Read SEBR SÕNGO, 1998 Ezipt yiib kibare 37 Bible Online

Ezipt yiib kibare 37 - SEBR SÕNGO, 1998 bible

Ezipt yiib kibare 37

¹A Besalɛl dɩka gõ-miig n pees raad n maan koglgã. A woglem yaa kãntɩɩs a yi la pʋɩ-sʋka, a yalem kãntɩɩg la pʋɩ-sʋka, a zãndlem kãntɩɩg la pʋɩ-sʋka.

²A gãnega sãnem yulli koglga pʋg la a yɩnga. A kʋgla a noorã ne sãnem maabre.

³A maana sãnem kags a naas n sog koglga tẽngre, a yiib kɩreng a ye, a yiib kɩreng a to.

⁴A peesa gõ-miig raad gils-gilsi n bolg sãnem.

⁵A rɩk-b lame n tui kagsã la yaa ne ra bãmb la b ra tar n zɩt koglgã.

⁶A maana koglga linga ne sãnem yɩlemde; a woglma yaa kãntɩɩs a yi la pʋɩ-sʋka, a yalma kãntɩɩg la pʋɩ-sʋka.

⁷A rɩka zãar n kud rũms a yi sẽn naag n tar nao a naase la pɩgsa la ninsaal nenga. A yals-b-la koglga linga sɛtmẽ.

⁸A ye ninga rɩtgo, t'a ye ning goabga la b naag-b lame n ka ne lingã.

⁹Rũmsa sẽn da yɛsa pɩgs ra zẽkame n yɛdg linga zugu. B nensa ra teesa taaba la b ra geta koglga lingã.

¹⁰B peesa gõ-miig raad n maan te-roagendga. A woglem yaa kãntɩɩs a yi, a yalem kãntɩɩga, a zãndlem kãntɩɩg la pʋɩ-sʋka.

¹¹B gãnega sãnem yɩlemde a zugã la b mobga a noora ne sãnem maabre.

¹²Raad yalem sẽn ta nus-bi a naase n ka n pɩke n maan kogsre la b bolga bãmb me sãnem.

¹³B maana sãnem kags a naas n ning te-roagendga kɩrems a naasã.

¹⁴Kagsa ra pẽnega te-roagendga noore la b ra tuiid-b-la raado n na n tõog n zẽk-a n teem zĩiga.

¹⁵Ra-kãens peesame n bolg sãnem, b pees-b-la te-roagendga tʋkr yĩnga.

¹⁶B kuda ne sãnem, teeda sẽn na n dogl a zugã: laase, ko-teese, la gilsi, wũmbli, bãmb pʋg la b na n ningd rãam bɩ kaama sẽn na n bas ne maandã. Yaa sãnem yɩlemde la b rɩk n maan-ba.

¹⁷B rɩka sãnem meng menga n kud fitil kãsenga. Zãar n toos sɛɛgã wala willã, maabrã, pu-yoaalã la puuga menga. Fãa naagame n kud kud-yɛnga.

¹⁸Fitila welga a sɛɛgẽ wã wil a yoobe: wil a yoob sẽn keg taab tẽnsʋk willã n dʋʋd a yiib-yiibu, zĩis a tã.

¹⁹Wil a yooba fãa sẽn keg taab tẽnsʋk willã n dʋʋd a yiib-yiib, zĩis a tã wã tara puud a tã sẽn dõog wa lɩɩn-puugu, ne a pu-yoolle la a puug menga.

²⁰Sʋk wila tara puud a naase, sẽn dõog wa lɩɩn-puugu, ne a pu-yoolle la a puug menga.

²¹Maabre n da tʋʋg n gilg zĩis a tãabã wil a yooba sẽn keg taab tẽnsʋk willã n duudã.

²²Maabra ne wila naagame n kud kud yɛnga. Fãa yaa sãnem meng sẽn toos ne zãare.

²³Fitilsa a yopoe wã n paas teed a taaba, wa wõrsdgã la bug-rɩɩnda sẽn dʋʋgd zĩig ningã, dẽ me yõga ne sãnem yulli.

²⁴B rɩka sãnem gilgu sẽn sek nin-tɩɩg tʋkre n kud rẽ fãa.

²⁵B peesa gõ-miig raad n ka tɩdar maan-kugrã. A woglma yaa kãntɩɩga, a yalma yaa kãntɩɩga. A yalma la a woglma ra zema taaba. A zãndlma n da ya kãntɩɩs a yi, la a yɩdba naagame n ya bũmb a ye ne-a.

²⁶B baoo sãnem meng n bolg a zugã la a kɩremsã la a yɩdbã, n bao sãnem maabre n mobg-a zãnga.

²⁷B ninga a kɩrems a yiibã, poorẽ la taoore, sãnem kagse, bãmb b naase. Raad a yi n tuiid kagsã, maan-kugra tʋkr yĩnga.

²⁸Daada maneg n peesa ne gõ-miiga, n bolg sãnem.

²⁹B segla ka-sõngã la tɩdarã sẽn na n yõogã, wala mitba sẽn maandã.