Read SEBR SÕNGO, 1998 Ezipt yiib kibare 12 Bible Online

Ezipt yiib kibare 12 - SEBR SÕNGO, 1998 bible

Ezipt yiib kibare 12

¹ [32†] Soaala-Wẽnd yeela a Moyiiz ne a Aarõ Ezipt tẽnga:

²«Kiuug kãnga n na n lʋɩ kiis a taaba taoore: yẽnda n na n yɩ yʋʋmda pipi kiuugu.

³Yeel-y Israyɛl zãma wã woto: kiuug kãnga dasem piig daare, bɩ ned kam fãa bao rũm-bila. Zak fãa ya rũng a ye, roog fãa yaa rũng a ye.

⁴Zak sã n paood n ka tõe n sɛ rũng tõre bɩ a tɩ fãoog a yaka, a tɩ fãoog ne sẽn pẽ-a yẽnda n yɩɩda t'a neba me zemse. Ges-y ned kam fãa sẽn tõe n dɩ tɛka n bãng n yãk rũngã tɩ wa zemse.

⁵Rũnga kõbg ka na n lɩʋʋs ye, rũnga na n yɩɩ raoogo, na n yɩɩ yʋʋmd a ye rũnga; tõe n yɩɩ pesg bɩ bʋʋga.

⁶Rũnga na n basame n tãag kiuuga piig la a naas raare; baraar zĩ-sobdo, b na kodg-a, neba fãa taoore.

⁷B na yãk a zɩɩm n taag roog ning rɩɩba sẽn na dɩẽ wã. Rũnga zɩɩm yãkdame n taag kʋɩlenga ne a ra-lugs a yiibã la a rignoorã rĩiri.

⁸Yʋn-kãnga yaa nem-sẽedgo la y na n wãbe la b na n wãb-a-la ne bur sẽn ka ning bɩlle la ne vã-tɩɩsense.

⁹Da saag-y n dɩ sẽn ya kãad bɩ sẽn dʋg ye, sẽn sẽ bugmẽ bal la y na n wãbe; naag-y zugã ne karsã la yãadã.

¹⁰Da kell-y bũmb beoog yĩng ye. Zĩig sã n yẽege, rɩk-y sẽn ketã n yõog bugum.

¹¹Yaa woto la y na n wãb rũngã: y sẽbgda y sɛɛga, n pid neooda, n zãad dasaare. Y na n dɩɩ ne yãgbo. Soaala pɩʋʋga y sʋk baraare.

¹²Yʋn-kãnga m na n pɩʋʋga Ezipt tẽnga, m na n kʋʋ bõn-dẽemsa fãa sẽn be Ezipt tẽnga: ninsaalba wala rũmsi. Woto m na rok m sũuri ne Ezipt wẽn-naandsa fãa. Yaa maam, Naaba-Wẽnd, n gome.

¹³Zɩɩma n na wilg yãmb sẽn kẽed dot niynsi. M sẽn yãe zɩɩma zĩig ning fãa, m na n londga yi-kãnga, woto tẽn-kũuma daare, m sẽn na n sɩbg Ezipt raare, y na põse.

¹⁴Daara na n yɩɩ y Wẽnda sẽn tẽeg y yella raara. Y na n yiime n tong taaba n maan kibs Soaala yĩnga, zamaan woo zamaana.

¹⁵Dasem a yopoe tõre, ket n yaa Soaala n gomde, y na n dɩɩ bur sẽn ka ning bɩlle. Y na n sɩnga pipi daarã n menes bɩll y zagsẽ, tɩ ned ninga fãa sẽn na n dɩ bur sẽn wẽ ne bɩlle pipi raarã n tãag a yopoe raarã, a soab na n kiime.

¹⁶Y na n maana tigẽng kãsenga pipi raarã. A yopoe raarã me yɩ boto. Badaare tʋʋmd buug pa tʋmd ye, sã n ka rɩɩb seglgo bala.

¹⁷Y na n deega bur pa lobd bɩlla noore. Y na n maana kibs n tẽeg tɩ badaare m yiisa y buuda Ezipt tẽnga. Yals-y kibs kãnga zamaan woo zamaana. Yaa Soaala-Wẽnd meng noore y sẽn tog n deege.

¹⁸Dɩlla pipi kiuugã, a piig la a naas daar zĩ-sobdo, n tãag a pisi la a ye daare, zĩ-sobdo, y na n dɩɩ bur sẽn ka ning bɩlle.

¹⁹Dasem a yopoe wã pʋgẽ bɩ m da yãe bɩll y zagsẽ ye, tɩ ned ninga sẽn na n wãba bur sẽn ning bɩlle, m na n yiis a soab Israyɛl buudẽ. A yaa tẽnga ned bɩ sãana, b na n yiis-a-la buudẽ.

²⁰[33†] Da rɩɩ-y bur sẽn ning bɩlle ye; y sẽn be zĩig ning fãa, dɩɩ-y bur sẽn ka ning bɩlle.»

²¹A Moyiiz tigma a Israyɛl nin-kẽemba fãa n yeel-ba: «Tɩ bao-y rũm-bõonego, pe-bil bɩ bulla, zak woo zaka, n kʋ paka, tẽegra, yĩnga.

²²Y na kao vãado n tʋm zɩɩma sĩngẽ, n yãk zɩɩma n bol dignora rĩiri la ra-lugs a yiibã. Sã n ka beoog n vẽege, bɩ ned ba a ye da saag n yi yɩng ye.

²³[34†] Wotone Soaala-Wẽnd sã n wa saagd Ezipt tẽng n na n kʋ, b sã n yãe zaka t'a rignoora la ra-lugsã bola ne zɩɩm, b na looge n ka kẽ yi-kãng pʋg ye, la kũum kõn ki y zagsẽ ye.

²⁴Woto me na n yɩɩ noor y sẽn na n deeg, yãmb ne y kamba, zamaan woo zamaana.

²⁵Y sã n wa kẽ tẽng ning Soaala sẽn na n kõ yãmbã, y na kell n maan boto.

²⁶Y kamb sã n wa sok yãmba: ‹Yaa bõe la y maand woto.›

²⁷Y na leok-ba: ‹Yaa pak maoong la d kʋʋda, Wẽnnaam waoogr yĩnga, tɩ Ezipt tẽnga b londga Israyɛl kamb zagse n tɩ kʋ Ezipt rãmba n yaool n bas tõndo.› » A Moyiiz yaool n kɩtame tɩ neba yĩgimd n waoog Soaala-Wẽnde.

²⁸Israyɛl kamb sẽegame. B reega noora zãnga. B maana bũmb ning fãa Wẽnnaam sẽn wilg a Moyiiz ne a Aarõ.

²⁹ [35†] Yʋn-sʋka, Soaala-Wẽnd kʋʋ sẽn yaa bi-rẽeng [36] fãa Ezipt tẽnga: dĩma bi-rẽeng sẽn da na n led a ba a zaoorẽ, wala yem-daada kom-dẽems. Yɩɩ woto me ne rũmsã.

³⁰Ezipt dĩma ne a poorẽ dãmba la Ezipt buuda neb fãa nekame. Kɛleng kãseng n kelme, tɩ b zak ba a ye pa zĩnd tɩ kũum pa ki a pʋgẽ ye.

³¹Dĩma boola a Moyiiz ne a Aarõ tɩ zĩig nan pa yẽeg ye. A yeel-b lame: «Kẽng-y n tɩ waoog y Soaala-Wẽndã wala y sẽn kosã.

³²La wala y sẽn kosã, loog-y ne y rũmsi, bɛd la bõonego la y tak y Wẽnda bark m zugu.»

³³Ezipt nebã, b toore, n da tusd Israyɛl kamba tɩ b ning pãng n yi b tẽngẽ tɩ b ra ki ye.

³⁴Neba yiime; b baoo lagd niyns sẽn tar n wẽed burã n wʋk b zoma sẽn nan ka paam n mikã n sẽb ne futu n tʋk n looge.

³⁵Israyɛl kamb maana wala a Moyiiz sẽn da yeele, n kos Ezipt rãmba fan teedo, sẽn dõog ne sãnem bɩ ne wanzurf la b kos-b-la fut n paase.

³⁶[37†] Wẽnnaam kõ Ezipt rãmb yam sõngo la b sak n penga b teedã. Woto me la Israyɛl paam n loog ne Ezipt rãmb paoongo.

³⁷Israyɛl kamba yii Ramsɛs n tees Sukot. B da taa neb tus kobs-yoobe. Sõda rapa bala, ka paas b zak rãmb ye.

³⁸Yɩɩ zãma kãseng n pʋg-ba, n paas rũmsi, bɛd la bõonego, ka tɛka.

³⁹B yãka zoma sẽn wer Ezipt tẽngã n dõos miisdu. Zoma ka paam n wuk ye. B sẽn dig-b tɩ b yi ne yãgbo b ka paam n bao sor dɩɩb ye.

⁴⁰[38†] Israyɛl kamb zĩnda Ezipt tẽng yʋʋm kobs-naas la pis-tã, n na n yaool n wa looge.

⁴¹Yɩɩ kobs-naas la pis-tã wã baasg raare, ra-kãseng raare, la Soaala yiis b neba bal-bal Ezipt tẽnga.

⁴²La Wẽnnaam nif sẽn pa mum yʋn-kãng tɩ Israyɛl kamba paam n loogã, togame tɩ Israyɛl kamba me bas gõeem yʋn-kãng tẽegr yĩnga, n waoog Soaala-Wẽnd la na n yɩɩ woto zamaan sẽn wate.

⁴³Soaala-Wẽnd yeela a Moyiiz ne a Aarõ: «Noy-niyns sẽn get tẽegra raare la woto: Sãan ba a ye ka tog n naag-y ye.

⁴⁴Sã n ya ned f sẽn da ne ligdi, yẽ soab tõe n naagame, a yee n kẽe bãongo.

⁴⁵Ned sã n nok foom bɩ a sã n tʋmdame n deegd ligdi, yẽ soab ka tõe n naag n dɩ kibsa ye.

⁴⁶[39†] Zak fãa pʋgẽ, yaa roog a ye tãa pʋgẽ la b na n dɩ tẽegra rɩɩbo. Nem-võr meng ka tõe n yi ro-kãng pʋg ye. Kõbr ba a ye me ka wekd ye.

⁴⁷Yaa Israyɛl zãma wã fãa n tog n maan tẽegra raare.

⁴⁸Sãan sã n be y tẽngẽ t'a me rat n tẽeg raarã, n waoog Wẽnnaam, bɩ rao fãa sẽn be a zakẽ, deng n kẽ bãongo. Wakat kãnga a tõeeme t'a lebga wa tẽnga biiga. La sẽn ka kẽ-a bãong ka tõe n naag ye.

⁴⁹Noora yaa no-yɛnga, sãamba la tẽnga dãmba yĩnga.»

⁵⁰Israyɛl kamb sak n maana wa Wẽnnaam sẽn togs a Moyiiz ne a Aarõ.

⁵¹Yaa baraar meng la Soaala-Wẽnd yiis Israyɛl kamba, b tãb-biis la b rũms Ezipt tẽnga.