Read SEBR SÕNGO, 1998 Ezipt yiib kibare 14 Bible Online

Ezipt yiib kibare 14 - SEBR SÕNGO, 1998 bible

Ezipt yiib kibare 14

¹Soaala-Wẽnd goma ne a Moyiiz woto:

²«Yeel Israyɛl kamba tɩ b lɛɛg n wa wẽ b sika Pi-Ayirot, Migdol la mogra sʋka, n get Baal-Sefõ b taoore. Yaa be, mogra noorẽ, la y na n yaas.

³Ezipt dĩma na n yeela a sũurẽ: ‹Israyɛl kamba taa we-raoogẽ n ka le mi b goabg la b rɩtg ye, tɩ we-raooga na n dɩ-ba.›

⁴M na n kidba dĩma sũuri t'a yik n pʋg yãmba la m na tʋm tʋʋmd sẽn na n wa ne m yʋʋra kilsgu. Dĩma ne a tãb-biisa na bãng tɩ maam la y Wẽnde.» Israyɛl deega Soaala-Wẽnd noore.

⁵B sẽn wa n wilg Ezipt dĩma tɩ Israyɛl kamba loogame, yẽ ne a poorẽ dãmba sũur ka yɩ noog ye. B yeelame: «Tõnd maana a wãna n ka na n zã Israyɛl kamba wa yem-daado n bas-b tɩ b looge?»

⁶Dĩma kɩtame tɩ b sog a bilim-bilma wiidi, t'a yi ne a tãb-biisi.

⁷A yii ne bilim-bilm kobs-yoob sẽn da ya sõma n yɩɩd b taaba, a yii ne Ezipt tẽng bilim-bilm fãa la yaa neb sẽn mi weoofo n da zãad-ba.

⁸Wẽnnaam kidba dĩma sũuri t'a yik n na n babs a Israyɛl sẽn da loog ne yẽesem.

⁹Ezipt rãmbã, dĩma wiidi, bilim-bilm, wed-dʋʋdba, tãb-biisi, fãa pʋg-b lame n ta b sikã, mogra noorẽ, be la Pi-Ayirot ne Baal-Sefõ tot taaba.

¹⁰Israyɛl kamba gesame la b yãee Ezipt rãmba sẽn zoet n pʋgd-ba tɩ rabeem kãseng yõk-ba, tɩ b sɩng n kaasd ne Soaala.

¹¹B yeela a Moyiiz: «Yaad n sɛ Ezipt tẽng bɩ bõe tɩ f tall-d tɩ d wa ki we-raoogẽ? Ezipt tẽng yiiba yõoda la bʋgo?

¹²Tõnd da ka pĩnd n yeel foom Ezipt tẽng bɩ: Bas-d tɩ d tʋm Ezipt rãmba yĩnga tɩ rẽ n são d sẽn na n ki we-raoogẽ!»

¹³Dẽ la a Moyiiz yeel-ba: «Yiis-y rabeem buud fãa y sũurẽ, da bas-y raood ye, y na n yãee Naaba-Wẽnd sẽn na n maan bũmb ninga n fãag yãmb dũnna raarã. Bãng-y tɩ y sẽn ne Ezipt rãmba dũnna, y kõn le yãend-b bada.

¹⁴Soaala-Wẽnd na n zaba yãmb zĩigẽ, yãmb tek yaa gesg bala, y kõn maan bũmb n paas ye.»

¹⁵Soaala-Wẽnd yeela a Moyiiz: «Bõe yĩng tɩ f kelemd-m woto? Yeel Israyɛl kamba tɩ b le dɩk sore.

¹⁶Fo yee n zẽk f dasaarã, zẽk f nug mogra zug, wẽ-a ne rasaarã t'a welg a yiibu, tɩ Israyɛl kamba loog sʋka tɩ b naoor meng ka madg ye.

¹⁷M na n kidba Ezipt neba sũuri la b na n kẽeme n pʋg yãmba la m na n tʋma raood ne dĩma, ne a tãb-biisã, ne a bilim-bilm, ne a wed-dʋʋdbã.

¹⁸Woto Ezipt rãmb na bãng tɩ maam la y Wẽnnaam, m sã n maan daood n tõog dĩma ne a tãb-biisã, ne a bilim-bilma, ne a wed-dʋʋdbã.»

¹⁹Wẽnd malɛka sẽn da kẽnd Israyɛl kamba taoor teema zĩig n wa poorẽ. Sawadga me leba poorẽ n yaase.

²⁰A tɩ yalsa Ezipt la Israyɛl tãb-biisa sʋka n maan lik sẽn ya lik menga. Zĩig sẽn waa n yẽege, b yãendame tɩ b pa tol n kolg taab yʋnga tõr ye.

²¹A Moyiiz tẽega a nug mogra zugu. Yʋnga tõre Soaala-Wẽnd kɩtame tɩ yaang sob-raoog fʋʋs mogrã n kʋɩɩs a kooma; kooma yalsa goabg la rɩtgo, n bas sʋka koɛɛnga.

²²[43†] Israyɛl kamba dʋʋga mogra nao-koɛɛnga, b kẽna sʋka, tɩ koom yɛs wa lalga, b rɩtgo la b goabga.

²³Ezipt sɩnga pʋgbo; dĩma, a bilim-bilma, a wed-dʋʋdba, fãa kẽeme n pʋgda, n wa ta sʋka.

²⁴Beoog sẽn waa n kolg vẽegre Soaala-Wẽnd zĩnda sawatẽ wã n ges Ezipt tãb-biisã n kɩt tɩ bũmb fãa lebg zũngu.

²⁵B gɩmba b bilim-bilma karse tɩ kẽnd lebg nimbãanega; Ezipt rãmb kelmame: «D zoe la d bas Israyɛl kamba tɩ Soaala sõngd-b lame n bas Ezipt rãmba.»

²⁶Soaala-Wẽnd yeela a Moyiiz: «Tẽeg f nug mogra zugu tɩ kooma lɛɛg n wa seg Ezipt rãmba ne b bilim-bilma la b wed-dʋʋdbã.»

²⁷A Moyiiz tẽega a nugu, la zĩig sẽn waa n yẽegdẽ, kooma leba a zĩigẽ. A sega Ezipt kamba sẽn da lɛɛg n zoetẽ n menes-b zãnga.

²⁸Kooma waa n dɩɩ bilim-bilma, wed-dʋʋdbã. Dĩma tãb-biisa sẽn da pʋgdã, ba a ye ka tõog n põs ye.

²⁹Sa n ya a Israyɛl kambã, bãmb paamame n dʋʋg nao-koɛɛnga, tɩ koom yɛs wa lalg b goabg la rɩtgo.

³⁰Badaare Wẽnd fãag-b-la Ezipt rãmb nusẽ. A Israyɛl yãee Ezipt rãmba sẽn ki n dʋr mogra noore.

³¹A Israyɛl yãee ne a nifu, bõn-bãnd ning Soaala-Wẽnd sẽn maane n wã Ezipt rãmb zãnga. A Israyɛl zoe Soaala-Wẽnde, a tẽe Naaba-Wẽnd la b tʋʋm-tʋmd a Moyiiz.