Read SEBR SÕNGO, 1998 Ezipt yiib kibare 28 Bible Online

Ezipt yiib kibare 28 - SEBR SÕNGO, 1998 bible

Ezipt yiib kibare 28

¹Soaala-Wẽnd yeela a Moyiiz: «Bool f kẽem a Aarõ ne a kamba, a Nadab, a Abiyu, a Elazar la a Itamar. Fo na n welg-b-la ne Israyɛl kamb a taaba la maan-kʋʋr tʋʋmd la b na n tʋm m zakẽ.

²F kẽem, a Aarõ, yĩnga, sẽ wẽnd doog fu sõma sẽn na n pids-a ne faong la ziiri.

³Bʋʋg sʋls niyns sẽn tʋmd b sõma n yɩɩdã, m sẽn kõ b rãmb yam sɩlengã, tɩ b wʋg a Aarõ yĩnga, fut a sẽn na n yeelg a maan-kʋʋra tõoga reegr daare la a sẽn na n yeelg n tʋm maan-kʋʋra tʋʋmde.

⁴Ad b sẽn na n wʋge: sãnem-pɛ-m-yãoogo, bag korgo. N paas sãnem-pɛ-m-poore. N paas fu-yorg kãsenga. N paas fu-yorg-bil sẽn maneg n buki ne gĩs neeba. N paas zu-vindga la sẽbdga. F kẽema, a Aarõ, n na n yeelg fu-bãmba. Maan-kʋʋra yĩng me, bɩ b sẽ fut a Aarõ kamba yĩnga.

⁵B sẽn na n dɩk bũmb ning n wʋg-ba: yaa sãnem, yaa peen-mismiidu, gĩs miidu, gĩs moam yʋs, gĩs bãanese.

⁶Yaa sʋls sẽn mi b tʋʋmde n na n wʋg sãnem-pɛ-m-poorã. Wʋgd-a-la ne sãnem, ne gĩs mismiidu, gĩs miidu, gĩs moam yʋs, ne beren-dɩgr gĩs peels sẽn dĩng tɩ kẽ. Yɩta tʋʋmd mit n na n tʋm-a.

⁷Peenda noya a yiibã na n ninga peen-dis a yiibu sẽn naag n sẽ ne fuugã t'a wa tõog n loe maan-kʋʋda sɛɛga.

⁸Peen-disa sẽn tar n loet sãnem-pɛ-m-poorã wʋgda ne gĩs miidu, gĩs mismiidu, gĩs moam yʋs, gĩs peels sẽn dĩng tɩ kẽ, la sẽn naag n sẽ ne-a.

⁹B na n dɩka kug sĩdma a yi sẽn yãgd wa nin-gɛtga la sẽn ya kẽeg-kẽega la b na n gʋlsa a Israyɛl kamba yʋy b zugu.

¹⁰Pipi kugra zugu yaa Israyɛl kamba yʋy a yoob la b na n gʋlse. Kugra a yiib soaba zug la b na n gʋls a yooba sẽn kellã, la yaa yʋʋr fãa ne a pʋgdga, wala kamba sẽn pʋg taab rogmẽ.

¹¹Yaa ned sẽn minim n gʋlsd kugr zugu ne kɩtga n na n gʋls Israyɛl kamba yʋy. Ka bũmb sẽn na n wẽneg n yẽes ye. Sãnem paklg pʋg la b na n lɛɛg n gãneg kuga ne yʋy wã sẽn gʋls b zugã.

¹²Kug a yiibã na n wa tablga ne sãnem-pɛ-m-poorã. Kug bãmb yaa Israyɛl kamba tẽegr bũmbu la a Aarõ zɩt-b la a bãgd zugu, Soaala taoore.

¹³Dõog sãnem nug-bĩnsi.

¹⁴Maan sãnem yãndo, bãmb b yiibu; maan-b wa pãnenga. Pãneng fãa na n wa soga ne sãnem nug-bĩnga.

¹⁵Sãnem-pɛ-m-yãooga na n wʋga ne sãnem, ne gĩs mismiidu, gĩs miidu, gĩs moam yʋs, gĩs peels sẽn maneg n dĩng tɩ kẽ, wala sãnem-pɛ-m-poorã.

¹⁶Yaa gɩf yalem la woglem sẽn zems kãntɩɩg pʋɩ-sʋka.

¹⁷F na n bao kug neeba n zap n tong rũns a naase. Pipi rũnuga na n yɩɩ kug zẽego, kõodr pespele la toenɛɛga.

¹⁸Rũnug a yiib soaba: moomde, kẽega la kõodre.

¹⁹Rũnug a tãab soaba: kugr sẽn bẽes miuug la sabla, kõodr sẽn lɩʋʋs miidu la mismiuugu.

²⁰Rũnug a naas soaba: yirg gelle, rulg lɛlma la bɩrba. Kug bãmb fãa na n zapa ne sãnem.

²¹Kugr a ye fãa tara a Israyɛl biig yʋʋre la b sõora yaa piig la a yiibu: Yʋʋra na n gʋlsame tɩ kẽ kugrã wala bũmb sẽn ka tõe n yẽese. Buuda sak fãa tara a kugri.

²²F na n dɩka sãnem gĩs n pãnem wa wĩiri n loe sãnem-pɛ-m-yãoogã.

²³F na n kuda sãnem kags a yi. Yaa sãnem-pɛ-m-yãooga yĩngr kɩrems a yiibã la b na n soge.

²⁴Sãnem pãneng fãa loeta ne sãnem-pɛ-m-yãooga kagsã.

²⁵Sãnem pãnenga noor fãa wat n soga ne sãnem-pɛ-m-yãooga gaagdse la woto a luunda neer maan-kʋʋda taoore.

²⁶F na n le rõoga sãnem kalem-bãense n ning sãnem-pɛ-m-yãooga tẽngr kɩrems a yiibã, la be la a na n wa loe ne sãnem-pɛ-m-poorã.

²⁷F na n le rõoga sãnem kalem-bãens a yiibu n loe-b ne sãnem-pɛ-m-poora peen-disgã. B wat n soga ne sãnem pãnenga la kagsã.

²⁸Yaa peen mismiuugu n loet sãnem-pɛ-m-poor ne sãnem-pɛ-m-yãoogã, la bũmb fãa yɛsa a zĩigẽ.

²⁹Woto a Aarõ sã n kẽ wẽnd doogẽ Israyɛl kamba yʋy gʋlsa a yãoogẽ la woto, maam, Naaba-Wẽnd, kõn yĩm y yell abada.

³⁰[116†] Foom, Moyiiz, fo na n suii sãnem-pɛ-m-yãooga sẽn yaa korga pʋga bũmb a yiibã sẽn tar n sokdẽ la b tar n bãngd Wẽnd leokra yaa n-yẽe, bɩ ayoo wã. A Aarõ tar-b-la a yãoogẽ, a sã n wat Soaala-Wẽnd taoore; la woto me a tara Wẽnd leokrã a sẽn na n taasd Israyɛl kamba wakat buud fãa.

³¹Maan fuug a to sãnem-pɛ-m-poora sẽn na n buug a soabã. Yẽ yaa mismiuugu zãnga.

³²Ning loor a tẽnsʋkã tɩ yaa fu-yorgo. Loora na n yɩɩ tʋʋmd mit tʋʋmde. A na n yɩɩ gilga, la a na n kãda wala gãmbre sẽn na n yɩlẽ t'a ra tõog n kẽeg lɛ-lɛ.

³³Fuuga tẽngre, n gilgi, gʋle ne gĩs mismiidu, ne gĩs moam yʋs, ne gĩs peelse tɩ-biis wa pooloomse. F na n soga loamba sẽn dõog ne sãnem.

³⁴Tɩ-biis wa pooloomsa ne sãnem loamba wã na n lɩʋʋs-lɩʋʋsa taaba n gilgi.

³⁵Fu-kãng la a Aarõ na n yeelg a tʋʋmda yĩnga. A sã n wa kẽedẽ bɩ a sã n wa yit wẽnd doogẽ, b wʋmda loamba wã bʋʋre la woto a kõn ki ye.

³⁶F na n dõoga ne sãnem yɩlenga bũmb sẽn tar neerem la sẽn wẽnd puugu. Gʋls a zugu ne kut tɩ kẽ, wala kaset gʋlsem la gʋls woto: Welga toor Wẽnd yĩnga.

³⁷F na n sog-a-la ne peen mismiuugu n loe zu-vindgã tɩ gʋlsma be taoore.

³⁸A Aarõ sẽbgda bõn-neerã a rĩirẽ a sẽn wat wakat ning fãa maam, Naaba-Wẽnd, taoore la woto m na reeg kũun niyns fãa a Israyɛl kamba sẽn na n kõ-ma, ba b sã n ket n be tudgr la zɩɩlem pʋgẽ.

³⁹F na n wʋga fu-wok pɛɛlgã. F na n sẽe zu-vindga sẽn ya pɛɛlga, n paas sẽbdga — la rẽ fãa na n yɩɩ tʋʋm mit tʋʋmde.

⁴⁰A Aarõ kamba yĩnga, maan fu-yordo la sẽbdse. Paas pugli tɩ pugl n wat ne naam la ziiri.

⁴¹Kɩt tɩ f kẽema, a Aarõ ne a kamba ning-ba. Taag kaam b dĩiri tɩ b paam n sɩng b tʋʋmde. Welg-b toore n kõ maam tɩ b yɩ m maan-kʋʋdba.

⁴²Sẽ kur koees n kõ-b tɩ b sẽgne. Bãmb me na n wʋga ne gĩ bãanese la b na n sigame n ta gɛ wã.

⁴³A Aarõ ne a kamb na n yeelga boto b tʋʋmda wakato, woto me b kõn kolg b zaal maan-kugra ye; ka rẽ b na maan bũmb sẽn ya wẽnga n sek b kũum. Woto yaa noor sẽn kõn teem abada, a Aarõ ne a yagensa yĩnga.»