Read SEBR SÕNGO, 1998 Ezipt yiib kibare 15 Bible Online

Ezipt yiib kibare 15 - SEBR SÕNGO, 1998 bible

Ezipt yiib kibare 15

¹ [44†] A Moyiiz ne Israyɛl kamba naaga taab n yɩɩl yɩɩn kãnga n na n pẽg Soaala-Wẽnd. Ad-b sẽn yeele: M kilsda Naaba-Wẽnde tɩ b tʋma tʋʋm bãnde. B sẽn tus wed-dʋʋd ne a weefo yɩɩ koomẽ, faoo!

² [45†] M pãnga la m ziirã, yaa yãmba, m Soaala. Yãmb n yɩ m Fãagda, yãmb la Wẽnd tɩ m na n pẽg yã, yãmb la m yaab rãmb Wẽnde tɩ m na kils yã.

³Soaala yaa Tãnsoaba, Naaba-Wẽnd la b yʋʋre.

⁴Dĩma bilim-bilm ne a tãb-biisi, fãa loba koomẽ, faoo! Wed-kɩɩm mitba gilli Rudum Mogr pa kees ba zoobgo.

⁵Kooma lim-b-la zãnga, B lisa bõra, wala kug-sĩdma.

⁶Soaala, y nug rɩtgã ka solg a pãng ye, y nug rɩtgã, Soaala n fẽd bɛɛba zutu wa noaba.

⁷Y sẽn yik n yals y naoor zugu y fabsa bɛɛba tẽnga, y sẽn puug y sũuri, a bugma rɩ-b-la wa moogo.

⁸Wẽnd sẽn tĩs b tĩsga, koom sũu taaba, koom yalsa a meng wa lalga, Kooma taa ko-sʋka, n ka wa baafo.

⁹Bɛ wã ra yetame: M sẽn digi, m pa yõke, la m sẽn yõk na lebg m pʋɩɩre! Ka rɩɩb la m na n dɩ m yam? Ya m ta n wõog m sʋʋga ya m nug tʋk n looge!

¹⁰Mik sobg la Soaala na n fʋʋse tɩ mogra lɛɛg n pil-b wa rebre, Mik b na n lisa wa namdo la ko-vɛlga ka na n kees bũmb ye.

¹¹Yãmb ka be taar ye, Soaala! Ãnda n zem yãmb ne sõmblem? Ãnda n tõe tʋʋm-bãn wa yãmba? Ãnda n tõe n pẽg wa sẽn segde, sẽn ka vʋʋsda ne tʋm tɩ ninsaal yãend n pĩ a noorã?

¹²Yãmb sẽn tees bɛɛba ne y nugu, la tẽnga sẽn sɩng b velbo.

¹³Y pidsa y kãoobgo y sẽn da kãab y buudu; y tall-a-la ne pãnga n tɩ kẽes y zag sõngẽ.

¹⁴Dũni rãmb wʋmame n lɛɛg n zĩ ne yɩɩre. Ad-y Filisti rãmb digimda waoodo,

¹⁵tɩ Edom dĩm dãmb saood kalwaare. Moab na-komse la Kanaã zãng fãa gilli lebga rigbu la yɩɩre.

¹⁶B yɛɛsa b rabeem yɛɛsgo n tiig n lebg mugsi n tiig n lebg wa kugri, tɩ yãmb neba lood b loogre, Soaala, tɩ zooda kamb kẽnd ka mi tadgre.

¹⁷Y soolma rãmba, Soaala, ya y tãnga zug la y rʋʋs-ba, be la b rʋ n na n zĩnd n kaoose Yaa zĩ-kãng la y segl y meng yĩnga, Be la y yãk y waoogr zĩiga tɩ b na n ti b rot be. Ro-sõng la y nuga ti n kõ-b be Ro-kãng pʋgẽ la b na n waoog yã.

¹⁸Soaala soog naam zamaan ne zamaana!

¹⁹Ezipt dĩma weef kẽe mogrã ne a bilim-bilm, ne a wed-dʋʋdba, tɩ Naaba-Wẽnd kɩt tɩ kooma seg-ba. Sã n yaa Israyɛl kambã, bãmb yaool n taba tẽn-koɛɛng n looge.

²⁰Bãngd poaka, a Miriyam, a Aarõ tão, yika ne a gãngão-gilga. Pagb a taaba me yika ne b rẽnda n sigl saooga,

²¹t'a Miriyam na n pʋd yɩɩn kãnga: D yɩɩl n kils Wẽnnaam tɩ b tʋma raoodo, weefã ne a wed-dʋʋdã, b tusa fãa n lub koomẽ!

²²A Moyiiz kɩtame t'a neba yik mogra noor n dig Sur zĩ-peen-daagẽ; b kẽna dasem a tã n pa tol n tuk koom ye.

²³B sẽn ta zĩig a ye, b pa tõog n yũ be kooma ye t'a da yaa toog lig-ligi: pʋs n yaa rẽ yĩng la b boond tẽnga tɩ Mara.

²⁴Neba guglma ne a Moyiiz la b yeelame: «Bõe la d na n yũ?»

²⁵A Moyiiz yõka Soaala-Wẽnd sɛɛga la b wilg-a-la tɩɩg buud a ye t'a na n kʋʋg a raoogo. A sẽn dɩk-a n los koomẽ, kooma lebga noogo. Be la Soaala-Wẽnd wilg a Israyɛl sẽn kis la sẽn gɩdge, be la b kõ-a noore, beene me la b fɛɛs a sũuri. B yeela woto:

²⁶«Fo sã n kelg Wẽnd gomde, fo sã n maan sẽn ya neer b nifẽ, fo sã n deeg b noya, fo sã n maan b raabo, m kõn sak tɩ yel-beed niyns sẽn nams Ezipt rãmba ta foo ye, tɩ maam, Naaba-Wẽnd, la bãag fãa tɩɩm.»

²⁷B taa Elim. Buls piig la a yi, n paas koms pisopoe, n da be be, tɩ b sig n gãand be, kooma noore.