Read SEBR SÕNGO, 1998 Zudit 8 Bible Online

Zudit 8 - SEBR SÕNGO, 1998 bible

Zudit 8

¹Yaa baraare la a Zudit me tɩg yɛla zãnga. A ra yaa a Merari biiga. A Oks biiga, a Zozɛf biiga, a Oziyɛl biiga, a Elkiya biiga, a Anani biiga, a Zedeõ biiga, a Rafayin biiga, a Akitob biiga, a Eli biiga, a Kelkiyas biiga, a Eliyab biiga, a Natanayɛl biiga, a Salamiyɛl biiga, a Sarasadayi biiga, a Zakoob biiga.

²A Zudit sɩd yʋʋre da yaa Manase, b fãa da yaa roog a ye, a Simeõ roogo. A Manase da ki alkam kɛgenga tigsg wakato.

³A ra be a pʋʋgẽ n get a neba sẽn wʋkd kalsã, la wĩndga toolem kɩtame t'a vik n lʋɩ. A sẽn kẽ roogo, a pa yi ye. A kii Betuli; b mum-a-la a saam dãmba yaadẽ. La yaada da bee Dotayim la Balamo tẽnsʋka.

⁴A Zudit sẽn lebg pʋg-kõore a pa-la a zakẽ, yʋʋm a tã la kiis a naase.

⁵A gaosga zugu a manega roog a to n kẽed be. A ra sẽgna peen gʋsdo. A futã, a sẽn da yerã da yaa kʋ-rɩt futu. A ra loeta a noore,

⁶beoog sẽn vẽeg fãa, sã n ka vʋʋsg raar ket tɩ beoogo, bɩ vʋʋsga daare, ki-paalg yit tɩ beoogo, ki-paalg yiib daare la Israyɛl kamba sẽn tar kibs kãsens daare.

⁷A ra yaa neere, n sakd gesgo. A sɩda, a Manase, ra bas-a-la ne sãnem la wanzurfu, rakõapa, roog kamba, rũmsi, pʋto; a sɩd da tara naare.

⁸A yaool n ka yãend wɩdg ye t'a ra zoeta Wẽnnaam wʋsgo.

⁹A Zudit wʋmame tɩ ko-yũuda da kɩtame tɩ Israyɛl zãma wã bas raoodo, n tɩ guglem ne tẽnga naaba. A bãnga a Oziyas sẽn da leok bũmb ninga, a sẽn tol n kãab t'a na n basa neba bɛɛba nugẽ, sã n maan dasma a nu.

¹⁰A tʋma a rooga biiga tɩ b bool tẽnga nin-kẽemse, a Kabris ne a Karmis.

¹¹B sẽn ta, a yeel-b lame: «Kelg-y m koɛɛga, Betuli rãmba. Y ka maan neere, y sẽn gom n leb zĩig ning rũnna wã ye. Y yeela nebã, n wẽen yãmb ne Wẽnd sʋka, tɩ y na n dɩka tẽnga n sagl d bɛɛba nusẽ, Soaala sã n ka wa sõng-do, ka ne rasma a wãna.

¹²Wao! Yãmb la a bõe n na n fɛɛs Wẽnd dũnna, ninsaalb kamba?

¹³Marsã yãmb n fɛɛsd Soaala, Pãng soaba. Y yama ka na n tol n lik laa?

¹⁴Y ka tõe n wʋm sẽn be ninsaal sũurẽ, y yɩta a wãna n bãng Wẽnd dẽnna? Bãmb sẽn maan bũmb fãa, y yɩta a wãna n bãng b sẽn tagsde la b sẽn date? D gũusi, m saam-biisi, n da puug d Soaala-Wẽnd sũur ye.

¹⁵Wala b sã n ka yals tɩ b na n fãaga tõnd tɩ rasma a nu wã nan ka ta, yeelame tɩ b ka le tõe n gũ tõnd laa? Wẽnd sã n data b ka tõe wakat fãa n menes tõnd d bɛɛba taoor laa?

¹⁶Yãmb ka tõe n kos Soaala-Wẽnde, tɩ b wilg y vẽenega b sẽn yals bũmb ning ye. Yãmb ka tõe n modg Wẽnd wa ninsaal ye, yãmb ka tõe n kõ-b raare wal b sẽn kõt ninsaal ye.

¹⁷D bool-ba ne saagre tɩ b wa fãag-do. B sã n data b na kelg d koɛɛga.

¹⁸Sã n ya sɩda, d ka wʋm dũnna bɩ raar sẽn ka zãre, tɩ d saka, d tẽn-bil bɩ d tẽn-kãsenga, tɩ wõgemda wẽn-naand taoore, wala b sẽn maan pĩnd ye.

¹⁹Wɩɩbd kãnga n kɩt tɩ sʋʋg kood d yaab rãmba, n kɩt tɩ b zɛ b laogo, n kɩt tɩ b pa bɛɛba nusẽ.

²⁰Tõnd yẽ, d ka mi Wẽnd a to sã n ka Naaba-Wẽnd ye, woto wã d tõe n saagame tɩ b kõn ges d kegr ye la b kõn bas d buuda ye.

²¹B sã n yõg tõndo, wala yãmb sẽn bilgdã, yaa Zɩɩda tõre la b na n sooge, b na n zɛ d wẽnd doogã, la tõnd sã n bas tɩ b rẽgem wẽnd doogã, tõnd n bao d wãabo.

²²D saambiisa kũum, b pa-weer sor dɩkre, d buuda wãabo, Wẽnd na n soka tõndo, tɩ na n tũu ne tõndo tɩ b tall-do n kẽng yembd bu-zẽmba sʋka, la yãnd na yõk-do, la d Soaala na bao d vɩɩma võor n konge.

²³D yembdã ka na n le wa ne Wẽnd zood ye, d Soaala na n kɩtame t'a lebg sɩbgr sẽn wat ne d yãnde.

²⁴Ade, m saam-biisi, d lʋɩ taoore n fãag d buudã, n fãag sẽn yaa d zu-zẽkre, d wẽnd doogã la a maan-kugrã tɩ b põasg bee ne tõndo.

²⁵Woto, wã d pʋʋs Soaala barka, tɩ b fɛɛsa tõnd wala d ba rãmba.

²⁶Tẽeg-y b sẽn maan ne a Abraam, ne a Izaak. A Zakoob sẽn yãe bũmb ning fãa Siri la Mezopotami, a sẽn wa n kɩɩmd a yesba a Labã piisã, da yĩm-y rẽ fãa ye.

²⁷Wala b sẽn fɛɛs-ba n bãng b sũuri, woto me d namsgã, ka b sũur la Wẽnd dokd ne tõnd ye, yaa d saglgo, tɩ woto la b maand ne b sẽn nong b rãmba.»

²⁸A Oziyas leoka a Zudit: «F sẽn yeela fãa, yaa ne yam sõngo, la ned ba a ye ka na n kɩɩs ye.

²⁹Sɩda ka rũnda bal la f yẽesma pukr ye. Neba fãa gill bãngame tɩ f yam yaa põomde la f sũur nonga neere al tɩ f nan paooda.

³⁰Yaa ko-yũudã sẽn da zabd wʋsgã, la d kong n kãabe; sẽn waa d noorẽ la d kong n wẽene.

³¹Fo sẽn ya pag sẽn mi pʋʋsgã, kos tɩ Wẽnd sik saluka n pids d ko-bao wã tɩ ko-yũud da le kʋ-d ye.»

³²Dẽ la a Zudit leok yã: «Kelg-y-m neere. M na n maana bũmbu buuda kamb sẽn na n tẽeg zamaan n dabd zamaana.

³³Yʋngã bɩ y yals tẽnga noore, m na n yii ne m doog biiga, la m tẽed tɩ tʋʋmd ninga m sẽn na n tʋma, na kɩt tɩ Wẽnd lɩk n sõng a Israyɛl tɩ raara yãmb sẽn yalsa nan pa ta ye.

³⁴Da bao-y n bãng m sẽn na n maan a soab ye. M kõn wilg-y tɩ m pa reng n tʋm ye.»

³⁵A Oziyas ne a taoor dãmba yeel-a lame: «Kẽng ne laafi, Wẽnd na togl f so-sõngo tɩ f rok f sũur ne d bɛɛbã!»

³⁶Dẽ poore marsã b sigame n leb b zĩigẽ.