Read SEBR SÕNGO, 1998 Ezipt yiib kibare 13 Bible Online

Ezipt yiib kibare 13 - SEBR SÕNGO, 1998 bible

Ezipt yiib kibare 13

¹Wẽnnaam yeela a Moyiiz woto:

²[40†] «Kõ maam pag pipi biig fãa sẽn ya raoa, n dog Israyɛl tẽn-peelmẽ, tɩ m sooge. Kom-dibli wã, maam n na n sooge; na n yɩɩ boto me ne rũmsã kom-dẽemse.»

³A Moyiiz yeela nebã: «Tẽeg-y daar ninga yãmb sẽn yi Ezipt, y yembd tẽnga. Wẽnd pãng n sõng-y tɩ y paam n yi; daara tẽegr daare, bɩ y da rɩ bur sẽn ning bɩll ye.

⁴Y yita Ezipt tẽng rũnna, Abib kiuugu, bõn-bɩʋng kiuugu.

⁵Soaala-Wẽnd sã n wa kẽes yãmb Kanaã rãmba, Ititse, Amoritse, Ivitse la Zebuzitsa tẽngẽ, tẽng ning b sẽn kãab y ba rãmba, tẽng sẽn zoet bĩisim la sɩɩdo, y na vẽ ne bur sẽn ning bɩll rɩɩbo, kiuug kãnga pʋgẽ.

⁶Dasem a yopoe tõre, y kõn sɩɩs bur sẽn ning bɩll ye la a yopoe daarã, y na maan kibs n waoog Naaba-Wẽnde.

⁷Dɩlla yaa dasem a yopoe tõre la y ka na n dɩ bur sẽn ning bɩlle. Dasem a yopoe pʋgẽ, b kõn yãend-a f zakẽ, b kõn yãend-a tẽnga pʋgẽ ye.

⁸Badaare y na togs y kamba woto: ‹Wẽnd sẽn maan tõnd neere n yiis-d Ezipt tẽnga la d tẽegda.›

⁹Yeel-y-b tɩ bura sẽn ka ning bɩllã yaa tẽegre wa wiifu sẽn kɩ kanga bɩ rĩiri. A na tẽeg-y tɩ y kils Soaala-Wẽnd tɩ yaa bãmb n yiis-y ne pãng Ezipt tẽnga.

¹⁰F na reeg no-kãnga yʋʋmd-yʋʋmd fãa, a wakato.

¹¹Wẽnnaam sã n wa kẽes foo Kanaã tẽnga wala b sẽn kãab foo ne f yaab rãmba, b sã n wa pids b kãabgã,

¹²[41†] f na kõ Soaala-Wẽnd, pag fãa pipi bi-ribla la rũng fãa pipi bi-raoogo; Sẽn ya raoogo la pipi biig fãa, yaa Wẽnd n so.

¹³Sã n ya bõn-dibla, f na bao pe-bil n teke. F sã n ka rat n teke bɩ f wẽ a kãarã n wãag. F tog n bao bũmb n ledg bi-ribl fãa zĩigẽ. F ka teke, Wẽnd n so.

¹⁴La beoog raarã, f biiga sã n wa sok fo: ‹Rog-n-mik kãnga võor yaa bõe?› F na yeel-a: ‹Yaa Wẽnnaam pãnga sẽn tõe bũmb fãa wã n yiis tõnd Ezipt tẽnga yembdẽ.

¹⁵Dĩma sẽn da ka rat tɩ tõnd loogã, Soaala-Wẽnd kʋʋ Ezipt kom-dẽemsa fãa: yɩɩ ninsaalba la rũmsa kom-dẽemse. Yaa rẽ yĩng la sã m ya rũnga, m kʋʋda a pipi biig sẽn ya raoogo; sã n ya ninsaala, rũng la m baood n ledg a zĩigẽ n kʋ.›

¹⁶Soaala n tʋm b pãng tʋʋma n yiis tõnd Ezipt tẽnga, la rẽ na n yɩɩ tẽegr wa wiifu sẽn kɩ f kang bɩ f rĩirẽ.»

¹⁷Ezipt dĩma basa Israyɛl kamb tɩ b looge. Wẽnd yaool n ka sak tɩ b rɩk Kanaã tẽnga sor ye; yẽnda n yaool n da ya tɩrga. Wẽnnaam da yeela b menga: B sã n yãg n sɩng zaba ne b bɛɛbã sẽn ka tɛkã, b wat n basa raood n leb Ezipt tẽnga.

¹⁸Yaa rẽ yĩng la b kɩt tɩ b rɩk soe gõdem-gõdem n tees we-raoogã la Rudum Mogre. Israyɛl kamba sẽn yi Ezipt da pa kẽnd yaar ye, b tonga wa tãb-biis sẽn dabd zabre.

¹⁹[42†] A Moyiiz tẽeg n wʋka a Zozɛf kõaba; a Zozɛf sɩd da yeela a saam-biisã: «Wẽnnaam na n wa ges-y lame la wẽen-y tɩ y na zɩ m kõabã.»

²⁰Israyɛl kamba yika Sukot n wa yals Etam, we-raooga noore.

²¹Naaba-Wẽnd ra lʋɩta b taoore. Wĩntoogo, da yaa sawadgo, n wilgd-b sore, la yʋngo yaa vẽenem n tilgdi, n vẽnegd b sore la woto, wĩntoog bɩ yʋngo, yaa kẽnd bala.

²²Sawadga ka viigd wĩntoog bada, la yʋngo vẽenema n deegd a zĩiga. Wĩntoog wala yʋngo, sora ra vẽnega b taoore n dɩga.