Read SEBR SÕNGO, 1998 Zudit 9 Bible Online

Zudit 9 - SEBR SÕNGO, 1998 bible

Zudit 9

¹A Zudit kɩ-la a neng tẽnga, n yug a zug ne tompɛglem, n yeeg peen gʋsd fut niyns a sẽn da yerã, la a zẽka a koɛɛg n bool Soaalã. Yɩɩ wakat ning b sẽn wisd zĩ sobd tɩdarã Zerizalɛɛm wẽnd dooga pʋgẽ. Ad a sẽn yeele:

²«Soaala, yãmb ninga sʋʋga m yaab a Simeõ nugẽ t'a sɩbg bu-zẽn sẽn da maan a tão pãnga n lodg a sẽbdga, n ning-a yãnde, n maan ne-a sẽn kisi.

³La rẽ yĩnga y kɩtame tɩ b kʋ b kãsem-dãmba. Bãmb sẽn maan zãmbã, b zãmba bãmb me. B sẽn dẽgem bi-pugla zĩig ningã, gãag kãng mada ne b mens zɩɩm. Y naaga talg ne na-biig n wẽ, n naag naam ne a zaoore n sãam.

⁴Y basame tɩ b loog ne b pagba, n bas tɩ b tall b kom-pugli n loog yembdo. B sẽn da so fãa lebga yãmb bu-nongra pʋɩɩre, lebga a Israyɛl pʋɩɩre, tɩ bu-kãng gesa bi-pugla yãnde wa buuda fãa rẽnna, n yik n yõk y sɛɛga. M Soaala-Wẽnde, zoe-y m nimbãanega, zoe-y pʋg-kõora nimbãanega.

⁵Sẽn zĩnd pĩnda, sẽn be marsã, sẽn na n yaool n wa ka ling yãmb ye. Sẽn be rũnna, sẽn na n wa beoogo, yãmb tar-a-la y yamẽ, sẽn looge yaa sẽn da be y yamẽ.

⁶Y sẽn dat bũmb ning fãa waame n yeele: ‹D bee ka!› Y soya fãa zoe n tukame n dɩga, y bʋʋda zoe n kaoome n bĩngi.

⁷Ges-y Asiri nebã, b teega b tãpa pãng bala, n pẽgd b wiidi, la b wed-dʋʋdba, n kilsd b nao wã rãmba. B teega b kãna la b gãndo, n teeg b pɛɛm la b loobse. B ka bãng tɩ yãmb la Wẽnde, tɩ yãmb la yĩngr Tãnsoaba ye.

⁸Yãmb n sɩd boond tɩ Soaala! Bɩ y pãng wõr n bʋke, bɩ y sũ-puura bõgs-b kanga. B datame n dẽgem y ro-sõngã, n dẽgem y sõmblema sẽn wẽ b sika zĩig ningã, n sãam y maan-kugra neerem ne b kut doɛ.

⁹Ges-y b tɩtaama, bɩ y sũura bugum lʋɩ b zutu, kõ-y pʋg-kõorã nuga pãng ninga a sẽn saagde.

¹⁰Bɩ m noora belgre wa ne bõne, n wa ne zu-soab bõne, n wa ne a yamba bõne, n kʋ naab ne a sõgne. Bɩ pag nug sik b wilg-m-menga.

¹¹Ka tãb-biis sõor la pãng ye, ka pãn-tõog la naam ye. Yãmb yaa nimbãan-dãmb Wẽnde, sẽn yãet-b tooga Sõngre, koms rãmb Rasaare, b sẽn bas b rãmba Soondg zĩiga, sẽn ka le tar-b saagra Fãagda.

¹²N-ye! M ba rãmb Wẽnde, Wẽnd ninga a Israyɛl sẽn paam wala a zu-noog pʋɩɩre, yĩngr la tẽng Soaala, kooma Naanda, naand fãa Naanda, reeg-y m kosgo.

¹³Zãms-y m gom nood yiisgu, tɩ m tõog n pogle la m kʋ neb niyns sẽn dat-ba n tʋm tõnd sablgo, n dat wẽng ne y zo-rãmba, ne y ro-sõngã, ne Siõ tãn-sõngã, ne y kamba tẽnga.

¹⁴Kɩt-y tɩ roog fãa bãng, tɩ sak fãa bãnge, tɩ yãmb la Naaba-Wẽnde, pãng la tõog rãmb Wẽnde. La b bãng t'a Israyɛl ka tar teegd a to sã n ka yãmb ye.»