Read SEBR SÕNGO, 1998 Zoob 11 Bible Online

Zoob 11 - SEBR SÕNGO, 1998 bible

Zoob 11

¹A Sofar, Naama daoa, n deeg goama, n yeele:

²Gom minem soaba pa tẽed leokr laa? Dẽ yĩnga bʋrg la gom toodo n wat ne bʋʋm bɩ?

³Ad-f goama pãrãrr kɩtame tɩ neba yaag b noor n kelgdẽ. Fo bee yɛ n laad neb tɩ b pa tõe n kʋɩdg-fo?

⁴Fo saag n yeelame: «M zãmsga ka pa sãoog ye, la m neeme tɩ yell ka m zug ye!»

⁵Ade, Wẽnd sã n da ratẽ goama, b sã n da yaagẽ b noore n leoke,

⁶b sã n da rat n vẽnegẽ b sẽn mi, la rẽ yaa bũmb sẽn zʋʋg ninsaal yam pãnga, f na bãngẽ tɩ Wẽnd sẽn bas taal n ka sɩbg labsa.

⁷Fo tagsdame tɩ f tõe n bãnga Wẽnde n paam b bãngra zulma tɛk wɛ, fo tagsame tɩ f tõe n bãnga Wẽnd pãnga zãng wɛ?

⁸Baad a lug n yɩɩda sagãna, fo na n maana wãna? A zulum n yɩɩda bug-tẽnga, bõe la f tõe n bãnge?

⁹A woglem yɩɩda tẽnga t'a yalem zʋʋg Mogrã.

¹⁰Wẽnd loogda, yalsd ka ye, b yõkda, deegd ka ye, b boond bʋʋdo, tõat ka ye.

¹¹Bala Wẽnd mii zirẽ-be-rãmbã, b welgda neer la wẽng tɩ ka tũ ne toog ye,

¹²tɩ ninsaal yɩɩra yaool n menesd a yam, t'a rogma daare ninsaal ya wa burgumd bila.

¹³Fo sã n paam tɩ f yama sĩdi, fo sã n wa yɛdg la f tẽeg f nusã n tees bãmba,

¹⁴f sã n mik tɩ yel-yood tab-f lame, bɩ f pĩng rẽ n lob yɩɩga la f ra lɛɛg n gãe f meng rẽgdẽ ye.

¹⁵Woto la f na n tõog n zẽk f zug ne pʋ-peelem. Fo sũura sẽn pek ne a rẽgdã kõn kiuus rabeem ye.

¹⁶F fara fãa na tiig n sɛ tɩ f ka le tags a yell ye; f wat n tẽra a yelle wa koom sẽn daage.

¹⁷Fo vɩɩma na n yãnga wala wĩnto-sʋka, tɩ ki-lik legb wa sõor sẽn pukdi.

¹⁸F na n le sɩng saagre, f na le yik ne raoodo. F sẽn ne tɩ bũmb fãa le wa-la a zĩigẽ f na gãand ne laafi.

¹⁹Fo sã n vʋʋsdẽ, ned kõn saag n nek-f ye, f sõsd-n-taasa na le wa tigim f sɛɛgẽ.

²⁰Sã n ya nin-wẽensa b yiiga b nin n zĩi n getẽ, b kõn yãend zĩig n lamdg ye, la yaa kũum bala la b zĩi n gũudẽ.