Read SEBR SÕNGO, 1998 Ezipt yiib kibare 3 Bible Online

Ezipt yiib kibare 3 - SEBR SÕNGO, 1998 bible

Ezipt yiib kibare 3

¹A Moyiiz da kɩɩmda a rɛɛm piisi, a rɛɛmba boondame tɩ Zetro, [11] n ya Madiã maan-kʋʋd. A Moyiiz waa n talla piisã n zãage, a waa n taa Oreb, Wẽnd tãnga zugu.

²Wẽnnaam malɛka [12] waa lik-a-la be bugum sʋka. Yɩɩ tuug sẽn dɩt bugum pʋgẽ. A Moyiiz gesame la ade: tuuga da wita bugum la bugma yaool n da pa rɩt tuuga meng ye.

³Dẽ la a yeel yã: «M na n gilgame n ges bõn-bãnde, n bãng sẽn ya bũmb ninga la tuuga wit bugum n yaool n pa rɩtẽ ye.»

⁴Wẽnnaam yãeeme t'a sɩd kolgda n na n paam n ges neere la b zĩnda tuugẽ wa n bool-a: «Moyiiz, Moyiiz!» T'a yeele: «Ad ma!»

⁵Tɩ b yeel-a: «Da kolg ye la piid f neooda wã tɩ fo sẽn tabd zĩig ninga yaa zĩ-sõngo.»

⁶Wẽnnaam le paasame: «Ad yaa maam la f ba rãmb Wẽnnaam, a Abraam Wẽnnaam, a Izaak Wẽnnaam la a Zakoob Wẽnnaam.» A Moyiiz sẽn wʋm dẽ, a pĩ-la a nenga n zoet t'a nif na n wa teeg Wẽnde.

⁷Wẽnnaam yeelame: «M yãee neer-neere, m neba sẽn be Ezipt tẽnga nimbãanega. Sẽn get-b tʋʋma kɩtame tɩ b waasdẽ la m tʋbr wʋma b kɛlenga.

⁸M mi-la b yɩɩre la m datame n fãag b Ezipt rãmb nugẽ, n yaool n tall-ba n kẽes tẽn-yalengẽ la tẽn-sõngẽ; tẽn-kãng kʋɩlse: bĩisim la sɩɩdo. Yaa Kanaã rãmb tẽnga, n paas Ititse, Amoritse, Perizitse, Ivitse, la Zebuzits tẽnga.

⁹M wʋma Israyɛl kamba waasgo la m yãee namsg ning Ezipt rãmba sẽn namsd-b.

¹⁰[13†] Dẽ yĩnga m tʋmd-f-la dĩma nengẽ tɩ f tɩ yiis a Israyɛl kamba, mam nebã.»

¹¹A Moyiiz yeelame: «Maam la a bõe n na n ta dĩma nengẽ n kɩt t'a yiis Israyɛl kamb Ezipt tẽnga?»

¹²Tɩ Wẽnnaam yeele: «M na n zĩnda ne foo la ad kaset ning m sẽn kõt-f tɩ f bãng tɩ yaa maam n tʋmd foo: f sã n wa yiis m neba Ezipt tẽnga, y na rʋ tãn-kãnga zug n waoog-ma.»

¹³ [14†] A Moyiiz yeela Wẽnnaam: «Ade, m na n tɩ yeela Israyɛl kamba woto: ‹Yãmb yaab rãmb Wẽnnaam n tʋm maam y nengẽ.› B sã n sok maam tɩ y yʋʋr la a bõe, m leokda wãna?»

¹⁴[15†] Wẽnnaam yeela a Moyiiz: «Maam la a Beẽ-n-Beẽ! La f na n goma ne Israyɛl kamba woto: ‹A Beẽ-n-Beẽ [16] n tʋm maam yãmb nengẽ.›

¹⁵La f na n paasame: ‹Yaa Soaala n tʋm maam yãmb nengẽ, yaa yãmb yaab rãmb Wẽnnaam, a Abraam Wẽnnaam, a Izaak Wẽnnaam, a Zakoob Wẽnnaam.› Yaa yʋ-kãnga n na n yɩ m yʋʋre zamaan sẽn wate, yaa yʋ-kãnga la y na n ning y pʋ-tẽerẽ, zamaan woo zamaana.

¹⁶Marsã kẽng n tigim Israyɛl nin-kẽemba la f yeel-ba: ‹Soaala, yãmb yaab rãmb Wẽnnaam, a Abraam Wẽnnaam, a Izaak Wẽnnaam, a Zakoob Wẽnnaam, n lik maam la b yeel-m lame: M wa y sʋka n na n fãag yãmba, tɩ m yãee Ezipt rãmba sẽn zãad yãmb zãab ninga.

¹⁷Yaa rẽ yĩng la m dat tɩ y yi n kẽ Kanaã rãmb tẽngẽ n paas Ititse, Amoritse, Perizitse, Ivitse la Zebuzitse, m datame n tɩ kẽes-y tẽng a ye, la tẽng kãng kʋɩls koom yaa bĩisim la sɩɩdo.›

¹⁸B na n kelga f koɛɛga, la foo ne nin-kẽemba, yãmb na n tɩ yãee Ezipt dĩma la y na n yeel-a-la woto: ‹Naaba-Wẽnde, Ebre rãmba Wẽnnaam, n sig d sʋka. D Kotame tɩ y bas-d tɩ d kẽn dasem a tãab kẽnde, we-raoogẽ, n tɩ kʋ maoong bãmb yĩnga.›

¹⁹M miime tɩ sã n ka tũ ne pãnga, Ezipt rĩma kõn bas-y tɩ y yi ye.

²⁰Yaa rẽ yĩng la m na n tẽeg m nugu, dẽ la m na n moadg-a ne bõn-bãn ka tɛka, m sẽn na n maan. Dẽ poor marsã a na yaool n bas-y tɩ y looge.

²¹M na kɩt tɩ m kamba ne Ezipt neba moor zems taaba. Woto y sẽn wat n na n yi n looge, y kõn loog zaalem ye.

²²[17†] Pag na n kosa a yaka, n kos a zĩnd-n-taase, sãnem teedo, wanzurf teedo, futu. Dẽ n na n lebg yãmb kom-dibli bɩ yãmb kom-pugli faongo, tɩ Ezipt rãmb na n yaool n dɩ bõne.»