Read SEBR SÕNGO, 1998 Ezipt yiib kibare 22 Bible Online

Ezipt yiib kibare 22 - SEBR SÕNGO, 1998 bible

Ezipt yiib kibare 22

¹Ned sã n poog roogo n na n zu, tɩ b paam-a n kʋ, b ka raagd zɩɩm n dol ye.

²Sã n yaa zĩig sẽn yẽege la b wẽ-a n kʋ, b kʋʋdame n dole. Wagdr buud fãa tog n yao a sẽn zuki, a sã n ka tõe n yao, yẽ meng la b koosd n yao.

³A sã n ket n tar a sẽn zukã, naafo bɩ bõanga, bɩ rũm-bila, yaa niis a yi bɩ bõeens a yi, bɩ rũm-bõones a yi la a na n yao.

⁴Ned sã n tar wãbneg zĩiga n yaool n bas a rũms tɩ b tɩ kẽ ned a to pʋʋgẽ, a na yao wa pʋʋga soab sẽn da saagd yõod ningã ne a pʋʋga bɩ ne a tɩɩsã, yʋʋmd kãnga.

⁵Ned sã n yõog moogo tɩ bugma rɩ tuudã n wa long n dɩ kood sẽn wʋr n same, kood sẽn nan ka kẽebe, kood sẽn nan ka bɩ, mo-yõaada tog n yao bugma sẽn sãama.

⁶B sã n bobl ned bũmbu, ligd bɩ bũmb a to, tɩ b wa zuki, b sã n yõk wagdrã, b kɩtdame t'a yao a sẽn zukã naoor a yi.

⁷B sã n ka paam wagdrã n yõke, sẽn deega bobellã na n taa Wẽnd taoore n wẽen tɩ ka yẽ n dɩk ye.

⁸Zãmb sã n maan naaf poorẽ, bɩ bõanga, bɩ rũm-bila, bɩ fuugu, bɩ bũmb a to sẽn meneme poorẽ, tɩ b wa yeele: foo la zãmba soaba, ad bʋʋda kaooda Wẽnd taoore. Sẽn konga bʋʋm Wẽnd taoora yaooda naoor a yi.

⁹Ned sã n dɩk a rũng n gũnug ned a to, wala bõanga, naafo, rũm-bila, rũng buud fãa, tɩ rũnga wa ki, bɩ a poglame, bɩ b soos n zuk-a lame,

¹⁰neb a yiibã tata Wẽnd taoore n wẽen ne Wẽnde. Woto b bãngda rũnga gũudã sã n dɩkame, bɩ a sã n ka rɩk a to bũmbu. Rũnga soab sã n deeg t'a yeela sɩda, gũuda ka na n yao bũmb ye.

¹¹Rũnga sã n zukame t'a pa zãr ne zakã, b tog n yaoo rũnga soaba.

¹²Sã n ya we-rũng n yõk-a n zerme, a wat n wilga a sẽn paam n deege la samd ka le ket a zug ye.

¹³Ned sã n peng a to rũnga, tɩ rũnga naoor bɩ a karg kaoog, bɩ a kiime, la ka yɩ a soaala nifẽ ye, sẽn penga rũnga tog n yaoome.

¹⁴Rũmga sã n ki a zu-soaba nifẽ, samd ka le ket sẽn peng a soaba zug ye. Rũnga soab sã n da yeele: deeg rũng n tʋmnẽ la f yaood-ma, yaa yaood ning sẽn da sedã la a na kell n deege.

¹⁵Ned sã n belg pa-kuli n yo ne-a, a yaooda ligd la a reegda bi-puglã n maan a paga.

¹⁶[84†] Bi-pugla ba sã n zãgs t'a ka na n kõ a bi-pugla, rao wã yaooda ligd ning b sẽn geend pʋg-sɛdba kulsg yĩnga.

¹⁷ [85†] Da bas-y t'a vɩɩnd yãmb sʋka, pag sẽn dɩ tɩt n maand bõn-bãn ye.

¹⁸ [86†] Ned sã n wɩɩb ne rũnga, bɩ b kʋ a soaba.

¹⁹ [87†] Ned sã n kʋ maoong n waoog wẽn-naands bɩ b kʋ-a. Naaba-Wẽnd bal la b waoogd ne maoongo.

²⁰ [88†] Da yaal sãana la f ra yɩ nin-toaag ne-a ye tɩ fo me yɩɩ sãan Ezipt tẽnga.

²¹Da nams pʋg-kõor la kɩɩb ye.

²²Fo sã n nams-ba tɩ b wa yãb m taoore, m na n kelga b koɛɛg.

²³M sũura na n puugame tɩ m bas tɩ sʋʋg kood yã, tɩ y pagb lebg pʋg-kõapa, tɩ y kamb lebg kɩɩ-bi.

²⁴ [89†] Fo sã n peng tẽnga biig ligdi, fo sã n peng naong soab sẽn be f zakẽ, da bao n na n dok yõod ye, da kɩt t'a yao n yɩɩg a sẽn deeg ye.

²⁵Ned sã n ka tar bũmb n na n yao tɩ fo reeg a fu-yorgo, tɩ lebs-a a fu-yorgã, zĩig sã n sobge.

²⁶[90†] Rẽ bal la a tar n lut a menga, yaa rẽ la a tar n yerẽ la yaa rẽ la a tar n pinnẽ. A sã n yãb m taoore, m na n kelg-a lame tɩ m yaa nimbãan-zoeta.

²⁷ [91†] F kõn tʋʋs Wẽnd ye, f kõn kãab buud kãsem wẽng ye.

²⁸Da kaoos n kõ Wẽnnaam f kood paalga sẽn yɛs ne bao tɩ f rã paalga pid ne rʋgd ye. Rɩk f bi-kẽeng fãa n kõ maam.

²⁹Maan boto me ne f rũmsi, bɛd la bõonego. Rũnga bi-rẽeng paada ne a ma dasem a yopoe, la dasem a nii daarã fo wat n kõ-a-la maam, Naaba-Wẽnde.

³⁰ [92†] M datame tɩ y yɩ nin-sõma. Y kõn wãb nemd, we-rũng sẽn yõk ye, rɩk-y nemd kãnga n kõ baase.