Read SEBR SÕNGO, 1998 Zoob 10 Bible Online

Zoob 10 - SEBR SÕNGO, 1998 bible

Zoob 10

¹Mam yam yaa n laka ne vɩɩma, dẽ yĩnga, m goama na n pãrame; m na n goma ne sũur sẽn sãame.

²M na n yeela Wẽnde: da paalg-y-m ye, wilg-y maam yãmb zabra võore.

³Y sũur nooma m sẽn zĩ ne yɩɩra laa? Y pa le nand y sẽn nams n yag laa? Y rat n sõnga sẽn wʋgd b zãmb sʋnda laa?

⁴Y nina ka ne n yɩɩd ninsaal dẽnd laa? Y sẽn ne tekda ninsaal nif yaadem bal laa?

⁵Yãmb vɩɩma yaa koɛɛg wa ninsaal rẽnd bɩ? Yãmb daara loogda tao tao wala ninsaal rẽnd bɩ,

⁶tɩ y baood n na n bãng mam beegrã, n sokd n na n tɩg m yel-wẽnda sẽn yɩ a soaba?

⁷Y yaool n mi vẽenega tɩ m pʋg yaa pɛɛlga, la ned sɩd ka tõe n fãag maam yãmb nugẽ?

⁸Y nus n gãd maam, n wẽoog maam, y nus n naag taab n yag-ma la b naag taab n sor-m begdẽ.

⁹Tẽeg-y tɩ yãmb sɩd yag-m-la ne yagdo la y na n le kɩtame tɩ m leb tomẽ.

¹⁰M sɩnga koaag-koaaga n wa lebg kɩd-kɩda.

¹¹Y waa n yaool m kõ-m-la nemdo, n dɩk yĩn-gãong n yeelg-ma, n zĩnd be n kãam m yĩnga ne kõab la gĩin.

¹²Yãmb n kõ-m vɩɩm la pãnga la y gũudem tonga m yõore.

¹³Y sẽn da solg y sũurẽ wã la woto, y sẽn da wʋgd wa sʋnda la woto.

¹⁴Y yõka m nug laagẽ, m beegra wakato, n yet tɩ y kõn bas beegrã n ka sɩbg ye.

¹⁵Mam sã n maana yell kegre, m bʋko! M sã n ya nin-tɩrg me, m zug kõn doog ye, yãnd bal n tar maam, far bal n wʋm maam.

¹⁶M yet tɩ m yikda, y wudgd n bri-m-la wa ãbga. Y le sɩngda y tʋʋm beeda ne maam,

¹⁷y le yãngda y sũ-puura ne maam, y tãb-biisa zabda ne maam n deesd taaba.

¹⁸Bõe tɩ yãmb yiis maam m ma pʋgẽ? M sã n da kiẽ, nif kõn yãee-m ye,

¹⁹da na n yɩẽ-la wa m ka zĩnd ye, n yi m ma pʋgẽ n yak yaoogẽ.

²⁰La yaa m daarã n tong wok-wok tẽng zug ka, bɩ bõe, tɩ y ka na n bas-ma, tɩ y ka na n yols tɩ m me paam n deem bilfu,

²¹n yaool n kul zãng-zãng m tẽngẽ, lik la kɩɩms na-tẽngẽ?

²²Beelẽ sõor yaa ki-lika, beelẽ zĩiga pila ne kũum sõngo, beelẽ vẽenem la yʋn-sʋk lika.