Read SEBR SÕNGO, 1998 Ezipt yiib kibare 32 Bible Online

Ezipt yiib kibare 32 - SEBR SÕNGO, 1998 bible

Ezipt yiib kibare 32

¹ [124†] Neba sẽn mik t'a Moyiiz kaoosda tãnga zugu, n pa sigd tao-tao, b gũbga a Aarõ n yeel-a: «Ade, yiki! Maan wẽnd-dãmb n kõ-do, tɩ b lʋɩ d taoore. Tõnd ka mi bũmb ning sẽn maan a Moyiiz, rao ning sẽn yiisa tõnd Ezipt tẽnga ye.»

²A Aarõ yeel-b lame: «Wa-y ne sãnem tʋb-londã y pagbã, y kom-dibli la y kom-pugli sẽn sog b tʋba. Tall-y-ba n wa kõ-ma.»

³La b fãa yãgsa b sãnem tʋb-lond n wa kõ a Aarõ.

⁴[125†] T'a Aarõ deeg-ba n bao boaaga n yẽneg-ba, n maan nag-bila; tɩ b naag taab n moone: «Woto la tõnd wẽnda sẽn yiis tõnd Ezipt tẽnga.»

⁵A Aarõ yãend-a lame la a mee maan-kugr n yals nag-bila taoore n yeel Israyɛl kamba: «Beoog yaa tig-raaga, Soaala yĩnga.»

⁶[126†] Vẽkẽmbeoog pĩnda b kʋʋ maando, yũ-noog maand, maan-dɩtga la b zĩndame n yũ, b zĩndame n dɩ n yik n deem.

⁷Wẽnnaam yeela a Moyiiz: «Ges n sigi tɩ f sẽn yiis neb niyns Ezipt tẽnga maana wɩɩbdo.

⁸Ka yãee n kaoos tɩ b zoe n zãag ne sor ning m sẽn wilg-ba ye. B yẽnega bũmb n maan nag-bila n yĩgimd a taoore. B kʋʋ maand n kõ-a la b yeelame: ‹Ad-d wẽnde, ad sẽn yiisa tõnd Ezipt tẽnga.› »

⁹Wẽnnaam yeela a Moyiiz: «M nee nebã, m neeme tɩ nin-bãmba yaa tõatba!

¹⁰Bas-m tɩ m yik ne-ba; bas tɩ m yik m sũur ne-ba, m na n menes-b lame la yaa fo roogo n na n lebg bu-kãsenga.»

¹¹A Moyiiz makame n na n sigs Soaala-Wẽnd sũuri, ad-a sẽn yeele: «Yaa bõe, Naaba-Wẽnde, tɩ y na n bas y sũur t'a fõd ne kamb niyns yãmb meng sẽn yiis Ezipt tẽnga ne y kang la y nug pãnga?

¹²Bõe tɩ Ezipt dãmb na n wa tõog n yeele: ‹A yiis-b-la pʋ-toog tõnd tẽnga, n na n tɩ kʋ-b tãms zutu tɩ b buuda yẽes tẽng zugu.› Sigs-y y sũuri, da bao-y y neba wãab ye.

¹³[127†] Tẽeg-y yã a Abraam, a Izaak la a Zakoob yelle. B yɩɩ yãmb tʋʋm-tʋmdba la yãmb wẽename n kãab-ba n yeele: ‹M na n kɩtame tɩ f buuda kamb zeng ãdsa ne sõore, m na n kõ-b-la tẽns ka tɛka tɩ yɩ b kamb la b yagens pʋɩɩre zamaana fãa sẽn wate.› »

¹⁴[128†] La bãng-y tɩ Soaala-Wẽnd yeelame tɩ b kõn le sɩbg b kamba ne yel-beed ning b sẽn da rat n sɩbg-ba ye.

¹⁵A Moyiiz dɩka sika sore, n sigd tãngã la a zãad kuga walsã a nugẽ. Yaa kug bãmb zug la zooda sẽn dat tɩ b tũ bũmb ninga fãa gʋls yã. Walsa kɩrems a yiiba fãa gʋlsame.

¹⁶Walsa yaa Wẽnd tʋʋmde, gʋlsga yaa Wẽnd gʋlsgo.

¹⁷A Zozuwe sẽn wʋm dãamd sẽn yit sikã a yeela a Moyiiz: «Kelg-y zabr bʋʋre, sika pʋga!»

¹⁸T'a Moyiiz leok-a: «Ka neb sẽn tõog b bɛɛb n lɛɛg n watẽ bʋʋr ye, ka neb sẽn lʋɩ bɛɛb nugẽ yãbr me ye, yaa kibs yɩɩl sẽn yɩɩn n deesd taab la m wʋmda.»

¹⁹A Moyiiz sẽn kolge, a yãee sãnem nag-bila, la a yãee neb sẽn saoode, t'a sũur puug wʋsgo t'a lob kuga walsã a sẽn da zãadã, a lob-b-la tãnga sɛɛg tɩ b wã.

²⁰A sẽn ta, a losa b sẽn dõog nag-bil ninga bugmẽ n yẽneg-a, n to-a t'a lebg zom bãanega t'a rɩk-a n lob koomẽ n kõ a Israyɛl kamba tɩ b yũ.

²¹A Moyiiz yaool n yeela a Aarõ: «Neba maan-f-la bõe tɩ f tʋk b zugu yel-beed sẽn ta woto fãa?»

²²T'a Aarõ yeele: «Bɩ f ra puug f sũur ye, fo meng mi tɩ nin-bãmba tʋʋla ne wẽng maanego.

²³Ad-y yaa bãmb meng n waa n yeel-ma: ‹Maan wẽnd dãmb n kõ-do tɩ b lʋɩ d taoore, tɩ Moyiiz ning sẽn yiisa tõnd Ezipt tẽnga, d ka mi bũmb ning sẽn maan-a ye.›

²⁴Ya rẽnda la m sok-ba: ‹Ãnda n tar sãnem?› La b fãa rɩka b sẽn tar n kõ-ma la m sẽn los rẽ fãa bugmẽ, nag-bil kãnga la m dõog-ya.»

²⁵A Moyiiz yãeeme tɩ neba da ka le tar lɛkd ye. A Aarõ ra bas-b lame tɩ b pʋʋs belgr wẽnde la b lebga bɛɛb laado.

²⁶A yalsa sika noor n yeele: «Sẽn ket n bɛ-a Naaba-Wẽnd poorẽ bɩ a wa ne maam!» Tao-tao t'a Levi kamba gũbg-a lame.

²⁷T'a yeel-ba: «Ad-y Soaala, a Israyɛl Wẽnnaam, daab la woto: ‹Ned kam fãa rɩk a sʋʋga, n kẽ sika pʋga, n yi zaka n kẽ zaka, la a kʋ, nina a ba-biiga, nina a zoa, nina a roagda!› »

²⁸A Levi kamba reega a Moyiiz noore, la badaare neb sẽn ta tus a tã n ki.

²⁹A Moyiiz yeel-b lame: «Reeg-y dũnna y maan-kʋʋr tõogo tɩ Wẽnd n kõt-a yãmba la ka zaalem ye. Yaa b kamb zɩɩm la kẽer daag yã, kẽer yaa b yaop rẽnna, la rũnna yaa y maan-kʋʋr tõog reegr daare la bɩ Soaala-Wẽnd ning-y barka.»

³⁰Beoog sẽn vẽege, a Moyiiz yeela zãma wã: «Yãmb maana sẽn ka neer ba bilfu, dẽ la m na n le rʋ tãngã, Soaala taoore, tɩ daare y samda na tõog n yao.»

³¹La sɩda a Moyiiz leba Wẽnd nengẽ n yeel-ba: «Kato! Neba maana yell kãsenga, b maana sãnem wẽnde.

³²[129†] M kot-y lame tɩ y kõ-b sugri, ka rẽ bɩ y yẽes m yʋʋra sẽn gʋls vɩɩm sebra pʋga.»

³³La Soaala-Wẽnd yeelame: «Yaa sẽn maana wẽng la m na n yẽes m sebrẽ.

³⁴Leb n tɩ tall nebã n kẽng m sẽn wilg zĩig ningã. M malɛk na n lʋɩ-la f taoore la m sẽn na n wa ges-b raare, m na sɩbg b beegrã.»

³⁵Wẽnd sɩbga neba b sẽn maan nag-bila yĩnga, b sẽn kos a Aarõ t'a maan nag-bilã [130] n kõ-ba yĩnga.