Read SEBR SÕNGO, 1998 Ezipt yiib kibare 6 Bible Online

Ezipt yiib kibare 6 - SEBR SÕNGO, 1998 bible

Ezipt yiib kibare 6

¹Wẽnnaam yeela a Moyiiz: «Yɩ bilfu, f na yãend m sẽn na n maan Ezipt dĩma bũmb ninga! M na modg-a t'a bas Israyɛl kamb tɩ b looge. M meng m toore n na n kɩt tɩ b yi ne rugdu.»

²Wẽnnaam goma ne a Moyiiz n yeel-a: «Maam la Soaala.

³[19†] Mam lika m meng a Abraam, a Izaak, a Zakoob wala Wẽnd ning sẽn yɛs a zĩigẽ daar fãa; m wilg-b-la neere tɩ maam la Soaala sẽn bɛ-a bãmb poorẽ dũnna la beoogã.

⁴Mam yõga zood ne bãmba la m maana kaseto tɩ m na n kõ-b-la Kanaã tẽnga, tẽng ning b sẽn yi b ba-yir n wa kẽ sãandã.

⁵Ezipt sẽn tar b rãmb wa yem-daadã kɛleng lʋɩ m tʋbrẽ, dẽ la m tẽeg m kãabgã.

⁶Dɩlla f na tɩ yeel Israyɛl kamba: Maam la Naaba-Wẽnde, m na kɩt tɩ y tɩlg ne Ezipt tʋʋm toodã. M na yiis-y yembd pʋgẽ, m na wilg Ezipt tɩ, pipi, yaa mam soolmẽ la a Israyɛl deng n lʋɩ la m na le reeg-a-la ne pãng la rugdu.

⁷Y na lebg mam buud neba la ma me na lebg yãmb Wẽnde la y na bãng tɩ yaa maam, yãmb Wẽnnaam, n kɩt tɩ y tɩlg ne Ezipt tʋʋm toodo.

⁸Dẽ poore, m na n kẽes-y-la tẽng ning m sẽn kãab a Abraam, a Izaak, a Zakoob, la tẽnga na waa n lebg y soolem, tɩ maam, y Wẽndã, n kãab-y rẽnna.»

⁹A Moyiiz taasa Israyɛl kambã Soaala-Wẽnd gomdã la Israyɛl kamb pa sak n kelg ye; b da yɛɛ fas ne b yembdã.

¹⁰Soaala-Wẽnd yeela a Moyiiz:

¹¹«Kẽng Ezipt dĩma nengẽ n tɩ yeel-a t'a bas Israyɛl kamba tɩ b yi a tẽngẽ wã n looge.»

¹²A Moyiiz guglma Wẽnd taoore n yeele: «M sẽn ka tõog tɩ Israyɛl kamba kelg m koɛɛga, m yɩta a wãn marsã n tõog tɩ dĩma reeg m koɛɛga? Maam la sẽn ka mi goam la.»

¹³Soaala-Wẽnd zaba ne a Moyiiz la a Aarõ, n kõ-b noor tɩ b bʋʋg Ezipt dĩma n kɩt t'a bas Israyɛl kamb tɩ b yi Ezipt tẽnga.

¹⁴Ad Israyɛl buuda kãsem-dãmba: Pipi, a Rubẽ, a Israyɛl bi-kẽenga, yẽ kamb la woto: a Anok, a Palu, a Esrõ, la a Karmi. Bãmb la a Rubẽ rooga kãsem-dãmba.

¹⁵A Simeõ kamba: a Yemuwɛl, a Yamin, a Oad, a Yakim, a Soar la a Sol, yẽ ma yɩɩ Kanaã bi-pugla. B zãng kẽeda a Simeõ.

¹⁶Ad-a Levi kamb la a yagense: a Gersõ, a Keyat, a Merari. A Levi yʋʋma yɩɩ koabg la pis-tã la a yopoe.

¹⁷A Gersõ kamba: a Libni, a Simeyi; bãmb me yɩɩ roog kãsem dãmba.

¹⁸A Keyat kamba: a Amram, a Isar, a Ebrõ la a Uziyɛl. A Keyat yʋʋm yɩɩ koabg la pis-tã la a tã.

¹⁹ [20†] A Merari kamba: a Mali, a Musi, b zãng yaa a Levi kamba la a yagense.

²⁰A Amram dɩka a pʋgdba a Zokbɛd n maan a paga, n dog kamb a yiibu, a Aarõ la a Moyiiz. A Amram yʋʋm yɩɩ koabg la pis-tã la a yopoe.

²¹A Isar kamba: a Kore, a Nefɛg la a Zikri.

²²A Uziyɛl kamba: a Mikayɛl, a Elisafã la a Sitri.

²³A Aarõ pag yɩ-la a Eliseba. Yẽnd ba la a Aminadab, a tão la a Nasõ; yẽ n dog a Nadab, a Abiyu, a Elazar la a Itamar.

²⁴A Kore kamb la a Asir, a Elkana la a Abiasaf. Bãmb la a Kore doogo.

²⁵A Aarõ biig a Elazar yii kãadem ne a Yptiyɛl bi-pugl a ye n dog a Pinas. A Levi buudu, a kamb la a yagens la bãmba.

²⁶Yaa a Aarõ la a Moyiiz la Soaala-Wẽnd da kõ noore: Kɩt-y tɩ Israyɛl kamba bob tãpo n yi Ezipt tẽnga.

²⁷Yaa bãmb n tɩ gom ne Ezipt dĩma, n yeel-a t'a bas Israyɛl kamba tɩ b looge. N-ye! Yɩ-la a Moyiiz ne a Aarõ.

²⁸Wẽnnaam goma ne a Moyiiz Ezipt tẽnga,

²⁹n yeel-a: «Maam la Soaala. M sẽn na n yeel-f bũmb ning fãa bɩ f sõng n taas-a Ezipt dĩma.»

³⁰T'a Moyiiz leok woto: «M pa tõe n gom naana ye; dĩma na sak n kelg sɩda?»