Read SEBR SÕNGO, 1998 Ezipt yiib kibare 24 Bible Online

Ezipt yiib kibare 24 - SEBR SÕNGO, 1998 bible

Ezipt yiib kibare 24

¹Soaala-Wẽnd da yeela a Moyiiz: «Dʋ tãngã n kolg maam, kɩt t'a Aarõ, a Nadab, a Abiyu la a Israyɛl nin-kẽems pisopoe yãag foom. Y na n wõgemda tẽng tɩ y nan ket yɩɩga.

²Foom a Moyiiz bala n na n kolge; sẽn yãag b fooma ra kolg ye la zãma wã kell n paa a zĩigẽ.»

³A Moyiiz waa n lɛɛg n sigame, n wilg neba Soaala-Wẽnd koeesã la bũmb ning fãa sẽn na n lebg modgre tɩ b tũ; neba naaga taab n leoke: «Soaala-Wẽnd sẽn yiis noy niyns fãa tõnd na reege.»

⁴A Moyiiz gʋlsa Soaala-Wẽnd sẽn wilg-a bũmb ning fãa la vẽkẽmbeoogo, sõor sẽn waa n pukdẽ, a mee maan-kugri tẽn-nabrẽ la a sela kug piig la a yiibu, a Israyɛl sags piig la a yiiba yĩnga.

⁵A tʋma Israyɛl kom-bɩɩba tɩ b kʋ yũ-noog maand [103] Soaala yĩnga la b kood lol-bõonese tɩ b lagem taab n dɩ Soaala taoore.

⁶A Moyiiz yãka zɩɩma pʋɩ-sʋka n ning laasẽ la a rɩka sẽn kellã n daal maan-kugrã.

⁷A rɩka zooda sebr n karem tɩ neba fãa naag taab n yeele: «Soaala-Wẽnd sẽn yals bũmb ning fãa tõnd na tũ; tõnd na reege.»

⁸ [104†] Dẽ la a Moyiiz yãk zɩɩma n mes nebã n yetẽ: «Zɩɩm kãnga yaa zood kaseto, zood ning Soaala sẽn yõg ne yãmba n kõ yãmb b noya.»

⁹A Moyiiz kɩtame t'a Aarõ la a Nadab la a Abiyu la nin-kẽems pisopoe yãag-a tɩ b leb tãnga zugu.

¹⁰B yãee Israyɛl Wẽnnaam, b yãee b naoẽ wã, kug sẽn ya kẽeg lima sẽn gãneg la sẽn pɩn wa saag menga.

¹¹Soaala-Wẽnd pa sɩɩs neb niyns sẽn paam-ba n kolg bãmba ye. Nin-bãmb yãend-b-la ne b nifu. B yaoolame marsã n dɩ la b yũ.

¹²Naaba-Wẽnd yeela a Moyiiz: «Dʋ n babs maam tãnga zugu la yals be tɩ m kõ-f kug-paklse: bãmb zug la m gʋls m sẽn na n zãms-y noy niynsã.»

¹³A Moyiiz yika ne a sõgen a Zozuwe tɩ b rʋ Wẽnd tãngã.

¹⁴A reng n yeela nin-kẽembã: «Yaas-y n gũu-y-du, tɩ d dʋ la d lɛɛg n wa. A Aarõ ne a Ur na n paa ne yãmba. Ned sã n tar koɛɛga bɩ a ta bãmb taoore.»

¹⁵A Moyiiz rʋʋ tãngã la sawadg luda tãngã.

¹⁶Soaala-Wẽnd ziira paa Sinayi tãnga zug la rasem a yoob pʋgẽ sawadga lud-a lame. Daar a yopoe soabã, Soaala-Wẽnd zĩnda sawadgẽ n bool a Moyiiz.

¹⁷Israyɛl kamba ra bee tẽng n ne Soaala-Wẽnd ziira sẽn yãng tãnga zug wa bug-witem.

¹⁸[105†] A Moyiiz kẽe sawadgẽ wa, a rʋʋ tãngã la a paa be dasem pis-naase, wĩndig la yʋngo.