Read SEBR SÕNGO, 1998 Ezipt yiib kibare 21 Bible Online

Ezipt yiib kibare 21 - SEBR SÕNGO, 1998 bible

Ezipt yiib kibare 21

¹ [77†] Soaala-Wẽnd paasame: «Ad noya a taaba f sẽn na n kõ Israyɛl kambã:

²Fo sã n da yamba, sẽn ya Ebre buudu, a na n tʋma f yĩng yʋʋm a yoob bala. Yʋʋmd a yopoe soabã, a tõe n loogame, a so-la a menga tɩ ka tũ ne ligd yaoob ye.

³A sã n wa-la a ye, a kuiisa a ye. A sã n waa ne paga, paga me naagd-a lame n looge.

⁴Sã n yaa a zu-soab n kõ a pagã, tɩ paga rog kamba, kom-dibli bɩ kom-pugli, paga ne kamba ya a zu-soaba soolem, a sã n yita, a yita a ye.

⁵Yem-daooga sã n yeele: ‹M nonga m zu-soabã ne m pagã la m kambã, m pa na n loog ye,›

⁶[78†] a zu-soaba leokdame t'a basa yella ne Wẽnde, a na n yalsa yambã n pẽneg a roog kʋɩlenga bɩ a lugri. A na n dɩka pĩim n vʋdg yem-daoogã tʋbre la a na n pa-la a zu-soaba soolmẽ wakat buud fãa.

⁷Ned sã n koos a bi-pugla t'a lebg yem-poaka, bi-kãng ka fãagd a meng wa yems a taab ye.

⁸A sã n ka ta a zu-soaba yam, t'a zu-soaba yeel t'a pa le rat-a, bɩ b yao n deeg-a. La b ka tõe n zãmb-a n dɩk n koos ne bu-zẽn ye.

⁹A sã n da raa bi-puglã a biig yĩnga, a na tũ noora sẽn wilg zak kom-pugli poorẽ.

¹⁰Yem-poaka zu-soaba sã n dɩk pag a to n paase, bũmb ka tog n woog pipi paga nengẽ, wala dɩɩbo, futu la roog pɩɩgr ye.

¹¹B sã m mong-a bũmb a tãabã, a tõe n loogame tɩ ka tũ ne ligd yaood ye.

¹² [79†] Ned ning fãa sẽn wẽe a to n kʋ, yẽ soab me tog n kiime.

¹³[80†] A sã n pa gẽes a bɛ wã n wa paam-a n kʋ, b sã n da ka mi taab tiiri n seg taaba tɩ yõor yãke, b na wilg yẽ soaba zĩig a ye t'a zoe n tɩ solg be.

¹⁴Ned sã n gẽeg a tũud-n-taag bɩ a sã n bẽd-a n paam n kʋ, ba yẽ soab waa n gãd maan-kugrã, bɩ b yõk-a n kʋ.

¹⁵Ned ninga fãa sẽn wẽe a ba bɩ a ma toga ne kũum.

¹⁶ [81†] Ned sã n yõk a to, n na n soog tɩ b wa bãnge, a koos-a lame bɩ a nan ka paam n koos-a, yẽ soab toga ne kũum.

¹⁷ [82†] Ned sã n tʋʋs a ba bɩ a ma, bɩ b kʋ yẽ me soaba.

¹⁸Neb sã n yik zabr ne taaba tɩ nin-yend wẽ a to ne kugri bɩ ne nugu, n ka kʋ-a ye, la a pogl-a lame t'a ka tõe n le yi yɩnga,

¹⁹bɩ a tõe n tika rasaar n paam yɩnga, b pa na n kʋ sẽn waa ne sãmpogra ye. La yaa pakre t'a yao bãada bũmbu, a sẽn ka le tõe n bao n kõ a noora yĩnga la a tɩbs-a t'a wa sãoog zãnga.

²⁰Ned sã n wẽ a yem-daogo bɩ a yem-poaka, ne guugu, tɩ yõor yãke, b tog n kʋʋ yẽ soab me.

²¹Sẽn deega wẽeda sã n põse, ba ya daar a ye bɩ dasem a yi, b kõn kʋ a zu-soaba ye, t'a sõda ligd n da-a.

²²Rap a yiib sã n zab taaba, n wa tus tʋtre-pʋg n lub la pʋga ka sãam ye, b na n yaoo paga sɩd sẽn yet tɩ b yao bũmb ninga, kaset dãmba taoore.

²³Kũum sã n ki, yõor n don yõore,

²⁴[83†] tɩ nif don nifu, tɩ yẽnd don yẽnde, tɩ nug don nugu, tɩ naoor don naoore.

²⁵Sã n yõog bugum, yõogdame n lebse. Yũur n don yũuri, tɩ toog don toogo.

²⁶Ned sã n wẽ a yem-daoog bɩ a yem-poak n feoog a nifu bɩ a bas-a t'a yembda sɛɛme, a nifa sẽn feooga yĩnga.

²⁷Yem-daooga bɩ yem-poaka yẽnd sã fɩrge, yembda sɛɛme, zu-soaba sẽn fɩrg a yẽnda yĩnga.

²⁸Loalg sã n tãag rao bɩ pag n kʋ, b labda loalga ne kuga. B kõn wãb a nemd ye la b ka maand a zu-soaba bũmb ye.

²⁹Naafa sã n da tãadame t'a soaala mi tiiri n yaool n ka maand gũusgu, a sã n tã n kʋ pag bɩ raoa, b labd-a-la ne kug la b kʋʋda a soaala me.

³⁰B sã n bas naafa soaalã n ka kʋ, n yeel-a t'a yao, a tog n yao b sẽn saag-a bũmb ning fãa n paam n põse.

³¹Sã n ya bi-ribla bɩ bi-pugla la naafa kʋ yã, bɩ b maan wala sẽn zoe n togsã.

³²Sã n yaa yem-daoogo bɩ yem-poaka la naafa kʋ yã, a soaala tog n yaoo zu-soaba kiuug a ye tõr yaoodo. Naafa na n laba ne kuga.

³³Ned sã n tuk bok bɩ bulga n bas-a n ka page, tɩ naf bɩ bõang lʋɩ a pʋgẽ,

³⁴sẽn tuka bokã bɩ bulgã na n yaoome; a na bao ligd n kɩs rũnga soaala la a soog rũnga sẽn ki wã.

³⁵Niis sã n zab taab t'a ye ki, b na n koosa nag-vɩɩgã n pʋɩ taab a ligdi. B pʋɩta taab nag-kɩɩnga me.

³⁶Nag-vɩɩgã soaal sã n da mi t'a naafa yõgdame la a ka gũ-a neere, yaa nag-vɩɩg la a na n dole la a soog rũm-kɩɩngã.

³⁷Ned sã n zuk loalg bɩ pesgo n tɩ kʋ bɩ n tɩ koose, yaa niis a nu la a na n yao n dol loalgã, la yaa piis a naas la a na n yao n dol pesgã.