Read SEBR SÕNGO, 1998 Ezipt yiib kibare 39 Bible Online

Ezipt yiib kibare 39 - SEBR SÕNGO, 1998 bible

Ezipt yiib kibare 39

¹Wẽnd dooga maanda kʋʋb yĩnga, b maana futu ne gĩs peelse, gĩs mismiidu, gĩs miidu, gĩs moam yʋs; b wʋga fut sẽn ya sõmbo a Aarõ yĩnga, wala Soaala-Wẽnd sẽn da wilgã.

²B maana sãnem-pɛ-m-poore ne gĩs mismiidu, gĩs miidu, gĩs moam yʋs, gĩs bãanese, n kõog-a ne sãnem gĩsi.

³B kuda sãnem t'a lebg paklga tɩ b bẽes a bõonego n kalem ne gĩs mismiidã, gĩs miidã, gĩs moam yʋs, gĩs peelse wala bukd mitba sẽn maandã.

⁴Sãnem-pɛ-m-poora yĩnga b wʋga peen-dis a yi: Peen-disa ninga sãnem-pɛ-m-poora kɩrems a yi.

⁵Sãnem-pɛ-m-poora peen-disa wʋga wala a mengã la ra yaa bõn-yɛng ne-a, wala Soaala sẽn da wilg a Moyiiz.

⁶B peesa kug miid a yiibã tɩ b yãgd b toore, n maneg n mobg-b ne sãnem. Kug miida zug ra gʋlsa a Zakoob kamba yʋy; gʋlsame tɩ kẽ sõma.

⁷B ra loeta Israyɛl kamba yʋy fu-bãg-vɩɩda poore n na wilg tɩ Soaala tẽra b yelle, wa b sẽn da wilg a Moyiiz.

⁸B mana sãnem-pɛ-m-yãoogã. B maneg n buk-a-la wa sãnem-pɛ-m-poorã ne gĩs mismiidu, gĩs miidu, gĩs moam yʋs, gĩs peelse, n kõog-a ne sãnem wa sãnem-pɛ-m-poorã.

⁹Da yaa gɩfo; a yalma me a woglma ra zema taaba, da yaa nug-yakemde.

¹⁰Gɩfa manegame n zape n tong a zugu kug neeb rũnus a naase: Pipi rũnuga yɩɩ kug zẽoogo, kõodr-pespele, toenɛɛga.

¹¹Rũnug a yiib soaba: moomde, kẽega la kõodre.

¹²Rũnug a tãab soaba: miuug la sabla, kõodr sẽn lɩʋʋs miuugu, la mismiuugu.

¹³Rũnug a naas soaba: yirg gelle, rulg-lɛlma la bɩrba. Kug bãmb fãa zapame n kok ne sãnem.

¹⁴Kugr a ye fãa tara a Israyɛl biig yʋʋre la b sõora yaa piig la a yiibu. Yʋʋra gʋlsame tɩ kẽ kugrã wala kaset gʋlsem. Buuda sak fãa tara a kugri.

¹⁵B dɩka sãnem gĩs n pãnem wa wĩir, sãnem-pɛ-m-yãooga sẽbgr yĩnga.

¹⁶B rõoga sãnem nug-bĩns a yi, n gãneg sãnem paklga n bʋʋg-ba tɩ b luund sãnem-pɛ-m-yãooga yĩngr kɩrems a yiibã.

¹⁷Sãnem pãnems a yiibã dɩka b noor a ye n loe sãnem-pɛ-m-yãooga nug-bĩns a yiibã.

¹⁸Sãnem pãnemsa noor a to dɩk n loe ne sãnem-pɛ-m-poora peen-disã la woto gɩfa ka lebd goabg la rɩtg ye.

¹⁹B kuda sãnem kags a yi n loe-b sãnem-pɛ-m-yãooga tẽngr kɩrems a yiibã.

²⁰B le kuda sãnem kags a yi n loe-b sãnem-pɛ-m-poor peen-dis a yiibã tẽngre, b sẽnesma zĩigẽ. Kagsa ra be yĩngr tɩ peen-disa be bãmb tẽngre.

²¹B rɩka peend mismiigu n gaag sãnem-pɛ-m-yãoogã la sãnem-pɛ-m-poorã kagse la woto b naaga taab n sog n ka le tõe n n lak ne fu-bãg-vɩɩda ye, wala Soaala-Wẽnd sẽn da wilg a Moyiiz.

²²B wʋga fu-kãseng ning sãnem-pɛ-m-poorã la sãnem-pɛ-m-yãooga sẽn na n wa yeelg n bʋʋgã. B wʋg-a-la zãng ne pe-kõbd gĩs mismiidu. Yɩɩ mit tʋʋmde.

²³B ninga loor fu-yorga tẽnsʋka la loora ra kãda wala gãmbre, n ka tõe n kẽeg ye.

²⁴Fuuga tẽngre b gʋla tɩ-biis wa pooloomse ne gĩs mismiigu, gĩs miuugu, gĩs moomd yʋs, gĩs-pɛɛlga.

²⁵B kuda sãnem loamba n lɩʋʋs-b fuuga tẽngr ne tɩ-biisã.

²⁶Sɩda loamba wã ne tɩ-biisa ra lɩʋʋsa taab fuuga tẽngre: tɩɩg biiga, lombre; tɩɩg biiga lombre. La fuuga ra yeelgda maanda kʋʋb yĩnga, wala Soaala-Wẽnd sẽn da wilg a Moyiiz.

²⁷A Aarõ ne a kamba yĩnga b sẽe fu-peelse. Dẽ me yɩɩ sʋlg mit tʋʋmde.

²⁸Sẽn-le paase, b wʋga zu-viindse, pugli la kur koeese ne gĩs peelse.

²⁹Sã n ya sẽbdsã, bãmb wʋga ne gĩs mismiidu, gĩs miidu, gĩs moam yʋs; b maneg n buk-b-la sõmb sõmbo, wala Wẽnd sẽn da togs a Moyiiz.

³⁰B kuda sãnem paklgã sẽn na n mobg rĩirã. B kuda-a-la ne sãnem yɩlenga la b gʋlsame tɩ kẽ neere, wa kaset gʋlsem: Welga toor Wẽnd yĩnga.

³¹B sog-a-la ne peen mismiigu sẽn na n yɩlẽ n loe-a ne puglã, wala Wẽnd sẽn da wilg a Moyiiz.

³²Woto la b baas rooga tʋʋma, sɛka roog tʋʋma. Israyɛl kamba modga ne tʋʋmna la b tʋmame tɩ tũ, wala a Moyiiz sẽn yeela zãnga.

³³B waa n kɩsa a Moyiiz sɛka roog ne a zaka teedo; b waa ne sogdsã, ra-kaadsã, ra-paadsã, ra-lug gilimsã ne b te-sendsã,

³⁴B waa ne pe-raada gãn-moama, sugra gãn sẽn ka tõe n yũn kooma, tẽnsʋk peen-lutgã.

³⁵B waa ne kuga walsa koglgo la a ra-tuiidsã n paas a lingã.

³⁶B waa ne te-roagendgã ne a teedã la Soaala-Wẽnd burã.

³⁷B waa ne sãnem fitil kãsengã, teed nins sẽn naag wa wõrsdgã, bug-rɩɩnda laaga n paas bugma kaam.

³⁸B waa ne sãnem maan-kugrã, ka-sõngã, tɩdar bãanegã, rooga noor peen-lillã.

³⁹B waa ne zũud maan-kugrã ne a kut gãmbrã, a ra-tuiidsã la a teed a taaba n paas ko-sĩnga ne a sẽn dɩg bũmb ninga zugã.

⁴⁰B waa ne zaka pɛɛla, ra-lugsã, te-sendsã, zaka noor peenna, wĩya, bãn-kaadsã la bũmb ning fãa sẽn tar a tʋʋmd dooga pʋga, sɛka roogã.

⁴¹B waa ne futã, maan-kʋʋra futã, a Aarõ ne a kamba sẽn da tog n yeelg b rãmbã, b tʋʋmda wakatã.

⁴²Teeda fãa ra maaname n tũ Soaala-Wẽnd sẽn da wilg a Moyiiz.

⁴³A Moyiiz ges-b-la a yembr-yembre, a yãeeme tɩ yaa Soaala-Wẽnd sẽn datã la a ning-b-la barka.