kus n be Mokmur kʋɩlga noore. Asiri tãb-biisã sẽn kellã yɛdga tẽn-nabrã. B teeda da yaa wʋsgo, b sõora me da yaa wʋsgo, dẽ n kɩt tɩ b yɛdgrã yɩ yaleng la taok wʋsgo.

¹⁹Israyɛl kamba boola Naaba-Wẽnde; b ra basa raoodo, tɩ bɛɛba ra gũbg-b-la zĩis fãa, tɩ vɩʋʋg ka ket sẽn na n tũ n yi n zoe ye.

²⁰Asiri tãb-biis, sẽn kẽnd-b tẽnga, sẽn zao-b wiidi la bilim-bilma gũbga Israyɛl kamba dasem pis-tã la a naase. Betuli neba wa n yãee b ko-sĩmsi sẽn fẽbgde.

²¹Ko-bao wã me ra kʋɩɩme. Ned ba a ye ra ka le tõe n paam koom n yũ n tɩg ye. B ra pʋɩta kooma bilf bilfu.

²²Kom-bõonesã ra yɛɛme, pagba la kom-bɩɩba pãng ra sɛɛme. B ra rʋʋgda soya zutu, tẽnga noorẽ, tɩ ko-yũudã ra sɛ-la b pãnga.

²³Yaa rẽ yĩnga la zãma wã gilli, kom-bɩɩba, pagba, la kamba babs a Oziyas la tẽnga taoor dãmba la b zẽka b koɛɛga n kɛlemdẽ.

²⁴«Tõnd boonda Wẽnd tɩ b wa yals yãmb la tõnd sʋka n bʋ-do. Yãmb kɩtame tɩ tõnd dɩ bõne, y sẽn zãgs tɩ y kõn deeg Asiri rãmba ne zoodo.

²⁵Marsã ned ka kete sẽn tõe n zab n fãag-d ye. Wẽnd dɩka tõndo n bas b nugẽ tɩ ko-yũud na n lub-du, tɩ kũum na n loog ne d zãnga.

²⁶Bool-y bɛɛba mars-marsã bala. Bas-y tãnsoaba, a Olofern, neba tɩ b wʋk tẽnga rãmb zãnga.

²⁷D gesame tɩ d sẽn na n lebg bãmb soolem, n são. D na lebg yemb-daad yaa sɩda, la d na vɩɩnde, la d kõn yãe d kamba, d pagba la d yagens kũum ye.

²⁸Y sã n zoet saaga la tẽn-peelma la tõnd yaab rãmba Wẽnnaam sẽn sɩbgd tõnd rũnna, d beegra yĩnga, bɩ y maan boto rũnna bala.»

²⁹Zãma wã fãa naaga taaba n kelem n kot Naaba-Wẽnde tɩ b zoe b nimbãanega.

³⁰T'a Oziyas na n yeel-ba: «M saam-biisi, d da bas raood ye; d modge tɩ ta dasma a nu bala. Ka ne dasma a nu Naaba-Wẽnd, d Wẽnnaama, na zoe-d nimbãanega, tɩ b ka na n kell n bas-d woto zãng ye.

³¹Dasem a nu sã n looge tɩ sõngr buud ka wa, m na maan wala y sẽn wilgã.»

³²La a kɩtame tɩ ned kam fãa leb a sakẽ; rapa pĩnga pagba la kamba tɩ b leb yiri la bãmb dʋʋ lal-gũbrã la tẽnga gasdo. Tẽnga rãmb fãa yam da bondga zãnga.