Read SEBR SÕNGO, 1998 Ezipt yiib kibare 4 Bible Online

Ezipt yiib kibare 4 - SEBR SÕNGO, 1998 bible

Ezipt yiib kibare 4

¹A Moyiiz yeelame: «M maanda a wãna? B sã n zãgs m tẽebo, n zãgs m kelegre, b sã n yeele: Bada, Soaala-Wẽnd pa lik foo ye!»

²Dẽ la Soaala sok-a: «Yaa bõe la f zãada?» T'a yeele: «Yaa dasaare!»

³Tɩ Soaala kõ-a noor t'a lob dasaara tẽnga. A sẽn lobe, lebga waafo, t'a tare.

⁴Tɩ Soaala yeel-a: «Tẽeg f nugu n gãd a zʋʋrã!» T'a Moyiiz tud a nugu n gãde, la waafa sẽn ta a nugẽ, a lebga dasaare.

⁵Wẽnd yeelame: «Woto b na reeg tɩ sɩd yaa Wẽnnaam n lik b menga, b yaab rãmb Wẽnnaama, a Abraam Wẽnnaama, a Izaak Wẽnnaama, a Zakoob Wẽnnaama.»

⁶Soaala le yeela a Moyiiz: «Kẽes f nugã f fuugẽ n sɩɩs f yãoogo.» T'a kẽes a nugu, n sɩɩs a yãoogo n lɛɛg n yiis n mik t'a yĩn-gãong bẽedame n pelg wa laongo.

⁷Tɩ Soaala ko-a noore: «Lebs n sɩɩs f yãoogo.» A sẽn kẽes a nug n lɛɛg n yiisi, a mikame t'a leba a pĩnd zĩigẽ.

⁸Soaala yeel-a lame: «Woto, pipi bõn-bãnda sã n ka tõog tɩ b reege, a yiib soaba na tõoge.

⁹La b sã n ket n ka tẽeda, b sã n ket n ka rat n kelge, bõn-bãn a yiiba poore, bɩ f toog kʋɩlga koom n daag tẽnga; kooma fo sẽn toog kʋɩlgẽ wã na lebg zɩɩm, f sã n daag-a tẽnga.»

¹⁰A Moyiiz yeela Soaala-Wẽnde: «Y kabre, m Soaala! Sẽn ta marsã, mam zɩ n yɩ goam-goamd ye. Ne yãmb sẽn lik maam n gom ne maama, bũmb ka teem ye. Goama ka sakd m noorẽ ye la m zelemd yaa pabrgo.»

¹¹Soaala-Wẽnd leokame: «Ãn n kɩbg ninsaal noore? Ãnna n naan muka, n naan wʋnga, sẽn ne-a la sẽn ka ne-a? Ka maam laa!

¹²Dɩlla, kẽng tao, m na yaag f noore, m na wilg f sẽn na n togse.»

¹³A Moyiiz le yeelame: «Y kabre, m Soaala, bao-y y sẽn dat a soaba n tʋm!»

¹⁴Tɩ Soaala-Wẽnd sũur puug tɩ b yeele: «Fo saam-biig a Aarõ, Levitga, ka be la? Mam miime t'a gomda neere. Ad-a sẽn pʋs n wat f nengẽ. A sã n ta f taoore, a sũur na yɩ noogo.

¹⁵Foo n na gome la yẽ noor n na deeg goama n taase. Mam meng na sõng yãmb y yiibu, n wilg y sẽn na n togse.

¹⁶A Aarõ n na n gom ne neba fo zĩigẽ. A noora na n yɩɩ fo noore, fo yaa wa a wẽnde, n vẽnegd-a.

¹⁷Sã n ya f dasaarã, dɩk-a n zã. F na n maana bõn-bãn wʋsgo ne-a.»

¹⁸A Moyiiz yi-la a sẽn da be zĩig ningã n lɛɛg n wa a rɛɛmba, a Zetro, nengẽ la a yeel-a lame: «M kota sor n leb Ezipt tẽnga, m saam-biisa sẽn be zĩig ningã, n ges b sã n ketame.» T'a Zetro na n yeel-a: «Kẽng ne laafi!»

¹⁹Yaa woto la Soaala-Wẽnd gom ne a Moyiiz Madiã tẽnga: «Yik n leb Ezipt tẽnga tɩ sẽn baood-b foom n na n kʋ wã, kii zãnga.»

²⁰A Moyiiz yii ne a paga la a biiga, a zombg-b-la bõanga n le rɩk Ezipt sore. A Moyiiz da zãada Wẽnd sẽn kõ-a dasaar ningã, a nugẽ.

²¹La Soaala le yeel-a lame: «Fo sẽn lebd Ezipt tẽngã bɩ f sak n maan bõn-bãna dĩma taoore. M kõ-f-la tõog rẽ yĩnga. M na n gesame n kidb a sũuri, la a ka na n bas m neba tɩ b loog ye.

²²Dẽ marsã la f na n yeel dĩma: Soaala-Wẽnd koɛɛg la woto: mam bi-kẽeng la a Israyɛl.

²³[18†] M yet-f lame; bas m biiga t'a kẽng n tɩ waoog-ma; la f sẽn zãgs t'a kõn yi wã, ma me na n kʋʋ fo bi-kẽenga.»

²⁴A Moyiiz waa n yalsa b sikẽ yʋngo tɩ Soaala-Wẽnd kolg-a, la yaa waa b ra baood n na n yiisa a yõore.

²⁵A Sefora rɩka kugr sẽn dɩt wa barga n kẽes a biiga bãongo. A rɩka zɩɩma n taag a sɩda kur-wĩir n yetẽ: Fo yaa m sɩd m sẽn fãag ne zɩɩm.

²⁶Soaala-Wẽnd loog n bas-a a Moyiiz t'a Sefora sẽn gom tɩ zɩɩm n fãag a sɩdã, yaa bãonga kẽesg yell la a tẽeg-a.

²⁷Soaala-Wẽnd yeela a Aarõ: «Yi we-raooga sẽnẽ n seg a Moyiiz.» A Yikame la a seg-a-la Wẽnd tãnga zugu la b mobga taaba.

²⁸A Moyiiz wilga a Aarõ Soaala-Wẽnd sẽn kõ-a tʋʋmd ningã la bõn-bãn niyns b sẽn kõ-a noor t'a maana.

²⁹A Moyiiz ne a Aarõ dɩka sore la b sẽn ta, b tigma tẽnga nin-kẽemba sẽn ya Israyɛl kamba.

³⁰A Aarõ togs-b-la bũmb ning fãa Soaala-Wẽnd sẽn taas a Moyiiz la buuda taoore, a wẽneg n maana bõn-bãna.

³¹B deegame tɩ Wẽnd bee ne-ba, tɩ b yãenda b nimbãanega la b watame n na n fãag-ba. Woto b wõgemda tẽnga n waoog Soaalã.